«ۆكونتاكتە» جەلىسىندە قىلمىسكەرلەردى ىزدەيتىن ارنايى پاراقشا اشىلدى

الماتى. 17 ناۋرىز. قالالىق ىشكى ىستەر دەپارتامەنتى بەلگىلى «ۆكونتاكتە» الەۋمەتتىك جەلىسىندە ءىز-ءتۇسسىز جوعالعاندار مەن ءىزىن جاسىرعان قاۋىپتى قىلمىسكەرلەردى ىزدەستىرەتىن ارنايى عالامتور پاراقشاسىن اشتى. قازىر وندا بۇگىنگە دەيىن ىزدەۋدە جۇرگەن 14 ادامنىڭ اتى-ءجونى مەن سۋرەتى جاريالاندى. بۇل تۋرالى الماتى قالاسى ىشكى ىستەر دەپارتامەنتىنىڭ ءباسپاسوز ورتالىعىنا سىلتەمە جاساعان egemen.kz ءتىلشىسى حابارلادى. «قازاقستان رەسپۋبليكاسى ىشكى ىستەر مينيسترلىگىنىڭ رەسمي سايتىندا مۇنداي «ىزدەستىرۋ» («روزىسك») اڭداتپاسى بۇعان دەيىن دە بولعان ءارى ول كريمينالدى پوليتسيا كوميتەتىنىڭ كۇشىمەن اركەز جاڭالانىپ تۇرادى. پاراقشادا ءىز-ءتۇسسىز جوعالعان ازاماتتىڭ نەمەسە ىزدەۋدەگى قىلمىسكەردىڭ سۋرەتى مەن ونىڭ قاي كەزدە, قاي جەردە, قالاي جوعالعانى نەمەسە ءىزىن جاسىرعانى تۋرالى ناقتى دەرەكتەر تىزبەسى جاسالىنادى. وسىعان وراي قالا ازاماتتارى بولعان وقيعالارعا بايلانىستى بىزگە دەر كەزىندە جەلى ارقىلى تەز ارادا حابار بەرىپ تۇرادى دەگەن ۇمىتتەمىز.», – دەيدى قالالىق ىشكى ىستەر دەپارتامەنتىنىڭ رەسمي وكىلى, پوليتسيا مايورى سالتانات ازىربەك. تالعات ءسۇيىنباي. دەرەك, سۋرەت: الماتى قالاسى ىشكى ىستەر دەپارتامەنتىنىڭ ءباسپاسوز ورتالىعى.