انتقا ادال ازامات

اسقار سول كۇنى جۇمىستان كەشتەۋ شىعىپ, ۇيىنە قاراي اسىقتى. ءوزىن تاعاتسىزدانا كۇتىپ وتىرعان جان جارى سانياعا, ۇلى ساكەنگە, ءۇش ايلىق قىزى سابيناعا جەتكەنشە جانى تىنىش تاپپايدى. جەڭىل كولىك قويۋ قاراڭعىلىقتى قاق جارىپ, قالادان شەتكەرىلەۋ جەردەگى كۇرە جولدان بۇرىلا بەرگەنى سول ەدى, جەر-دۇنيەنى سولق ەتكىزگەندەي الاپات گۇرسىل ونى ەرىكسىز جالت قاراتتى. ءورت ءسوندىرۋ سالاسىنىڭ كانىگى مامانى قاراما-قارسى كەلگەن شەتەلدىك ماشينالاردىڭ ءبىر-بىرىمەن سوقتىعىسىپ, قاتتى سوققىنىڭ سالدارىنان ءبىرىنىڭ جول جيەگىنە قاراي توڭكەرىلىپ تۇسكەنىن قاس-قاعىم ساتتە اڭعارىپ, كولىگىن توقتاتا سالىسىمەن جەدەل كومەككە ۇمتىلدى. اۋدارىلىپ جاتقان «BMW» كولىگىندە جولاۋشىلاردىڭ قيمىلسىز سۇلبالارىن بىردەن بايقادى. ەشقايسىسى قوزعا­لار ەمەس. شاماسى, اۋىر جاراقات الىپ, بولماسا وقىس وقيعادان ەسەڭگىرەپ قالسا كەرەك. اسكەري تارتىپپەن جەدەل قيمىلداپ, الدىمەن الدىڭعى ورىندىقتا ەس-ءتۇسسىز جاتقان ايەلدى قۇتقارۋعا كىرىستى. وسى كەزدە قاۋىپسىزدىك جاستىعىنا قىستىرىلىپ, اجال تىرناعىنان امان قالعان جۇرگىزۋشى دە قول­ۇشىن بەرىپ, ەكەۋلەپ ونى قاۋىپسىز جەرگە شىعاردى. ايەل تازا اۋامەن كەۋدە كەرە تىنىستاپ, كوزىن اشقاندا بۇلار قۋانىپ كەتتى. ءابجىل قيمىلمەن قالعان جولاۋ­شىلاردى دا ءبىر-بىرلەپ الىپ شىق­قاننان كەيىن, دارىگەرلەر مەن پوليتسيا قىزمەتىنە حابار بەردى. ولار جەتكەنشە زارداپ شەككەندەرگە مەديتسينالىق, پسيحولوگيالىق كومەك كورسەتۋمەن اينالىستى. كەيىن كولىك يەلەرىنىڭ ءبىرى اراق ءىشىپ الىپ, كولىك رولىنە وتىرعانىن ەستىگەندە زىعىردانى قاينادى. ازاماتتىق قورعانىس مايورى اسقار ىسماعۇلوۆتىڭ جول-كولىك اپاتى كەزىندە باسقاشا قيمىل تانىتۋى مۇمكىن ەمەس ەدى. ول بۇل ارەكەتىن ۇلكەن ەرلىككە باعا­لامايدى. بەيبىت كەزەڭدە كەز­دەسەتىن قالىپتى, ۇيرەنشىكتى ۇردىسكە سانايدى. قيىن جاعدايعا تاپ بولعان ادامعا كەز كەلگەن قازاقستاندىقتىڭ قور­عان بولارىنا بەك سەنىمدى. ارىپتەستەرى ال­دىندا ۇلكەن بەدەلگە يە ونىڭ ادامگەرشىلىك, يماندىلىق قاسيەت­تەرى وزگەلەرگە ۇلگى. كوكشەتاۋ تەح­نيكالىق ينستيتۋتىن بىتىرگەلى ءبىر سالادا جەمىستى ەڭبەك ەتىپ كەلەدى. جەكە باسىنىڭ جاۋاپكەرشىلىگىن, ءىسىنىڭ ورنىقتىلىعىن باسشىلىق باعالاپ, وبلىستىق «ءورت ءسوندىرۋ جانە اپاتتىق قۇتقارۋ جۇمىستارى قىزمەتى» مەملەكەتتىك مەكەمەسىنىڭ كادرلار جۇمىسى ءبولىمىنىڭ جەتەك­شىسى ەتىپ بەكىتتى. وسىدان ەكى جىل بۇرىن باس مامان بولىپ جۇرگەندە مينيسترلىك جاريالاعان بايقاۋدا ۇزدىكتەر قاتارىنان كورىنگەن. باسقا دا ماراپاتتارى جەتەرلىك. قاراۋىل باستىعى قىزمەتىندە دە «ءتىلسىز جاۋمەن» تالاي رەت بەتپە-بەت ۇشىراسىپ, ادامدار ومىرىنە سان مارتە اراشا تۇرعان. قايدا جۇرسە دە, بىلىكتىلىك, بىلىمدىلىك كورسەتۋ, ادامدار ومىرىنە قاۋىپ تۋىنداعاندا ەرلىكتى ەمەس, ازاماتتىق پارىزدى ءبىرىنشى ورىنعا قويۋ, وزىنە جۇكتەلگەن سەنىمدى اقتاۋ ونىڭ ومىرلىك قاعيداسىنا اينالعان. سول كۇنى جۇمىستان كەش ورال­عانىنا ەش وكىنبەيدى. بەكەرگە ءومىر سۇرمەگەنىن, ادامدار الدىنداعى ءبىر مىندەتى ورىندالعانىن ءتۇسىندى. انتقا ادالدىق, بەرگەن ۋادەگە بەرىكتىك ەل مۇددەسىن جوعارى قوي­عان ازاماتقا ءتان بولسا كەرەك. ءومىر ەسقالي, «ەگەمەن قازاقستان». سولتۇستىك قازاقستان وبلىسى. سۋرەتتى تۇسىرگەن تالعات تانىباەۆ.