الدىن الا قورىتىندىلارىن جاريا ەتتى

كەشە ورتالىق سايلاۋ كوميسسياسى پارتيالىق تىزىمدەر بويىنشا سايلاناتىن قازاقستان رەسپۋبليكاسى پار­لا­مەنتى ءماجىلىسىنىڭ دەپۋتاتتارىن سايلاۋدىڭ الدىن الا قورىتىن­دى­لارىن جاريالادى. ورتالىق سايلاۋ كوميس­سيا­سىنىڭ توراعاسى قۋاندىق تۇر­عانقۇلوۆ اتاپ وتكەندەي, وب­لىس­تىق, استانا جانە الماتى قالا­لارىنىڭ سايلاۋ كوميسسيالارى­نان كەلىپ تۇسكەن الدىن الا دەرەكتەرگە سايكەس, 2016 جىلعى 20 ناۋ­رىزدا بولعان پارتيالىق ءتىزىم­دەر بويىنشا سايلاناتىن قازاق­ستان رەسپۋبليكاسى پارلامەنتى ءماجىلىسىنىڭ دەپۋتاتتارىن سايلاۋدا سايلاۋشىلار داۋىسى ءتو­مەندەگىدەي ءبولىندى: «نۇر وتان» پارتياسىنا – 82,15%, قازاقستان كوممۋنيستىك حالىق پارتياسىنا – 7,14%, قازاقستاننىڭ «اق جول» دە­مو­كراتيالىق پارتياسىنا – 7,18%,  «بىرلىك» ساياسي پارتياسىنا – 0,29%, جالپىۇلتتىق سوتسيال-دە­مو­كراتيالىق پارتياسىنا – 1,18%, «اۋىل» حالىقتىق-دەموكراتيا­لىق پاتريوتتىق پارتياسىنا – 2%. «وسىلايشا, «نۇر وتان» پارتياسى الدا. ودان كەيىن قازاق­ستاننىڭ «اق جول» دەموكراتيالىق پارتياسى مەن قازاقستان كوم­مۋنيستىك حالىق پارتياسى تۇر. بۇل پارتيالار زاڭدا بەلگىلەنگەن 7%-دىق كەدەرگىدەن وتەدى, بۇل ولار­عا پارلامەنت ماجىلىسىندە بو­لۋىنا مۇمكىندىك بەرەدى», – دەدى ورتسايلاۋكوم باسشىسى ق.تۇر­عانقۇلوۆ بريفينگتە. پارتيالىق تىزىمدەر بو­يىن­­شا سايلاناتىن پارلا­مەنت ءما­جىلىسىنىڭ دەپۋتاتتارىن سايلاۋ­دىڭ سوڭعى قورىتىن­دى­لارىن ورتالىق سايلاۋ كوميسسيا­سى اۋماقتىق سايلاۋ كوميسسيالارى حاتتامالارىنىڭ نەگىزىندە 2016 جىلعى 26 ناۋرىزدان كەشىكتىرمەي بەلگىلەۋى ءتيىس. ءاليسۇلتان قۇلانباي, «ەگەمەن قازاقستان».