باتىس قازاقستاندا قار قۇرساۋىنان 40 ادام قۇتقارىلدى

ورال. 18 ناۋرىز. باتىس قازاقستان وبلىسىندا قار قۇرساۋىندا قالعان 40 ادام قۇتقارىلدى. بۇل تۋرالى batysnewskz.kz-كە سىلتەمە جاساعان egemen.kz ءتىلشىسى حابارلادى. وقيعا شىڭعىرلاۋ اۋدانىنداعى قوتانكول مەن قايىڭدى ەلدى مەكەندەرىنىڭ اراسىندا بولعان. بۇل جونىندە 16 ناۋرىز كۇنى ورال شەكارا وتريادىنا قاراستى «شىڭعىرلاۋ» شەكارا كومەنداتۋراسىنا توتەنشە جاعداي بولىمىنەن حابار كەلىپ تۇسكەن. كوكتەم كەلدى دەپ جايباراقات جولعا شىققان تۇرعىندار قىستىڭ اقتۇتەك بورانىنا تاپ بولىپتى. «قار مولشەرىنىڭ كوپ تۇسكەنى سونشالىق, ادام بويىنان بيىك بولعان. قۇتقارۋ جۇمىسىنا جەرگىلىكتى قوجالىقتار دا كومەك كورسەتكەن. ابىروي بولعاندا, ەشكىم ۇسىككە شالىنىپ, زارداپ شەكپەي, وتباسىلارىمەن امان-ەسەن قاۋىشتى. ءتىلسىز جاۋدىڭ قۇرساۋىنان شىققاندار شەكاراشىلارعا زور العىس ءبىلدىرىپ وتىر», – دەيدى ورال شەكارا وتريادىنىڭ 20/29 اسكەري ءبولىمىنىڭ وكىلى ماناربەك قاراكەنوۆ. شەكاراشىلاردىڭ ايتۋىنشا, 40 ادامنىڭ 20-سى مەكتەپ وقۋشىلارى. سوندىقتان جەدەل كومەك ۇيىمداستىرىلىپ, جەڭىل بروندالعان كوپ ماقساتتاعى قۇتقارۋ كولىگىنە تيەلگەن جىلى كيىمدەر مەن ىستىق تاماق دالادا قالعاندارعا جەتكىزىلگەن. قالىڭ قارعا باتقان كولىكتەردى سۇيرەپ شىعارۋعا تۋرا كەلگەن. تەمىر قۇسايىن. دەرەك, سۋرەت: batysnewskz.kz.