قىزىلوردادا جوعالعان بالالار تابىلدى

قىزىلوردا. 1 ناۋرىز. قىزىلوردالىق پوليتسيا قىزمەتكەرلەرىنىڭ قىراعى جۇمىستارىنىڭ ناتيجەسىندە جوعالىپ كەتكەن ءبۇلدىرشىن مەن ۇيىنەن شىعىپ كەتىپ, قايتا ورالماعان ءجاسوسپىرىم ءدىن امان تابىلدى. بۇل تۋرالى وبلىستىق ىشكى ىستەر باسقارماسىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. بيىلعى جىلدىڭ 29 اقپانىندا ساعات 20.30 شاماسىندا وبلىستىق ىشكى ىستەر دەپارتامەنتىنىڭ جەدەل جوسپارلاۋ باسقارماسىنا 2013 جىلى تۋعان بالانىڭ جوعالىپ كەتكەندىگى جايلى حابارلاما كەلىپ تۇسەدى. اتالعان حابارلاما بويىنشا شۇعىل وقيعا ورنىنا دەپارتامەنتتىڭ جانە قالالىق ىشكى ىستەر باسقارماسىنىڭ جەدەل تەرگەۋ توبى, جەرگىلىكتى پوليتسيا قىزمەتىنىڭ ۋچاسكەلىك پوليتسيا جانە جول-پاترۋلدىك پوليتسيا قىزمەتكەرلەرى جىبەرىلىپ, توتەنشە جاعدايلار دەپارتامەنتىنە حابارلاندى. ءبۇلدىرشىننىڭ جوعالىپ كەتۋ سەبەبىن انىقتاۋ ماقساتىندا ءتيىستى شارالار جۇرگىزىلىپ, ىزدەستىرۋ جۇمىستارىنا قۇزىرلى ىشكى ىستەر ورگاندارى قىزمەتكەرلەرى جۇمىلدىرىلدى. بىرنەشە ساعاتقا سوزىلعان شارالار بارىسىندا سول اۋماقتاعى كوپ قاباتتى تۇرعىن ۇيلەردىڭ وجىرەلەرى, پودەزدەرى, اياقتالماعان قۇرىلىس نىساندارى, ساياجاي اۋماعىنداعى دالالىق ەلدى مەكەندەر تەكسەرىلىپ, كورگەن-بىلگەن ادامداردان جاۋاپتار الىندى. اتالعان فاكتىگە سەبەپ بولارلىق جايتتار, بارلىق بولجامدار جان-جاقتى قارالدى. ناتيجەسىندە, 3 جاستاعى ءبۇلدىرشىن تاسبوگەت كەنتى, پمك-19 ساياجايىنىڭ باتىس جاعىنان 4 شاقىرىم قاشىقتىقتاعى جىڭعىلدار اراسىندا ۇيىقتاپ جاتقان جەرىنەن تابىلدى. سونىمەن قاتار, كەزەكشى بولىمگە بىرنەشە ساعاتتان كەيىن تاعى ءبىر ءجاسوسپىرىمنىڭ جوعالىپ كەتۋى جايلى دەرەك تىركەلەدى. ناقتى ايتساق, 29 اقپان كۇنى ساعات 21.30 شاماسىندا 2002 جىلى تۋعان 8-سىنىپ وقۋشىسى تاسبوگەت كەنتىندە تۇراتىن اجەسىنىڭ ۇيىنەن شىعىپ كەتىپ, قايتا ورالمايدى. ساعات 01.30 شاماسىندا اناسى قىزىنىڭ جوعالىپ كەتكەندىگى جايلى دەپارتامەنتتىڭ كەزەكشى بولىمشەسىنە شاعىمدانادى. اتالعان حابارلاما بويىنشا, جەدەل تۇردە ىزدەستىرۋ شارالارى جۇرگىزىلىپ, ءجاسوسپىرىمنىڭ تۇرپاتتىق بەينەسى, ەرەكشە بەلگىلەرى جاسالادى. ۇيدەن كەتىپ قالۋىنا سەبەپ بولارلىق جايتتار جان-جاقتى قارالىپ, بارۋى مۇمكىن ورىندار تەكسەرىلدى, قۇربىلارى مەن دوستارىنان تۇسىنىكتەمەلەر الىندى. پوليتسيا قىزمەتكەرلەرىنىڭ جۇرگىزگەن ىزدەستىرۋ شارالارىنىڭ ناتيجەسىندە 14 جاسار ءجاسوسپىرىم قىز بىرنەشە ساعاتتان كەيىن تابىلدى. ەرجان بايتىلەس. دەرەك, سۋرەت: egemen.kz.