اقش بايقاۋشىلارىمەن كەزدەستى كەشە قازاقستان رەسپۋبليكاسىندا

سايلاۋدى بايقاۋ جونىندەگى رەسپۋبليكالىق قوعامدىق كوميسسيا (سبرقك) شتابىندا سبرقك مۇشەلەرى اقش-تان كەلگەن تاۋەلسىز بايقاۋشىلار – «Wikistrat» تالدامالىق قوعامداستىعىنىڭ ساراپشىسى ريچارد ۆەيتتس جانە «Jamestown Foundation» زەرتتەۋ ورتالىعىنىڭ اعا عىلىمي قىزمەتكەرى ۆلاديمير سوكورمەن كەزدەستى. كەزدەسۋ بارىسىندا سبرقك توراعاسى نۇرلان ەرىمبەتوۆ اقش وكىلدەرىنە وزدەرىنىڭ اتقارىپ وتىرعان قىزمەتى مەن بايقاۋشىلاردى دايارلاۋ بويىنشا قولعا الىنعان جۇمىستار, سايلاۋ ناۋقانىن ساراپتاۋدىڭ اعىمداعى ناتيجەلەرى جايلى ايتىپ بەردى. – تاۋەلسىز قوعامدىق بايقاۋدىڭ مىندەتى – سايلاۋ ۇدەرىسىنىڭ ءادىل ءوتۋىن بارىنشا قامتاماسىز ەتۋ جانە بارلىق زاڭنامالىق نورمالاردى ساقتاۋ. كوميسسيا جۇمىسىنىڭ اۋقىمى وتە كەڭ. ءبىز بارلىق سايلاۋ ۇدەرىسىنىڭ بارىسىندا ۇگىت ماتەريالدارىن جيناۋدى جانە تالداۋدى جۇرگىزىپ, اقپاراتتىق باعدارلامالارعا, ينتەرنەت جاريالانىمدارعا, مەرزىمدى باسپاسوزدەرگە ساراپتاما جاسادىق. بايقاۋشىلاردى دايىندادىق. ءاربىر قالادا, اۋداندا كوپتەگەن سەمينار-ترەنينگتەر وتكىزىلىپ, بايقاۋشىلارعا قۇقىقتارى مەن مىندەتتەرى, وكىلەتتىلىكتەرى مەن جاۋاپكەرشىلىكتەرى ءتۇسىندىرىلدى. ءبىزدىڭ ساراپتامامىزدىڭ ناتيجەلەرى تۋرالى ءسوز ەتسەك, قۇقىقتىق ورىستەن تىس شىققان دەرەكتەر بايقالعان جوق, – دەدى نۇرلان ەرىمبەتوۆ. ءوز كەزەگىندە اقش-تان كەلگەن بايقاۋشىلار ترانسپارەنتتى جانە باسەكەلى سايلاۋدى قامتاماسىز ەتۋ باعىتىندا بايقاۋ ينستيتۋتىنىڭ ماڭىزدىلىعىنا توقتالدى. ولار قازاقستانداعى وسى سايلاۋ ناۋقانىنىڭ ۇيىمداستىرىلۋىنا جانە بارىسىنا, سايلاۋدى بايقاۋ جونىندەگى رەسپۋبليكالىق قوعامدىق كوميسسيا قىزمەتىنە وڭ باعا بەردى. سونىمەن قاتار, اقش بايقاۋشىلارى سبرقك-مەن ءوزارا تۇسىنىستىكپەن بىرلەسە جۇمىس ىستەۋگە, سايلاۋدى بايقاۋ بويىنشا ورتاق ماقساتتارعا قول جەتكىزۋ ءۇشىن تاجىريبە الماسۋعا ءازىر ەكەندەرىن ءبىلدىردى. جولدىباي بازار, «ەگەمەن قازاقستان».