قوستاناي وبلىسىندا ادام ساۋداسى مەن جەڭگەتايلىق اشكەرەلەندى

قوستاناي. 17 ناۋرىز. قوستاناي وبلىسىندا جۇرگىزىلگەن «STOP ترافيك» وپەراتسياسى بارىسىندا 5 ادام ساۋداسى وقيعاسى جانە ءبىر جەڭگەتايلىقتىڭ بەتى اشىلدى. بۇل تۋرالى وبلىستىق ىشكى ىستەر دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. وپەراتيۆتىك قىزمەتكەر جاسۇلان شۇكىروۆتىڭ ايتۋىنشا, بەتى اشىلعان 5 وقيعانىڭ بارلىعى ءبىرى بىرىنە ۇقساس, قىلمىستىق كودەكستىڭ «ادام ساۋداسىن» قاراستىراتىن 128-بابىنا جاتادى. ادامداردىڭ بارلىعىن اۋىلدىق جەرلەرگە الداپ شاقىرىپ العان, ۋاقىتىلى تاماعى مەن اقىسىن تولەۋگە ۋادە بەرگەن. دەنيسوۆ اۋدانىنداعى ءىرى شارۋاشىلىقتىڭ يەسى 57, 49, جانە 37 جاستاعى ءۇش ادامنىڭ ەڭبەگىن قاناعان. الدانىپ زارداپ شەككەندەر ءۇش اي بويى تەگىن جۇمىس ىستەگەن, ولار ءبىر تيىن دا ەڭبەكاقى الماعان. كۇدىكتى ولاردى قاراپايىم, اشقۇرساق عانا تاماقتاندىرىپ وتىرعان. بۇل قىلمىسى ءۇشىن كۇدىكتىنى 3 جىلدان 5 جىلعا دەيىن باس بوستاندىعىن ايىرۋ جازاسى كۇتىپ تۇر. مۇنداي قىلمىستىڭ ءتۇرى تاران اۋدانىندا دا ورىن العان. مايسكوە سەلوسىنىڭ تۇرعىنى 23 جاستاعى جىگىتتى مال باقتىرۋعا كۇشتەپ سالعان. بۇعان دا «ادام ساۋداسى» بابى بويىنشا قىلمىستىق ءىس قوزعالدى. ارقالىق قالاسىنىڭ ىشكى ىستەر باسقارماسى قىزمەتكەرلەرى ميرنوە سەلوسى تۇرعىنىنىڭ ۇستىنەن قىلمىستىق ءىس قوزعادى. ول كورشى سەلونىڭ 52 جاستاعى تۇرعىنىن ەڭبەكاقى تولەۋگە ۋادە بەرىپ, ءوزىنىڭ ۇيىندەگى مالىنا سالعان. بىراق وتكەن جىلدىڭ جەلتوقسان ايىنان بەرى وعان اقىسىن بەرمەي, ەڭبەگىن تەگىن پايدالانعان. قوستاناي قالاسىنداعى ءبىر مونشانىڭ 53 جاستاعى اكىمشىلىك قىزمەتكەرى 14 مىڭ تەڭگە اقشا ءۇشىن 21 جاستاعى جىگىتكە 20 جانە 27 جاستاعى ەكى قىزدى توسەك قىزمەتىن كورسەتۋگە ۇسىنعان. قازىر اكىمشىلىك قىزمەتكەردىڭ ۇستىنەن قىلمىستىق كودەكستىڭ 309-بابىنىڭ 1 ءبولىمى بويىنشا «جەڭگەتايلىق» ءۇشىن قىلمىستىق ءىس قوزعالدى. ءنازيرا جارىمبەتوۆا. دەرەك: egemen.kz. سۋرەت: azattyq.org.