الاتاۋ باۋرايىنداعى العىس ايتۋ

الماتىداعى دوستىق ۇيىندە العىس ايتۋ كۇنىنە وراي ءتۇرلى ەتنومادەني بىرلەستىك وكىلدەرىنىڭ قاتىسۋىمەن «مەنىڭ وتانىم – قازاقستان!» اتتى مەرەكەلىك فەس­تيۆال بولىپ ءوتتى. قالا تۇرعىندارى مەن قوناق­تارىنا شات-شادىمان كوڭىل-كۇي سىيلاعان شارا ەلىمىزدى مەكەن ەتكەن ءتۇرلى ۇلت وكىلدەرى ۇيىمداستىرعان مەرەكەلىك كونتسەرتپەن باستالىپ, وندا ورىس, ۋكراين, ازەربايجان, گرۋزين جانە تاعى باسقا ۇلت وكىلدەرى قازاقتىڭ ۇلتتىق اندەرىن شىر­قاپ, ءبيىن بيلەدى. قازاقستان رەسپۋبليكاسى پرەزيدەنتى جانىنداعى «قو­عامدىق كەلىسىم» رەس­پۋب­ليكا­لىق مەم­لەكەتتىك مەكەمەسى مەن قالا اكىمدىگى, الماتى قا­لالىق قازاقستان حالقى اسسامبلەياسى حاتشىلىعى بىرلەسە ۇيىمداستىرعان ءىس-شارادا اتالعان مەرەكەنىڭ ۇلت بىرلىگى مەن ىنتىماعى ءۇشىن ماڭىزدىلىعى اتاپ كورسەتىلدى. – 2016 جىلدىڭ 14 قاڭ­تارىندا ەلباسى نۇرسۇلتان نازارباەۆ قازاقستان حالقى اس­سامبلەياسىنىڭ قۇرىلعان كۇنى – 1 ناۋرىزدى ەلىمىزدە ال­عىس ايتۋ كۇنى دەپ جاريالاۋ تۋرالى جارلىققا قول قويدى. بۇل – قيىن كەزەڭدە ءبىر-بىرىنە ارقا سۇيەپ, از ۋاقىت ىشىندە جۇمىلا كۇش سالا وتىرىپ, ەلباسى جەتەك­شىلىگىمەن تاۋەلسىز قازاق­ستاننىڭ بولاشاعىن بىرگە سومداعان ەل ازاماتتارىنىڭ ءوزارا قۇرمەت كۇنى, – دەپ اتاپ ءوتتى ءوز سوزىندە قالا اكىمىنىڭ ورىنباسارى ارمان قىرىقباەۆ. مەرەكە كۇنىنە وراي ال­ما­تى قالاسىنداعى وزگە ۇلت وكىلدەرىنىڭ ەتنومادەني ءبىر­لەستىكتەرى ۇلتتىق ناقىش­تاعى بۇيىمدار مەن قولونەر زاتتارىنىڭ, ءار ۇلتتىڭ سالت-داستۇرىنەن سىر شەرتەتىن جادىگەرلەر مەن تۋىندىلاردىڭ كورمەسىن وتكىزىپ, دۋمانشىل جۇرتتىڭ ىقىلاسىنا بولەندى. قانات ەسكەندىر, «ەگەمەن قازاقستان». الماتى. سۋرەتتى تۇسىرگەن يۋري بەككەر.