جوعارى ەڭبەك ونىمدىلىگى – ادىلەتتى قوعامنىڭ تابىسى

كەشە سايلاۋالدى ۇگىت-ناسيحات جۇمىستارىن جۇرگىزۋ شەڭبەرىندە قازاقستاننىڭ كوممۋنيستىك حالىق پارتيا­سىنان (قكحپ) ۇمىتكەرلەر تىزىمىنە ەنگىزىلگەندەر الماتىداعى «اقساي نان» جشس جۇمىسشىلارىمەن كەزدەستى. «اقساي نان» جشس – ەلىمىزدەگى نان ءونىم­دەرىن شىعاراتىن ەڭ ۇلكەن كاسىپ­ورىنداردىڭ ءبىرى. مۇنداعى جۇمىس­شىلار اراسىنان قكحپ باعدارلاماسىن قولداۋشىلار سانى باسقا كاسىپورىندارعا قاراعاندا ءبىرشاما كوپ. پارتيالىق تىزىمگە ەنگىزىلگەن دەپۋتاتتىقتان ءۇمىت­كەر كوممۋنيستەر اتىنان العاشقى ءسوزدى ماگەررام ماگەرراموۆ الىپ, كومپارتيانىڭ الدىنا قويىپ وتىرعان ساياسي ماقساتتارىن, ەلىمىزدىڭ ەكونوميكاسىن كوتەرۋ جولىندا قانداي ۇسىنىستار جاسايتىنىن جينالعاندارعا جەتكىزدى. ەكونوميكانىڭ ناقتى سەك­تورىن­داعى جوعارى ونىمدىلىك قانا ەل ەكونو­ميكاسىنىڭ تۇراقتى تۇردە وسۋىنە نەگىز بولا الادى. قازاقستاندا ونى وسىرۋگە نەگىز بولاتىن فاكتورلار جەتكىلىكتى. سونىمەن قاتار, حالىقتىق كوممۋنيس­تەر قازاقستاندىقتاردىڭ ءال-اۋقاتىنىڭ وسكەنىن دە قالايدى. ەلىمىزدە ادىلەتتى قوعام ورناپ, ەڭبەك ادامدارىنىڭ توككەن تەرىنە وراي ءتيىستى كولەمدە ەڭبەكاقى تولەنسە, سونىمەن قاتار, حالىقتىڭ رۋحاني جانە مادەني دامۋىنا جاعداي جاسالسا, كوممۋنيستەر اتقارۋشى وكىمەتكە ارقاشان دا قولداۋشى بولارى ءسوزسىز. ءبىزدىڭ ەلىمىزدىڭ زاڭدارى, قابىلدانعان نورمالار وسىنداي جەتىستىكتەرگە اپاراتىنىنا مەن سەنىمدىمىن, دەدى شەشەن. كەلەسى كەزەكتە ءسوز العان پارتيا بەلسەندىسى يرينا سميرنوۆا دا قكحپ-نىڭ تىزىمىنە ەنگەن ۇمىتكەرلەردىڭ ءبىرى. ول الدىمىزدا بولاتىن سايلاۋدىڭ ماڭىزدىلىعىنا توقتالىپ ءوتتى. ەلىمىزدىڭ ەڭ جوعارعى زاڭ شىعارۋشى وكىلەتتى ورگانىندا بىرنەشە پارتيانىڭ وكىلدەرى وتىرسا, بۇل دەموكراتيا قاعيداتتارىنىڭ تولىق ورىندالعانى دەپ ساناۋ كەرەك. وتكەن سايلانىمدا حالىقتىق كوممۋنيستەردەن تىزىمىمەن ەنگەن جەتى دەپۋتات وزدەرىن جاقسى قىرىنان تانىتا ءبىلدى. ولار ەڭبەك ادامىنىڭ, قاراپايىم حالىقتىڭ مۇددەسىن جاقتاپ وزدەرىنىڭ حالىقشىلدىعىن كورسەتتى. الدىمىزدا بولاتىن سايلاۋدا دا ءبىزدىڭ پارتيامىز 7 پايىزدىق تابالدىرىقتى ەڭسەرۋگە ءتيىس. جۇمىسشى تابىنىڭ وكىلدەرى كوممۋنيستەرگە داۋىس بەرەدى عوي دەگەن سەنىمدەمىز, دەدى ول. ءىس-شارا بارىسىندا كاسىپورىننىڭ بىرنەشە جۇمىسشىسى سويلەپ, وزدەرىنىڭ قكحپ-عا داۋىس بەرەتىندەرىن جەتكىزدى. كەز­دەسۋ سوڭىنان كوممۋنيستەر «اقساي نان» جشس-ءنىڭ ەڭبەك ۇجىمىنا تابىستار تىلەپ, بيىك ەڭبەك ونىمدىلىگىنە جەتۋلەرىن تىلەدى. جاقسىباي سامرات, «ەگەمەن قازاقستان». الماتى.