الماتى. 16 ناۋرىز. بۇگىن الماتى قالاسىنداعى عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا ەرمەك امانشاەۆتىڭ «ۇزىلگەن بەسىك جىرى» پسيحولوگيالىق دراماسى جەلىسىمەن قويىلعان «ول» مونوسپەكتاكلىنىڭ تۇساۋكەسەرى وتەدى. بۇل تۋرالى عابيت مۇسىرەپوۆ اتىنداعى تەاتردىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
قويىلىمنىڭ كوركەمدىك-يدەيالىق ماقساتى – قازىرگى الەۋمەتتىك قوعامعا ساي سانالى ۇرپاق, ساليقالى تۇلعا قالىپتاستىرۋ. بۇل سپەكتاكلدىڭ كورەرمەنگە رۋحاني ازىق بەرۋدە ماڭىزى زور بولادى دەپ كۇتىلەدى.
رەجيسسەر ەرلان كارىباەۆتىڭ تراكتوۆكاسى بويىنشا جەكە ادامنىڭ تاعدىرى ارقىلى بۇگىنگى ومىردەگى الەۋمەتتىك قايشىلىقتى كورسەتەدى. باستى رولدەگى اكتەر دانيار بازارقۇلوۆ. كەيىپكەردىڭ ومىردەن ءوز ورنىن ىزدەگەن فيلوسوفيالىق تولعانىسىن, شىنايى شىندىقتىڭ قۇپياسىن جان-جاقتى قاراستىرۋعا ۇمتىلعان ىشتەي تارتىسى كىمدى بولماسىن ويلاندىرارى انىق.
قازىر اتالعان تەاتردىڭ بەلدى اكتەرلەرىنىڭ بىرىنە اينالعان دانيار بازارقۇوۆ ورال قالاسىنداعى قازاق دراما تەاترىنان الماتىعا اۋىسقانىنا جەتى جىلدان استى.
اكتەردىڭ وسى تەاترداعى «قارا شەكپەن» سپەكتاكلىندەگى تۇزارى – باستى رولدەرىنىڭ ءبىرى بولسا, 23 جاسىندا رومەو مەن كاليگۋلانى ويناۋعا قول جەتكىزگەن دارىن يەسىنىڭ شىعارماشىلىق قورجىنىندا ۇلكەندى-كىشىلى 45 ءرول بار. وتاندىق كينەماتوگرافيادا دا ءىزى باستالدى. ال فيزيولوگيالىق تۇرعىدان دا, پسيحولوگيالىق جاعىنان اۋىر تۇزاردى ول ءوز دەڭگەيىنە جەتكىزە ويناپ جۇرگەن تالانت يەسى.
اقپارات پەن تەحنيكا قۇرالدارىنىڭ دامىعان زامانىندا ادام جانىنىڭ قۇنسىزدانۋى قازىرگى كەزدە باستى ماسەلەگە اينالىپ وتىر. «ول» منوسپەكتاكلى وسى تۋرالى.
ايناش ەسالي.
دەرەك, سۋرەت: عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ ءباسپاسوز قىزمەتى.
