قايراتىنا مىنگەن «قايرات»

بۇرناعى كۇنى فۋتبولدان ەلىمىزدىڭ قازىرگى چەمپيونى «استانا» كومانداسى مەن قازاقستان كۋبوگىنىڭ يەگەرى الماتىنىڭ «قايراتى» قازاقستان سۋپەركۋبوگى ءۇشىن سىنعا ءتۇستى. «استانا ارەنا» ستاديونىندا وتكەن ماتچتا جەڭىمپاز ويىن سوڭىنداعى پەنالتيدە انىقتالدى. بۇل سىندا الماتىلىقتار 5:4 ەسە­بىمەن جەڭىسكە جەتىپ, سۋپەركۋبوكتى يەمدەندى. كەزدەسۋدىڭ العاشقى مينۋتتارىنان باستاپ باسىمدىققا يە بولعان «استانا» ويىنشىلارى ءبىرىنشى تايمدا بىرنەشە جويقىن شابۋىل ۇيىمداستىردى. ءتىپتى, 20-مينۋتتا كوماندا كاپيتانى تاڭات نوسەرباەۆ ەكى قورعاۋشىنىڭ ورتاسىنان سىتىلىپ شىعىپ, سوققى جاساعانىمەن, دوپ قاقپا باعانىنان كەيىن سەرپىلدى. ءوز كەزەگىندە «قايرات» فۋتبولشىلارى دا قارىمتا شابۋىلدارعا شىعىپ, قارسىلاستار قاقپاسىن نىساناعا الىپ كوردى. الايدا, ءۇزى­لىسكە دەيىن ەسەپ اشىلعان جوق. ەكىنشى تايمدا دا كوماندالاردا ەسەپ اشاتىن تاماشا مۇمكىندىكتەر بولدى. اسىرەسە, ستانيمير ستوي­لوۆتىڭ شاكىرتتەرى بەلسەندى قي­مىلداپ, بىرنەشە قاۋىپتى سوق­قىلار جاسادى. دەگەن­مەن, 90 مينۋت ءتۇ­گەسىلگەنگە دەيىن گول سوعىلمادى. ودان كەيىنگى قوسىمشا ەكى تايم دا گولسىز ءوتتى. ال ويىن سوڭىنداعى پەنالتيدە «قايراتتىڭ» جولى بولدى. وسىلايشا, الماتىلىقتار جا­­ڭا باس جاتتىقتىرۋشى الەك­ساندر بوروديۋكتىڭ جەتەكشىلىگىمەن ال­عاشقى جۇلدەلەرىنە قول جەتكىزدى. سونداي-اق, بۇل كلۋب تاريحىنداعى العاشقى سۋپەركۋبوك ەكەنىن اتاپ وتكەن ءجون. ايتا كەتەيىك, بىلتىر دا قوس كوماندا قازاقستان سۋپەركۋبوگى ءۇشىن تالاسقان. ول كەزدە دە جەڭىم­پاز پەنالتي ارقىلى انىقتالىپ, «اس­تانانىڭ» مەرەيى ۇستەم بولعان. تاعى ءبىر ەسكەرە كەتەتىن جايت, وسى ويىنمەن فۋتبولدان ەلىمىزدىڭ 2016 جىلعى جاڭا ماۋسىمى باس­تالدى. ەندى 12-13 ناۋرىز كۇنى قا­زاقستان پرەمەر-ليگاسىنىڭ ءبىرىنشى تۋرىنىڭ ويىندارى وينالادى. ەلامان قوڭىر, «ەگەمەن قازاقستان».