مەملەكەت مۇراتى – «ماڭگىلىك ەل»

سۇلتانماحمۇت تورايعىروۆ ايتادى عوي: «الاش تۋى استىندا – كۇن سونگەنشە, سونبەيمىز», دەپ. بۇگىنگى ءبىزدىڭ مۇرات تا سول. تاۋەلسىزدىك تۋىن جەلبىرەتكەن قازاقستاندى ەشكىمنىڭ كوز الارتۋىنا ۇشىراتپاي, مەملەكەتتىلىگىن ماڭگىلىككە جالعاستىرۋ. ەلباسى نۇرسۇلتان نازارباەۆتىڭ جۇرت الدىندا «قازاق ەلىنىڭ ۇلتتىق يدەياسى – ماڭگىلىك ەل» دەپ ۇسىنۋى دا وسى ماقساتتىڭ شەڭبەرىندە جاتىر. وسىعان سايكەس, الەمدەگى دامىعان مەملەكەتتەردىڭ ۇزدىك وتىزدىعىنا كىرۋ جوسپارلانىپ, سول جولعا باستايتىن «100 ناقتى قادام» جاساقتالىپ, تاعدىرشەشتى كەزەڭنەن امان الىپ شىعاتىن 5 ينستيتۋتتىق رەفورما ۇسىنىلدى. بۇگىندە بۇل ماقسات-مۇراتتاردى ىسكە اسىرۋ ەل كولەمىندە ىسكە اسىپ جاتىر. بيىل تاۋەلسىزدىك تاڭىنىڭ ات­قانىنا شيرەك عاسىر تولادى. وسىعان وراي, ەلباسىنىڭ «ماڭگىلىك ەل» يدەياسىمەن قۋاتتانعان, «100 ناقتى قادام» ۇلت جوسپارىن دارىپتەگەن رەسپۋبليكالىق «ماڭگىلىك ەل» الەۋمەتتىك اكتسياسىنىڭ توپ مۇشەلەرى سەنبى كۇنى سىر ەلىنە كەلدى. وڭىرگە تابان تىرەگەن «ماڭگىلىك ەل» پويىزىنىڭ توپ قۇرامىن وبلىس اكىمىنىڭ ورىنباسارى عالىمجان امىرەەۆ باستاعان سىربويىلىقتار بارشا ءسان-سالتاناتىمەن قارسى الدى. تەمىرجول ۆوكزالىندا وبلىس اكىمىنىڭ ورىنباسارى ع.امىرەەۆ دەلەگاتسيا مۇشەلەرىنە ساتتىلىك تىلەپ, «ماڭگىلىك ەل» جولىنداعى دامۋىمىزدىڭ جەدەل, كەلەشەگىمىزدىڭ كەمەل بولۋىنا تىلەكتەستىگىن ءبىلدىردى. ال توپ جەتەكشىسى ءامىرجان الپەيىسوۆ باستاعان قۇرام مۇشەلەرى قالا تۇرعىندارىنا شارانىڭ ءمان-ماعىناسى مەن ماڭىزىن ءتۇسىندىرىپ بەردى. تەمىرجول ۆوكزالىندا وتكەن كەزدەسۋدەن سوڭ توپ مۇشەلەرى اسقار توقماعامبەتوۆ اتىنداعى قالالىق مادەنيەت ۇيىندە مەملەكەتتىك قىزمەتكەرلەر, ءتۇرلى سالا وكىلدەرى مەن قالا تۇرعىندارى جانە جاستارمەن كەزدەستى. جيىن بارىسىندا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى ءارى توپ جەتەكشىسى ءامىرجان الپەيىسوۆ سىر ەلىنىڭ وتكەنى مەن بۇگىنگىسىنە توقتالىپ, تاريحي تۇلعالارىنا قاتىستى تاعىلىمدى ويلارىمەن ءبولىستى. – ەلىمىزدىڭ ەگەمەندىك الۋى – حال­قى­مىزدىڭ تاريحىندا جاڭا ءداۋىر­دىڭ بەتىن اشتى, بۇكىل قوعامدىق ومىرىمىزگە جاڭا لەپ, سونى سەرپىن اكەلدى. قازىر اتا-بابا­لارىمىزدىڭ, ەل باقىتىن اڭساعان ارماندارى ورىندالدى. بارشا­مىز بەيبىت ومىردە, ەركىندىكتى اڭساعان اق نيەت, اق تىلەۋمەن ءوزىمىز تىككەن ورتاق شاڭىراعىمىزدىڭ باعى مەن ءسانى ءۇشىن قىزمەت جاساۋدا­مىز. ەلباسى نۇرسۇلتان نازارباەۆ بيىل جاريالاعان «ۇلت جوس­پارى – قازاقستاندىق ارمانعا باس­تايتىن جول» اتتى باعدارلا­مالىق ماقالاسىندا «اتا-بابا­لارى­مىزدىڭ كوپتەگەن ۇرپاقتارى ءۇشىن قازاقستاننىڭ تاۋەلسىزدىگى اسىل ارمان بولىپ كەلدى. ءبىز ولاردىڭ ازات جانە تاۋەلسىز وتاندى اڭساعان كوپ عاسىرلىق قيالدارىن ءىس جۇزىنە اسىردىق» دەپ اتاپ كورسەتكەن ەدى. ءبىز وسى جولدان تانباي, دامۋعا ۇمتىلعان, ۇزدىك وتىزدىقتىڭ ىشىنەن ويىپ ورىن الۋعا, «ماڭگىلىك ەل» جولىنداعى جارقىن ىسىمىزبەن كۇللى الەمدى تاڭ قالدىرىپ, ۇدايى العا ۇمتىلۋىمىز قاجەت!– دەدى ءا.الپەيىسوۆ. عالىمنىڭ ويلى اڭگىمەلەرىنەن سوڭ ەلباسىنىڭ «ماڭگىلىك ەل» يدەيا­سى, «قازاقستان جاڭا جاhاندىق احۋالدا: ءوسىم, رەفورمالار, دامۋ» اتتى قازاقستان حالقىنا جولداۋى, «100 ناقتى قادام» ۇلت جوسپارىنداعى العا قويىلعان باس­تى مىندەتتەر مەن ماقساتتار جايىندا استانا قالالىق «قوعامدىق كەلىسىم ورتالىعىنىڭ» ديرەكتورى تالعات جاقيانوۆ جان-جاقتى ايتىپ بەردى. تالعات جاردەم ۇلى قازاقستان حالقى اسسامبلەياسىنىڭ نەگىزگى جۇمىستارىنا توقتالىپ, الەمدە بالاماسى جوق بىردەن-ءبىر ساياسي ينستيتۋتتىڭ ەرەكشەلىكتەرى جونىندە ءسوز قوزعاپ, بىرتەكتىلىك پەن بىرلىك بەرەكەنىڭ باستاۋى, وتانشىلدىق تاۋەلسىزدىكتىڭ باستى تىرەگى ەكەنىنە توقتالدى. – ەلباسى ەلىمىزدىڭ بىرتۇتاستىعى مەن بىرلىگى جايىندا ۇنەمى ايتىپ كەلەدى. بۇگىنگىدەي بەيبىت ءومىردىڭ قالىپتاسۋى – مەملەكەت باسشىسى ۇستانعان ساياسات پەن حالىقتىڭ بولاشاققا دەگەن سەنىمىنىڭ ارقاسى. تاتۋلىق بار جەردە كيكىلجىڭنىڭ بولۋى ەكىتالاي, مۇنى ۋاقىتتىڭ ءوزى دالەلدەدى. ەندىگى جەردە ۇلتقا, دىنگە, تۇرگە بولىنبەي, قازاقستاندىقتار بولىپ بەيبىتشىلىك پەن بىرلىكتىڭ ءناتي­جەسىندە وزىق وتىز ەلدىڭ قاتارىنا ەنۋ جولىنداعى ورتاق ماقساتقا جۇمىلۋىمىز قاجەت,– دەدى ول. شارا اياسىندا قاتىسۋشىلار ەل دامۋى مەن بىرلىگى باعىتىندا سۇراق­تار قويىپ, تۇشىمدى جاۋاپ­تارعا قانىقتى. كەزدەسۋدەن سوڭ توپتاعى ءار سالانىڭ ماماندارى جوسپارعا سايكەس ءبولىنىپ, وبلىس تۇرعىندارىنا كاسىبي تۇرعىدا كەڭەستەر بەرىپ, جۇمىستارىن جالعاستىردى. ەرجان بايتىلەس, «ەگەمەن قازاقستان». قىزىلوردا وبلىسى.