اقتوبەدە قىزدارعا ارنالعان قازاق-تۇرىك ليتسەيى اشىلادى

اقتوبە. 16 ناۋرىز. اقتوبەدە قىزدارعا ارنالعان قازاق-تۇرىك ليتسەيى اشىلادى. اتالعان جايت وبلىس اكىمى بەردىبەك ساپارباەۆتىڭ KATEV حالىقارالىق قوعامدىق قورىنىڭ باس ديرەكتورى مەحمەت مەسۋت اتامەن بولعان كەزدەسۋىندە بەلگىلى بولدى. بۇل تۋرالى egemen.kz ءتىلشىسى حابارلادى. جالپى KATEV حالىقارالىق قوعامدىق قورى ءبىلىم بەرۋ مەكەمەلەرى جۇمىسىن ۇيلەستىرۋ ماقساتىندا قازاقستان مەن تۇركيا اراسىنداعى كەلىسىم نەگىزىندە قۇرىلعان بولاتىن. قازىرگى تاڭدا قازاقستاندا 29 قازاق-تۇرىك ليتسەيى جۇمىس ىستەيدى. كەزدەسۋ بارىسىندا ءوڭىر باسشىسى قازاق-تۇرىك ليتسەيلەرى وقۋشىلارعا ولاردىڭ الەۋەتىن اشا وتىرىپ, ساپالى ءبىلىم بەرۋدە ەكەنىن اتاپ ءوتتى. ول مەملەكەت باسشىسى نۇرسۇلتان نازارباەۆتىڭ ءوزى تاياۋدا اقتوبەگە ساپارى بارىسىندا نازارباەۆ زياتكەرلىك مەكتەبى مەن قتل ەلىمىزدەگى مىقتى مەكتەپتەر ەكەنىن مالىمدەگەنىن جەتكىزدى. اقتوبەدەگى قازاق-تۇرىك ليتسەيىندە 200-دەن استام بالا ءبىلىم الۋدا. ءوز كەزەگىندە قىز بالالارعا ارنالعان مۇنداي وقۋ ورنى جوق. مەحمەت مەسۋت اتا بۇل ولقىلىقتىڭ ورنىن تولتىرۋ ماقساتىندا وبلىس اكىمىنەن بوس تۇرعان عيماراتتاردىڭ ءبىرىن قىز بالالارعا ارنالعان ليتسەي ءۇشىن بەرۋىن سۇرادى. ايماق باسشىسى وبلىس ورتالىعىندا قىز بالالار ليتسەيىنە ىڭعايلى عيماراتتىڭ جوق ەكەندىگىن, الايدا بۇل ماسەلەنى شەشۋ ءۇشىن مەملەكەتتىك-جەكەمەنشىك سەرىكتەستىك تەتىگىن پايدالانۋ مۇمكىندىگىن جەتكىزدى. KATEV حالىقارالىق قوعامدىق قورىنىڭ باس ديرەكتورىنا بۇل ماسەلەنى جاڭا قتل عيماراتى قۇرىلىسىن بىرلەسىپ جۇرگىزۋ ارقىلى شەشۋ مۇمكىندىگى ايتىلدى. بۇل رەتتە جەرگىلىكتى بيلىك جەر تەلىمىن بەرۋ, ينفراقۇرىلىم جۇرگىزۋ جانە قۇرىلىستى ءىشىنارا قارجىلاندىرۋدى ءوز مىندەتىنە الۋعا دايىن ەكىندىگىن ءبىلدىردى. ساتىبالدى ءساۋىرباي. دەرەك: egemen.kz. سۋرەت: vk.com.