ورالدا ناۋرىز ايىنىڭ ورتاسىندا جويقىن بوران سوقتى

ورال. 16 ناۋرىز. ورالدا ناۋرىز ايىنىڭ ورتاسىندا جويقىن بوران سوقتى. بۇل تۋرالى egemen.kz ءتىلشىسى حابارلادى. ناۋرىز ايى ورتاڭ بەلىنەن اسقان كەزدە باتىسقازاقستاندىقتار اياق استىنان كوزدى اشتىرمايتىن اقتۇتەك بوران سوعادى دەپ ويلاماعان ەدى. ىشقىنا سوققان جەلدىڭ ەكپىنى دە اتان تۇيەنى جىعارداي تىم قاتتى بولدى. ۇيىتقي سوققان جەلمەن جارىسىپ جاۋعان قار ورال ءوڭىرىنىڭ قالاسىن دا, دالاسىن دا ءبىر دەمدە اق كورپەگە ورادى دا تاستادى. بوران كەزىندەگى جويقىن جەلدىڭ اسەرىنەن ورال قالاسىندا جانە وبلىستىڭ بىرقاتار جەرىندە ەلەكتر جەلىلەرى ءۇزىلىپ, كوشە بويلارىنداعى بيلبوردتاردىڭ ماتا تەكتەس ماتەريالدارى بىت-شىت بولىپ جىرتىلىپ جاتتى. 15 ناۋرىز كۇنى كەشكى ساعات 21:00-ءدىڭ شاماسىندا باستالعان بوران تاڭ اتا ءبىر-اق سايابىرلادى. ادەتتە توتەنشەلىكتەر قاتتى بوراننىڭ بولاتىنىن, جەلدىڭ جىلدامدىعى كۇشەيەتىنىن الدىن الا حابارلاۋشى ەدى. ءسىرا, اتالعان قىزمەت وكىلدەرى مەن اۋا رايىن انىقتاۋشىلار بۇل جولى كۇتپەگەن جەردەن, وتكەن قىس ايلارىنىڭ وزىندە بولماعان بوراننىڭ باستالىپ كەتەتىنىن بولجاي الماي قالعان سەكىلدى, دەيدى ورال قالاسىنىڭ تۇرعىندارى. شالعايداعى قازتالوۆ جانە بوكەي ورداسى اۋداندارىنان جەتكەن حابارلارعا قاراعاندا, الاعاي دا بىلاعاي قاتتى جەل, بوران كەزىندە كوكتەن تۇسكەن قاردى ۇرلەپ, ۇپتەپ, ەلدى مەكەندەردىڭ ىرگەسىنە تىقسىرىپ, ءۇيىپ تاستاعان. قاردىڭ ۇيلەر مەن اكىمشىلىك عيماراتتاردىڭ ەسىك, تەرەزەلەرىن باسىپ قالعانى سونشالىق,تاڭەرتەڭ سىرتقا شىعاتىن ەسىكتەردى اشۋدىڭ ءوزى قيىنعا تۇسكەن. ال ىشىنە ەمەس, سىرتقا قاراي اشىلاتىن ەسىكتەردى اشۋ ءتىپتى مۇمكىن بولمادى, دەپ حابارلادى قازتالوۆ اۋدانىنداعى ارىپتەسىمىز سەرىك جۇماعاليەۆ. مىنە, ءسويتىپ, كەشەگى كۇنى ناۋرىزدىڭ اقشاقارى اقجايىق اتىرابىن بەلۋاردان كەلەتىن اق كورپەگە ورادى دا تاستادى. 14 ناۋرىز كۇنى رەسپۋبليكانىڭ باتىس وڭىرىندە كورىسۋ ايت مەرەكەسى باستالىپ, ناۋرىز كەلدى, كوكتەم كەلدى, دەپ ەل-جۇرت قۋانىسىپ جۇرگەندە, بەينە ءبىر قىس مەزگىلى قايتا كەلگەندەي كورىنىس ورىن الدى. دەگەنمەن, كەشە بوراننىڭ بەتى قايتىپ, كۇن قايتادان جىلىنىپ, قار ەري باستادى. قالاي بولعاندا دا ىلعالدىڭ مول تۇسكەنى جاقسى. كوكتەمدە ىلعالدىڭ مول بولۋى بولاشاق ىرىس كوزى. ءارى بۇل قۇبىلىس جىلدىڭ جاقسى بولاتىنىنىڭ ءبىر حابارشىسى, دەپ جاتتى وڭىردەگى كونەكوز قاريالار. تەمىر قۇسايىن. دەرەك: egemen.kz. سۋرەت: stranamam.ru.