دەپۋتات داۋىسى
مەملەكەتتىگىمىزدىڭ 20 جىلدىعى قارساڭىندا ءبىردەن-ءبىر ەسكەرىلۋگە ءتيىستى ماڭىزدى شارالار قاتارىنان سانالاتىن مەملەكەتتىك رامىزدەر تۋرالى كونستيتۋتسيالىق زاڭنىڭ ورىندالۋ بارىسىنا بايلانىستى قولىما قالام الىپ وتىرمىن. ۇستىمىزدەگى ايدا اتالعان زاڭعا سوڭعى وزگەرىستەر ەنگىزگەنىمىزگە بەس جىل تولادى. زاڭدا ءرامىزدەرگە قۇرمەت كورسەتۋ ارقىلى قازاقستاندىق ازاماتتاردىڭ ءوز وتانىنا دەگەن قۇرمەتىن, سۇيىسپەنشىلىگىن, پاتريوتتىق رۋحىن ءتاربيەلەۋ باعىتىندا ۇكىمەت, اكىمدەردىڭ ناقتى شارالار قابىلداپ, جۇزەگە اسىرىلۋى كوزدەلگەن. كوپ يگىلىكتى ىستەر اتقارىلىپ جاتقانىن كورىپ ءجۇرمىز. الايدا, كۇندەلىكتى ءومىردە رامىزدەرگە بايلانىستى ءارتۇرلى كەلەڭسىز جاعدايلار دا ۇشىراسىپ جاتادى. كوپتەگەن ازاماتتار ءالى كۇنگە دەيىن مەملەكەتتىك ءانۇراننىڭ ءماتىنىن بىلمەيدى. كوپشىلىك جينالعان سالتاناتتى جيىنداردا بۇقارا كوپشىلىكتىڭ, ءتىپتى مەكتەپ وقۋشىلارى مەن جوعارى وقۋ ورىندارىنىڭ ستۋدەنتتەرى دە ءوز داۋىستارىمەن قوسىلىپ گيمندى ايتۋعا ءۇيرەنبەگەن, ادەتتەنبەگەن. بارلىق ۇجىمداردا, ەل جينالعان كوپشىلىك شارالاردا تاسپاعا جازىلعان فونوگرامما ويناتىلادى. كوپشىلىك, ءتىپتى انت بەرەتىن مەملەكەتتىك قىزمەتكەرلەردىڭ وزدەرى دە گيمنگە ءجاي «ءان» دەپ قارايدى. ولاردىڭ ىشىندە كەيبىرەۋى زاڭدى نە مۇلدە وقىماعان, نە مويىندامايدى. ماسەلەن, ءبىر ءىرى شەنەۋنىك ءوزى قاتىناسىپ وتىرعان مارتەبەلى جيىننىڭ اشىلۋىندا ءانۇران وينالعان ساتتە, قولىن كەۋدەسىنە قويۋدى پارىز ساناماعانىن ءوز كوزىممەن كوردىم. كەيبىر شەنەۋنىكتەردىڭ «كۇشەيىپ» كەتكەنى سونشالىقتى, ولار وزدەرىن زاڭنان جوعارى قويعىسى كەلەتىن بولۋى كەرەك. جاقىندا قازاقستاننىڭ گاندبولشى (قول دوبى) قىزدارى ازيا چەمپيوناتىندا جەڭىسكە جەتىپ, جانكۇيەرلەرىن قۋانتتى. وكىنىشكە قاراي, ولاردىڭ قۇرمەتىنە گيمن ورىندالعاندا جەڭىمپاز قىزدار قاتار تۇرىپ, زاڭنىڭ تالابىنا سايكەس نە تۋعا مويىن بۇرمادى, نە قولدارىن جۇرەك تۇسىنا قويمادى. سول كەزدە عانا ولاردىڭ باسقا ەلدەن كەلگەن سپورتشىلار ەكەنىن ءتۇسىنىپ, كوپ جانكۇيەر تومەن قارادى. ولاردىڭ قۇرمەتىنە قازاقستان رەسپۋبليكاسىنىڭ گيمنى ورىندالعان ساتتەگى سۋرەت باسپاسوزدە جاريالاندى. وندا داۋلەت تۇرلىحانوۆ, تاعى ەكى-اق ادام قولدارىن كەۋدەسىنە قويىپ, قالعان 23 ادام ءوز بەتتەرىنشە تۇر. بۇل جاعداي, اسىرەسە, قازاق ەلىندە وتەتىن قىسقى ازيا ويىندارىنىڭ قارساڭىندا كوپشىلىك كوڭىلىن الاڭداتارى حاق. ءبىزدىڭ ەلىمىزدىڭ تۋى استىندا سپورتتىق باسەكەگە قاتىناساتىن سپورتشىلار قانداي شارتپەن قازاقستان اتىنان جارىسقا تۇسەدى؟ مەملەكەتتىڭ سپورتقا بولگەن قارجىسىنىڭ قانداي بولىگى جالدانبالى سپورتشىلارعا كەتەدى؟ جاس ۇرپاقتى, جاس سپورت شەبەرلەرىن وتانشىلدىققا, ءوز وتانىنىڭ پاتريوتى بولۋعا قالاي تاربيەلەمەكپىز؟ پرەزيدەنتتىڭ جاڭا جىلدىق قۇتتىقتاۋىنان كەيىن تۇنگى ساعات 24.00-دە تەلەكومپانيالار ءوز جۇمىستارىن ءانۇران ورىنداۋدان باستاسا دا ورىندى بولار ەدى. رەسەي كانالدارى ۇنەمى وسىلاي ەتەدى. ەجەلدەن امەريكا ازاماتتارىنىڭ ءوز گيمندەرىن سوزىمەن ايتىپ, جۇرەك تۇستارىنا وڭ قولدارىن قويىپ, ماقتانىشپەن تۇراتىندارىن بۇكىل الەم بىلەدى, ءارى سوعان قۇرمەتپەن قارايدى. بۇل ءراسىم برازيليا, تاعى باسقا ەلدەردە قالىپتاسقان. قىرعىزستاندا, وزبەكستاندا ءوز زاڭدارىنا وسىنداي ەلەمەنت كىرگىزگەندەرىن باسپاسوزدە وتانشىلدىق سەزىممەن جازدى. وسىعان بايلانىستى مەملەكەتىمىزدىڭ 20 جىلدىعى شارالارىندا مەملەكەتتىك ءرامىزدەردىڭ پايدالانىلۋى, ولاردىڭ حالىقتى, اسىرەسە, جاستاردى وتانشىلدىققا تاربيەلەۋدەگى ءرولى تۋرالى ۇكىمەتتىڭ ناقتى جۇمىسى كورىنىس بەرۋى ءتيىس دەپ بىلەمىن. قۋانىش سۇلتانوۆ, سەنات دەپۋتاتى.
