مەملەكەت باسشىسى «نۇر وتان» پارتياسىنىڭ بيۋرو وتىرىسىنا قاتىستى

استانا. 24 ناۋرىز. ەلباسى «نۇر وتان» پارتياسى ساياسي كەڭەسى بيۋروسىنىڭ وتىرىسىنا قاتىستى. بۇل تۋرالى akorda.kz-كە سىلتەمە جاساعان egemen.kz ءتىلشىسى حابارلادى. وتىرىستا پارتيانىڭ پارلامەنت سايلاۋىنا قاتىسۋ قورىتىندىلارى تالقىلاندى, سونداي-اق, كانديداتتاردىڭ پارتيالىق ءتىزىمى بويىنشا پارلامەنت ماجىلىسىنە دەپۋتاتتىق مانداتتاردى ءبولۋ كەزەگى انىقتالدى. مەملەكەت باسشىسى سايلاۋدا «نۇر وتان» پارتياسىنا تەڭدەسسىز قولداۋ كورسەتىلگەنىن, سوندىقتان وسىنداي جوعارى سەنىمدى اقتاۋ قاجەتتىگىن اتاپ ءوتتى. قازاقستان پرەزيدەنتى سايلاۋ ۇدەرىسىن 1000-عا جۋىق بايقاۋشىلار مەن الەمنىڭ 51 ەلىنەن 150-گە تارتا بۇقارالىق اقپارات قۇرالدارىنىڭ وكىلدەرى باقىلاعانىن ايتتى. سايلاۋ اشىق, جاريا تۇردە ءوتىپ, جوعارى دەڭگەيدە ۇيىمداستىرىلدى دەپ تانىلدى. جالپى العاندا, قازاقستاندىقتار بىرلىگى مەن تۇتاستىعىن, سونداي-اق ەل دامۋىنا ۇلەس قوسۋعا ۇمتىلىسىن پاش ەتتى. مەملەكەت باسشىسى جاڭا شاقىرىلىم دەپۋتاتتارى سەنىمدى اقتاۋى ءتيىس ەكەندىگىن, ويتكەنى ولارعا ۇلت جوسپارىن ءتيىمدى جۇزەگە اسىرۋدىڭ ايرىقشا جاۋاپكەرشىلىگى جۇكتەلەتىنىن ايتتى. نۇرسۇلتان نازارباەۆ كانديداتتاردىڭ بەكىتىلگەن ءتىزىمى بارلىق تالاپتار مەن ولشەمدەرگە ساي ەكەنىنە, وڭىرلىك, الەۋمەتتىك, كاسىبي تۇرعىدان ەكشەلگەنىنە نازار اۋداردى. قازاقستان پرەزيدەنتى دەپۋتاتتاردىڭ پارلامەنتتە جەتەكشى ساياسي كۇش – «نۇر وتان» پارتياسى اتىنان وكىلدىك ەتەتىنىن اتاپ ايتتى. سونداي-اق, مەملەكەت باسشىسى پارتيانىڭ الدىنا بىرقاتار مىندەتتەر قويدى. اتاپ ايتقاندا, ۇكىمەتپەن بىرلەسىپ ۇلت جوسپارىن جانە بەس ينستيتۋتسيونالدىق رەفورمانى جۇزەگە اسىرۋ ۇدەرىسىن زاڭنامالىق تۇرعىدان قامتاماسىز ەتۋ قاجەت. سونىمەن قاتار, قازاقستاندىقتار داۋىس بەرگەن سايلاۋالدى باعدارلامانىڭ ۋاقتىلى جۇزەگە اسىرىلۋىنا اتسالىسۋ كەرەك. قازاقستان پرەزيدەنتى «نۇرلى جول» باعدارلاماسىنىڭ جۇزەگە اسىرىلۋ بارىسىنا جانە بيۋدجەت قاراجاتىنىڭ ءتيىمدى جۇمسالۋىنا پارتيالىق باقىلاۋ جاساۋ جۇمىسىن كۇشەيتۋدى تاپسىردى. مەملەكەت باسشىسى حالىقتىڭ مۇڭ-مۇقتاجىن انىقتاۋعا جانە شەشۋگە جاقتى اتسالىسۋ, سونداي-اق قازاقستان حالقى اسسامبلەياسىمەن ءوزارا تىعىز ءىس-قيمىلدى جولعا قويۋ قاجەتتىگىن اتاپ ءوتتى. وتىرىس بارىسىندا ساياسي كەڭەستىڭ بيۋرو مۇشەلەرى – پارلامەنت سەناتىنىڭ توراعاسى ق.توقاەۆ, قازاقستان حالقى اسسامبلەياسىنىڭ مۇشەسى ا.باشماكوۆ ءسوز سويلەدى. ساياسي كەڭەس بيۋروسىنىڭ جۇمىس قورىتىندىسى بويىنشا قازاقستان رەسپۋبليكاسى پارلامەنتى ءماجىلىسىنىڭ دەپۋتاتتىق مانداتتارىن ءبولۋ كەزەگىن انىقتاۋ تۋرالى قاۋلى قابىلداندى. قر پارلامەنتى ءماجىلىسىنىڭ ءVى شاقىرىلىمى دەپۋتاتتارىنىڭ تىزىمىنە «نۇر وتان» پارتياسىنان ەنگەن حالىق قالاۋلىلارىن مىنا جەردەن وقي الاسىزدار. تالعات رايىمبەك. دەرەك, سۋرەت: akorda.kz