ساراپشىلار سەنىمى

وسكەمەندە وڭىرلىك ساراپشىلار فورۋمى ءوتتى. «دەدەمان» قوناقۇيىندە وتكەن القالى جيىندا مەملەكەت باسشىسى نۇرسۇلتان نازارباەۆ قابىلداعان بەس ينستيتۋتتىق رەفورما مەن ۇلت جوسپارى اياسىندا وڭىرلەردى دامىتۋعا ارنالعان ماڭىزدى مىندەتتەر تالقىلاندى. اتالعان شارانى قازاقستان پرەزيدەنتى جانىنداعى سترا­تەگ­يالىق زەرتتەۋلەر ينستيتۋتى ۇيىم­داستىردى. فورۋم جۇمىسىنا ەلىمىزدىڭ جەتەكشى ساياساتتانۋشىلارى مەن قوعام قايراتكەرلەرى, بەلگىلى ساراپشىلار مەن قوعامدىق ۇيىمداردىڭ وكىلدەرى قاتىستى. باسقوسۋ بارىسىندا بەس ينستيتۋتتىق رەفورما شەڭبەرىندە وڭىرلەردى دامىتۋدىڭ باسىم باعىتتارى سارالاندى. اتالعان شاراعا قاتىسۋشىلار جەرگىلىكتى ءوزىن ءوزى باسقارۋ جۇيەسىن ودان ءارى دامىتۋ جانە ايماقتارداعى وزەكتى ماسەلەلەردى شەشۋگە ىقپال ەتۋدە الداعى ءماسليحاتتار سايلاۋىنىڭ ماڭىزدى ەكەندىگىن اتاپ ءوتتى. – ماسليحاتتارعا وزىندىك تاباندى وي-پىكىرى بار جانە ونى ءتيىستى ورىنعا جەتكىزە الاتىن ادامدار كەلسە, جەرگىلىكتى بىرقاتار ماسەلەلەردىڭ شەشىمىن تاباتىنىنا سەنىمىمىز كامىل. ەڭ باستىسى, بيلىك پەن ازاماتتىق قوعام ءوزارا بىرىگىپ, كوپ ماسەلەدە ورتاق جەتىستىككە جەتۋگە بولادى, – دەدى ساياساتتانۋشى بەرىك ابدىعالي. «ەۋرازيا الەمى» قوعامدىق قورىنىڭ توراعاسى ەدۋارد پولەتاەۆ جۋىردا ەلباسى نۇرسۇلتان نازارباەۆتىڭ توراعالىعىمەن وتكەن ۇكىمەتتىڭ كەڭەيتىلگەن وتىرىسىندا قارالعان شارالاردىڭ شاراپاتىن الدىمەن وڭىرلەر سەزىنەتىنىن, ياعني تۇرعىن ءۇي, قۇرىلىس, ينفرا­قۇرى­لىم جانە جاڭا جۇمىس ورىن­دارىنىڭ قۇرىلۋى سياقتى جاڭا ەكونوميكالىق وسىممەن قامتاماسىز ەتۋگە وڭ اسەر ەتەتىنىن جەتكىزدى. فورۋم سوڭىندا ساراپشىلار مۇنداي باسقوسۋداعى پىكىرتالاستار ۇلت جوسپارىن ءىس جۇزىنە اسىرۋدا ءوز ناتيجەسىن بەرەتىنىن جەتكىزدى. سون­داي-اق, مەملەكەتتىك رەفورمالاردى ساراپتاۋ بويىنشا ءوزارا ءىس-قي­مىلدى ورىستەتە بەرۋگە ۋاعدالاستى. دۋمان اناش, «ەگەمەن قازاقستان». وسكەمەن.