تاراز. 26 اقپان. جامبىل وبلىستىق مادەنيەت, مۇراعاتتار جانە قۇجاتتاما باسقارماسىنىڭ ۇيىمداستىرۋىمەن تاراز قالاسىندا جىر الىبى جامبىل جاباەۆتىڭ 170 جىلدىعىنا ارنالعان رەسپۋبليكالىق «تىڭدا, دالا, جامبىلدى!» اتتى جىرشى-تەرمەشىلەر بايقاۋى ءوتتى. بۇل تۋرالى egemen.kz ءتىلشىسى حابارلادى.
بايقاۋعا رەسپۋبليكامىزدىڭ ءار ايماعىنان باس-اياعى 33 ۇمىتكەر قاتىسىپ, قاپاش ق ۇلىش, دۇيسەنبەك ومىراليەۆ, ءابدىمومىن جەلدىباەۆ, اياز بەتباەۆ, ەلىكباي يسا سىندى ەلىمىزگە تانىمال ونەر قايراتكەرلەرى قازىلىق ەتتى.
«ارينە, جامبىل بابامىزدىڭ بۇعان دەيىنگى مەرەيتويلارىندا تالاي ونەر بايقاۋلارى ۇيىمداستىرىلعان. بىراق بۇرىن-سوڭدى ەلىمىزدەگى ۇزدىك جىرشى-تەرمەشىلەردىڭ باسىن قوسىپ, جامبىل جاباەۆتىڭ جىر-داستاندارىن ناسيحاتتاعان بايقاۋ بولماپتى. سوندىقتان بۇل جامبىل جاكەمنىڭ جىرلارىن جۇرتشىلىقتىڭ جۇرەگىنە جەتكىزىپ قانا قويماي, تەرمەشىلەردىڭ دە رۋحىن كوتەرىپ, ابىرويىن اسپانداتقان ءىس-شارا بولدى», – دەيدى جامبىل وبلىستىق مادەنيەت, مۇراعاتتار جانە قۇجاتتاما باسقارماسىنىڭ باسشىسى دۇيسەن بىقىباەۆ.
قازىلار القاسىنىڭ ۇيعارىمىمەن جامبىل جاباەۆتىڭ جانە جەتىسۋدا ءومىر سۇرگەن اقىن-جىرشىلاردىڭ شىعارمالارىن ناقىشىنا كەلتىرە ورىنداپ, كورەرمەننىڭ جۇرەگىنە جول تاپقان دانيار راحىمباي (الماتى وبلىسى) باس جۇلدەنى يەلەندى. ءبىرىنشى ورىندى ماقپال توقتاعانوۆا (الماتى وبلىسى) جانە سۇلۋجان ابەنوۆا (جامبىل وبلىسى) يەلەنسە, ەكىنشى ورىن – جاراسحان تولەباي (قىزىلوردا وبلىسى), ەربولات شالدىبەكوۆ (الماتى وبلىسى), مۇراتحان دونباەۆ (شىعىس قازاقستان وبلىسى), ءۇشىنشى ورىن مارات سۇگىرباي (قىزىلوردا وبلىسى), قۇرمان بايتاسوۆ (استانا قالاسى), تولەگەن شاكارىموۆكە (شىعىس قازاقستان وبلىسى) بۇيىردى.
سونداي-اق, ءسۇيىنباي اتىنداعى ارنايى جۇلدەنى اقتوبەلىك عازيزا ابديروۆا, قابان جىراۋ جۇلدەسىن جامبىلدىق قارلىعا جامباەۆا, ساۋىتبەك اتىنداعى جۇلدەنى تاعى ءبىر جامبىلدىق جۇلدىز ىسقاقوۆ, بارماق اقىن اتىنداعى جۇلدە اتىراۋلىق بايباق ىدىرباي, كەنەن ازىرباەۆ اتىنداعى جۇلدە شىعىسقازاقستاندىق گۇلميرا تەمىربەكوۆا, اياز بەتباەۆ اتىنداعى جۇلدەنى قوستانايلىق ابزال الپىسوۆ يەلەندى.
ورالحان ءداۋىت.
دەرەك: egemen.kz.
سۋرەت: اقادىل رىسماحان.
