اتىراۋدىڭ 10 اۋىلىنا 9,7 ملرد. تەڭگەنىڭ گاز قۇبىرى سالىنادى

اتىراۋ. 26 اقپان. اتىراۋ وبلىسىنىڭ قۇرمانعازى اۋدانىنداعى 10 اۋىلعا گاز قۇبىرىن جۇرگىزۋ ءۇشىن 9,7 ملرد. تەڭگە جۇمسالادى. بۇل تۋرالى اتىراۋ وبلىسىنىڭ اكىمى باقتىقوجا ىزمۇحامبەتوۆتىڭ مالىمدەمەسىنە سىلتەمە جاساعان egemen.kz ءتىلشىسى حابارلادى. اتىراۋ وبلىسىنداعى ەلدى مەكەندەردىڭ 79,5 پايىزى, حالىقتىڭ 98 پايىزى تابيعي گاز جۇيەسىنە قوسىلىپ وتىر. الايدا, ەڭ شالعايداعى ءارى رەسەي فەدەراتسياسىمەن شەكاراداعى قۇرمانعازى اۋدانىندا ءالى دە تابيعي گاز جەلىسى تارتىلماعان بىرنەشە اۋىل بار. اۋدان  ورتالىعىنان 300 شاقىرىمنان استام قاشىقتاعى بۇل اۋىلدار «ازعىر» اسكەري پوليگونى ماڭىندا ورنالاسقان. «حالىقتى گازبەن قامتۋداعى ەڭ ۇلكەن جوبا, تاۋەكەلگە بەل بايلاپ كىرىسكەن جۇمىسىمىز – ازعىر وڭىرىنە گاز قۇبىرىن جۇرگىزۋ قولعا الىندى. ءوڭىردىڭ 10 اۋىلىندا 8 مىڭعا جۋىق تۇرعىن ءومىر سۇرەدى. بۇل جۇمىس ەلباسىنىڭ شەكارا ماڭىنداعى اۋىلداردى دامىتۋ جونىندە بەرگەن تاپسىرماسىنا سايكەس جاسالىپ جاتىر. گاز قۇبىرىنىڭ ۇزىندىعى 365 شاقىرىم, جوبا قۇنى – 9,7 ملرد. تەڭگە. قۇرىلىسى NCOC كومپانياسىنىڭ دەمەۋشىلىگىمەن بيىل باستالادى», – دەپ ءمالىم ەتتى اتىراۋ وبلىسىنىڭ اكىمى باقتىقوجا ىزمۇحامبەتوۆ. جولداسبەك شوپەعۇل. دەرەك: egemen.kz. سۋرەت: راحىم قويلىباەۆ.