ناۋرىز نىساندارى

وسكەمەندە ناۋرىز كۇنى قار­ساڭىندا ەكى ءبىلىم بەرۋ مەكەمەسى ەسىگىن ايقارا اشتى. ۇلىستىڭ ۇلى كۇنىندە وبلىس ورتالىعىندا №46 مەكتەپ پەن «ازامات» بالا­باقشاسىنىڭ تۇساۋى كەسىلدى. سال­تاناتتى شاراعا قالالىق اقسا­قالدار كەڭەسى مەن جەرگىلىكتى باسقارمالار جانە اتا-انالار قاتىس­تى. وسكەمەننىڭ ەكولوگيالىق تازا اۋدانىنان بوي كوتەرگەن كورىك­تى جاڭا مەكتەپتىڭ اشىلۋ ءراسىمىن­دە مەرەكەلىك داستارقان جايى­لىپ, مەيماندار ناۋرىز كوجە­دەن ءدام تاتتى. وسكەمەن قالاسىنىڭ اكىمى تە­مىربەك قاسىمجانوۆتىڭ ايتۋىنشا, جاڭا مەكتەپ شاھارداعى زاماناۋي قۇرال-جابدىقتارمەن تولىق جا­راقتاندىرىلعان الدىڭعى قاتار­لى ءبىلىم وردالارىنىڭ ساناتىندا. – بۇل مەكتەپتە ءبىلىم الاتىن وقۋ­شىلارىمىز عىلىم مەن ونەر سا­لاسىندا ۇزدىك ناتيجەلەر كورسە­تەدى جانە كەلەشەكتە ەلىمىزدى العا جەتەلەيتىن ازاماتتار بولادى دەپ سەنەمىن, – دەدى قالا اكىمى. سونداي-اق, شاھار باسشىسى جاڭا شاعىن اۋداندا ينفرا­قۇ­رىلىمدى دامىتۋ, الەۋمەتتىك نىساندار سالۋ باعىتىندا اۋقىمدى قۇرىلىس جۇمىستارى جۇرگىزىلىپ جاتقانىن اتاپ ءوتتى. الداعى ۋاقىتتا مەكتەپ اۋلاسىندا سپورت الاڭى مەن تەننيس كورتىن اشۋ جوس­پارلانىپ وتىر. جىبەك ماتالار كومبيناتى شاعىن اۋدانىنىڭ جانىنان سالىنىپ جاتقان №19 اۋدان جىل وتكەن سايىن تۇرلەنىپ, ءوسىپ كەلەدى. جاڭا اۋداننىڭ تۇرعىندار قاتارى ارتقان سايىن الەۋمەتتىك نىسانداردىڭ دا قاجەتتىلىگى تۋىنداپ وتىر. – مەكتەبىمىز 1000 ورىنعا ەسەپ­تەلىپ سالىنعان. قازىر 936 وقۋ­شىمىز بار. مەكتەپ ءبىر اۋىسىم بويىنشا جۇمىس ىستەيدى. جاڭا يننو­ۆاتسيالىق تەحنولوگيالار ەنگىزىلگەن, وقۋشىلار ءۇش تۇعىرلى ءتىل باعدارلاماسى بويىنشا وقىتى­لۋدا, – دەدى مەكتەپ ديرەكتورى گۇل­فاريدا اۋعانباەۆا. اتالعان ءبىلىم ورداسىندا ءبىر­قا­تار ۇيىرمەلەر قۇرىلىپ, تاڭداۋلى پاندەر بويىنشا تەرەڭدەتىپ وقىتۋ جولعا قويىلعان. ناۋرىزدا تۇساۋى كەسىلگەن كەلەسى نىسان – مەملەكەتتىك-جەكە ءارىپ­تەستىك باعدارلاماسى اياسىندا سا­لىنعان «ازامات» بالا­باقشا-بوبەكجايى. 120 ورىنعا لايىق­تالعان بالاباقشا كورپۋسى زامان­عا ساي جابدىقتالعان. قازىرگى كەزدە وبلىس ورتالىعىندا 1-دەن 3 جاسقا دەيىنگى بۇلدىرشىندەردى مەكتەپكە دەيىنگى مەكەمەمەن قامتۋ دەڭگەيى 93,4 پايىزدى قۇراسا, 3-تەن 6 جاسقا دەيىنگى بالالاردى بالاباقشامەن قامتۋ 99,2 پايىزعا جەتىپ وتىر. دۋمان اناش, «ەگەمەن قازاقستان». وسكەمەن.