قوستانايدا يندۋستريالىق ايماقتىڭ تۇساۋكەسەرى ءوتتى

قوستاناي. 26 اقپان. قوستانايدا يندۋستريالىق ايماقتىڭ تۇساۋكەسەرى ءوتتى. وعان ينۆەستيتسيا جانە دامۋ ءمينيسترى اسەت يسەكەشەۆ جانە شەتەل ينۆەستورلارى قاتىستى. بۇل تۋرالى egemen.kz ءتىلشىسى حابارلادى. قوستانايدا ماشينا قۇراستىرۋ زاۋىتتارى قاسىنان تۇسەتىن وندىرىستىك ايماق تۋرالى بىرنەشە جىل بۇرىن ايتىلعان بولاتىن. مىنە, ەندى ول شىندىققا اينالدى. ايماقتىڭ ينفراسترۋكتۋراسى جانە باسقا دا جۇمىستارى ءۇشىن بارلىعى 2 ميللياردتان اسا تەڭگە بولىنەدى. سونىڭ ايماق جۇمىسى باستالار 2 جىلى ءۇشىن 1 ميلليارد 100 ميلليون تەڭگە بولىنەدى. وندىرىستىك ايماق ەكى ساتىدان تۇرادى. العاشقىسى تازا اۆتوموبيل وندىرىسىنە بايلانىستى بولادى. ەكىنشى ساتىسىندا وڭدەۋ, تاماق ونەركاسىبى دامىتىلادى. وبلىس اكىمى ارحيمەد مۇحامبەتوۆ: «ەندى 2-3 ايدان كەيىن قۇجاتتاردىڭ بارلىعى دايىندالادى, قۇرىلىسى بيىل باستالادى, كەلەسى جىلى دايىن بولادى. مۇندا 10-15 ءوندىرىس كاسىپورىندارىن سىيعىزاتىن بولامىز. قىتايدىڭ سمس سي كومپانياسىمەن بىرلەسىپ, مۇندا اۆتوموبيل ءوندىرىسىن دامىتاتىن بولامىز, ولار وسى وندىرىستىك ايماققا 4 زاۋىت سالعالى وتىر. وبلىستىڭ مىندەتى وندىرىستىك ايماقتىڭ ينفراسترۋكتۋراسىن جاساۋ بولىپ تابىلادى. جەر بولەمىز, ول قازىرگى اۆتوموبيل زاۋىتتارىنىڭ اينالاسىندا بولماق. نەگىزگى ماقسات شەتەل ينۆەستورلارىنا جاعداي جاساۋ بولىپ تابىلادى», – دەدى. ينۆەستيتسيا جانە دامۋ ءمينيسترى اسەت يسەكەشەۆ: «وسى جۇمىستاردىڭ بارلىعى ەلباسىنىڭ ۇلت جوسپارىنداعى «100 ناقتى قادامدى» جۇزەگە اسىرۋ بولىپ تابىلادى. ونداعى بىرنەشە قادام قازاقستانعا حالىقارالىق بيزنەس وكىلدەرىن تارتۋعا ارنالعان بولاتىن. بۇل ىستە جاڭادان اشىلىپ وتىرعان وندىرىستىك ايماقتىڭ بولاشاعى زور», – دەدى. مينيسترلىكپەن جانە قوستاناي وبلىسىمەن كەلىسىمگە كەلىپ وتىرعان يتاليا, فرانتسيا جانە قىتاي كومپانيالارى ماشينا قۇراستىرۋ ءىسىنىڭ 50 پايىزىنا دەيىنگى جۇمىسىن قوستاناي زاۋىتتارىنىڭ اتقارۋىنا مۇمكىندىك بەرەتىنىن ايتتى. ءنازيرا جارىمبەتوۆا. دەرەك, سۋرەت: egemen.kz