اتىراۋدا اۋىز سۋمەن قامتۋعا 1 ملرد. تەڭگە بولىنەدى

اتىراۋ. 26 اقپان. اتىراۋ وبلىسىندا بيىل ەلدى مەكەندەردى اۋىز سۋمەن قامتۋعا جەرگىلىكتى بيۋدجەتتەن 1 ملرد. تەڭگە بولىنەدى. بۇل تۋرالى اتىراۋ وبلىسىنىڭ اكىمى باقتىقوجا ىزمۇحامبەتوۆتىڭ مالىمدەمەسىنە سىلتەمە جاساعان egemen.kz ءتىلشىسى حابارلادى. اكىمنىڭ ءمالىم ەتۋىنشە, «اق بۇلاق» باعدارلاماسى باستالعالى بەرى اتىراۋ وبلىسىندا 88 نىساننىڭ قۇرىلىسى اياقتالىپ, 72 ەلدى مەكەندە تۇراتىن 76 مىڭنان اسا تۇرعىن تازا اۋىز سۋمەن قامتىلىپتى. ماسەلەن, وتكەن جىلى ماحامبەت اۋدانىنىڭ اقتوعاي, سارىتوعاي, جالعانساي اۋىلدارىنا جانە جىلىوي اۋدانىنداعى شوقپارتوعاي اۋىلىنا دا اۋىز سۋ جەتكىزىلگەن. وبلىس ەلدى مەكەندەرىنىڭ ورتالىقتاندىرىلعان اۋىز سۋمەن قامتىلۋ ۇلەسى 52 پايىزدان 75,6 پايىزعا ءوستى. «بيىل جەرگىلىكتى بيۋدجەتتەن 1 ملرد. تەڭگە ءبولىنىپ, اۋىسپالى 10 نىساننىڭ قۇرىلىسى اياقتالادى. يندەر اۋدانىندا ءۇش اۋىل – اققالا, قۇرىلىس, ىنتىماق, ماحامبەتتىڭ ءتورت اۋىلى – المالى, تاڭداي, ورتاقشىل, العا, يساتاي اۋدانىندا تۇششىقۇدىق, جىلىويدا تۇرعىزبا اۋىلىنىڭ عيماراتتارى مەن سۋ قۇبىرى اياقتالادى. قىزىلقوعا اۋدانىنىڭ تايسويعانداعى ۇڭعىمالارى ىسكە قوسىلادى» – دەپ ءمالىم ەتتى اتىراۋ وبلىسىنىڭ اكىمى باقتىقوجا ىزمۇحامبەتوۆ. جولداسبەك شوپەعۇل. دەرەك: egemen.kz. سۋرەت: راحىم قويلىباەۆ.