انگليادا جانكۇيەر ەرمەك ءۇشىن باسكە 20 فۋنت تىگىپ, 29 مىڭ ۇتىپ الدى

استانا. 6 ناۋرىز. فۋتبولدان اعىلشىن پرەمەر-ليگاسىندا وينايتىن «لەستەر» كومانداسىنىڭ جانكۇيەرى سۇيىكتى كلۋبىنا 20 فۋنت ستەرلينگ ءباس تىگىپ, 29 مىڭ فۋنت ستەرلينگ (40890 اقش دوللارى) ۇتىپ الدى. بۇل تۋرالى eurosport.ru پورتالىنا سىلتەمە جاساعان egemen.kz ءتىلشىسى حابارلادى. دجون پرايك ەسىمدى جانكۇيەر ماۋسىم باسىندا «لەستەردىڭ» چەمپيوندىعىنا 20 فۋنت ستەرلينگ ءباس تىككەن ەكەن. بۇگىندە 29 تۋردان كەيىن تۋرنير كەستەسىندە 1-ورىندا كەلە جاتقان بۇل كوماندانى ول كەزدە ەشكىم مۇنداي جوعارى ناتيجە كورسەتەدى دەپ ويلاعان جوق. سول سەبەپتى دە, ونىڭ چەمپيوندىعىنا بۋكمەكەرلىك كەڭسەلەر 5001 كوەففيتسيەنت بەرگەن. سوعان وراي, دجون پرايكتىڭ نەگىزگى ۇتىسى 100 مىڭ فۋنت ستەرلينگ بولۋى ءتيىس-ءتىن. الايدا, ول ءۇشىن ماۋسىم سوڭىنا دەيىن كۇتۋى كەرەك. وعان شىدامى جەتپەگەن جانكۇيەر بۋكمەكەرلىك كەڭسەمەن كەلىسىمگە كەلدى. Goal.com پورتالىنا بەرگەن سۇحباتىندا دجون پرايك: «ماۋسىم باسىندا ەرمەك ءۇشىن عانا ءباس تىگىپ ەدىم. بىراق ءار تۋر سايىن كوماندانى ەمەس, ۇتىس جايىندا ءجيى ويلاي باستادىم. وعان «لەستەردىڭ» ويىنى اسەر ەتكەنىن ءسوزسىز. ال 28-تۋردىڭ الدىندا شىدامىم تاۋسىلىپ, بۋكمەكەرلىك كەڭسە قىزمەتكەرلەرىنەن اقشانى قازىر السام, قولىما قانشا سوما تيەتىنىن سۇرادىم. ولار 16 مىڭ فۋنت ستەرلينگ ەكەنىن ايتقاندا, ازسىنىپ, باس تارتتىم. ال سول تۋردا سۇيىكتى كوماندامنىڭ چەمپيوندىققا تالاستاعى باستى قارسىلاستارى «توتتەنحەم» مەن «ارسەنال» جەڭىلىس تاپتى. وسىدان كەيىن مەنىڭ ۇتىسىم بىردەن 29 مىڭعا كوتەرىلدى. ونىڭ ۇستىنە, بۋكمەكەرلەر ماۋسىم اياقتالعانشا مەنىڭ باسىمنەن بۇدان جوعارى ۇتىس بولمايتىنىن ايتتى. سوندىقتان ەش ويلانباستان اقشانى الۋدى ۇيعاردىم. 20 فۋنت تىگىپ, وسىنشا اقشا ۇتۋ جامان ەمەس دەپ ويلايمىن. ەگەر سوڭىنا دەيىن كۇتىپ, ناتيجە مەن ويلاعانداي بولماي شىقسا, دىمسىز قالار ەدىم. ءتىپتى ول كەزدەگى جاعدايىمنىڭ قالاي بولارىن ەلەستەتە المايمىن. ال قازىر قولىما اقشانى العاننان كەيىن كوڭىل-كۇيىمدە بۇرىنعىداي الاڭداۋشىلىق جوق. ەندى سۇيىكتى كومانداما ەش الاڭسىز جانكۇيەر بولىپ, فۋتبولدان راحات الامىن», – دەدى. سونىمەن قاتار, ول ماۋسىمنىڭ ورتاسىندا «لەستەردىڭ» چەمپيوندىعىنا تاعى 10 فۋنت ستەرلينگ تىككەنىن ايتتى. بىراق, ول كەزدەگى كوەففيتسيەنت 400 بولعان ەكەن. ەگەر كلاۋديو رانەريدىڭ شاكىرتتەرى چەمپيون اتانسا, دجون پرايك تاعى 4 مىڭ فۋنت ستەرلينگ اقشا ۇتادى. ايتا كەتەيىك, بۇگىنگە دەيىن اعىلشىن پرەمەر-ليگاسىنىڭ 29 تۋرى ءوتتى. سونىڭ ناتيجەسى بويىنشا «لەستەر» 60 ۇپايمەن كوش باستاپ تۇر. ال ەكىنشى ورىنداعى «توتتەنحەمدە» 55 ۇپاي بولسا, ازىرگە ءۇشىنشى ساتىدا كەلە جاتقان «ارسەنالدا» 52 ۇپاي بار. تاعى ءبىر نازار اۋداراتىن جايت, ەگەر «لەستەر» چەمپيون بولسا, بىرقاتار بۋكمەكەرلىك كەڭسەلەر ايتارلىقتاي شىعىنعا باتاتىن ءتۇرى بار. ماسەلەن, ءبىر عانا Sky Bet كەڭسەسى 5,5 ملن. فۋنت ستەرلينگتى «لەستەرگە» سەنىم ارتقان جانكۇيەرلەرگە تاراتىپ بەرەدى. ەلامان قوڭىر. دەرەك: eurosport.ru. سۋرەت: AFP.