الماتى قالاسىنىڭ اكىمى شاھارداعى بىرقاتار نىسانداردى ارالادى

الماتى. 17 ناۋرىز. قالا اكىمى باۋىرجان بايبەك اۋماقتاعى جول-كولىك قاتىناستارىنا قاتىستى ينفراقۇرىلىمداردى ارالادى. مۇنىڭ الداعى جىلدا بولاتىن قىسقى ۋنيۆەرسيادا قارساڭىندا قالا «قاقپالارىنىڭ» دايىندىعىن تەكسەرۋ دەپ مالىمدەدى. بۇل تۋرالى قالا اكىمدىگىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. «پرەزيدەنتتىڭ ايتقان تاپسىرماسىنا سايكەس الەمدىك ماڭىزدى سپورتتىق شارا كەزىندە, قالانىڭ نەگىزى «قاقپالارىندا» – اۋەجاي, اۆتو جانە تەمىرجول بەكەتتەرىندە قاۋىپسىزدىك پەن ىڭعايلىلىق ءارى حالىقارالىق تالاپتارعا ساي سەرۆيستىك قىزمەت بولۋى ءتيىس» – دەدى قالا باسشىسى. الدىمەن قالاارالىق «سايران» اۆتو بەكەتىنە بارعان اكىم ودان سوڭ الماتى حالىقارالىق اۋەجايى مەن تۇركسىب اۋدانىنداعى №1 تەمىرجول بەكەتىندە بولدى. قالا باسشىسى تۇركسىب اۋدانىنداعى جۇرتشىلىق وكىلدەرىمەن كەزدەسۋى بارىسىندا الماتىدا ازاماتتاردىڭ لايىقتى ءومىر ءسۇرۋ ءۇشىن بارىنشا جاعداي جاسالىپ جاتقانىن, «ەسكى باسپانا» باعدارلاماسىنا سايكەس ەسكى ۇيلەر ءسۇرىلىپ, جاڭا عيماراتتار – مەكتەپ, سپورت سارايلارى اشىلعانىن اتاپ ءوتتى. تالعات ءسۇيىنباي. دەرەك, سۋرەت: الماتى قالاسى اكىمدىگىنىڭ ءباسپاسوز قىزمەتى.