ەلباسى پاۆلودارداعى «B.B.NURA» مەديتسينالىق ورتالىعىندا بولدى

استانا. 16 ناۋرىز. مەملەكەت باسشىسى پاۆلودار وبلىسىنا جاساعان جۇمىس ساپارى بارىسىندا «B.B.NURA» جشس نەفرولوگيا جانە ەففەرەنتتى تەراپيا ورتالىعىندا بولدى. بۇل تۋرالى akorda.kz حابارلادى. مەملەكەت باسشىسى مەديتسينالىق پالاتالاردى ارالاپ, ورتالىق قىزمەتىنىڭ نەگىزگى باعىتتارىمەن تانىستى. سونىمەن قاتار قازاقستان پرەزيدەنتى ەڭبەك ۇجىمى وكىلدەرىمەن جانە وبلىستىڭ مەديتسينا قىزمەتكەرلەرىمەن اڭگىمەلەستى. نۇرسۇلتان نازارباەۆ حالىقتىڭ تۇرمىسىن جاقسارتۋ ءۇشىن دەنساۋلىق ساقتاۋ سالاسىن دامىتۋدىڭ ماڭىزدىلىعىنا توقتالدى. «وتكەن جىلدار ىشىندە قازاقستاندا 1300 دەنساۋلىق ساقتاۋ نىسانى سالىندى. سونىڭ ارقاسىندا 10 جىلدا ءومىر ءسۇرۋ ۇزاقتىعى 72 جاسقا دەيىن ۇزاردى. داعدارىسقا قاراماستان, 1 قاڭتاردان باستاپ ءبىز مەديتسينا قىزمەتكەرلەرىنىڭ ەڭبەكاقىسىن 28 پايىزعا كوتەردىك. بۇل ورتالىقتىڭ مەملەكەت-جەكەمەنشىك سەرىكتەستىگى ارقىلى سالىنعانى وتە ماڭىزدى, مەن بۇل باعىتتى قولدايمىن. جۇمىسقا قاجەتتى جاعداي جاسالۋدا, ال دارىگەرلەر ەلدىڭ يگىلىگىنە قىزمەت ەتۋ ءۇشىن ءوز بىلىكتىلىكتەرىن ارتتىرۋى ءتيىس», – دەدى مەملەكەت باسشىسى. مەكەمە قىزمەتكەرلەرى دەنساۋلىق ساقتاۋ سالاسىن دامىتۋعا كوڭىل ءبولىپ وتىرعانى ءۇشىن نۇرسۇلتان نازارباەۆقا العىس ايتتى, سونداي-اق, تاياۋ ۋاقىتتارى قازاقستان پرەزيدەنتىنىڭ تاپسىرماسىمەن سالىنعان جاڭا پەريناتالدىق ورتالىقتىڭ اشىلۋى جوسپارلانىپ وتىرعانىن حابارلادى. سوڭىندا نۇرسۇلتان نازارباەۆ جينالعاندارعا تابىس پەن باق-بەرەكە تىلەدى. مەديتسينالىق مەكەمە ەلدەگى 25 اپپاراتى بار ءىرى دياليزدىك ورتالىق بولىپ سانالادى جانە بۇيرەك قىزمەتىنىڭ جەتكىلىكسىزدىگىنەن زارداپ شەگىپ وتىرعان ناۋقاستارعا تولىق نەفرولوگيالىق كومەك كورسەتۋگە مامانداندىرىلعان. ەلامان قوڭىر. دەرەك, سۋرەت: akorda.kz.