قوستاناي. 23 اقپان. ماماندار كوكتەمگى سۋ تاسقىنى وبلىستىڭ وڭتۇستىك اۋداندارىندا شامامەن ناۋرىز ايىنىڭ 22-25-نەن باستالىپ, ءساۋىر ايىنىڭ 21-نە قاراي اياقتالادى, سولتۇستىك اۋدانداردا ءساۋىر ايىنىڭ باسىنان اياعىنا دەيىن سوزىلاتىنىن ايتىپ وتىر. وسىعان وراي وبلىستا سۋ تاسقىنى زارداپتارىنىڭ الدىن الۋعا بايلانىستى قىزۋ دايىندىق جۇمىستارى باستالىپ كەتتى. بۇل جونىندە egemen.kz ءتىلشىسى حابارلادى.
وتكەن جىلدىڭ قاراشا ايى مەن وسى جىلدىڭ قاڭتارى ارالىعىندا تۇسكەن قاردىڭ كولەمى 99 ميليمەتر بولدى. وبلىس بويىنشا جاۋعان قاردىڭ بيىكتىگى 34 ميليمەتردى قۇرايدى, بۇل وتكەن جىلدارمەن سالىستىرعاندا ءبىر جارىم ەسەگە كوپ. قار سۋىنىڭ كوپتىگى دە بۇرناعى جىلدارعا قاراعاندا ەكى ەسە كوپ. الايدا توتەنشە جاعدايلار باسقارماسى توتەنشە جاعدايلاردىڭ الدىن الۋ باسقارماسىنىڭ باسشىسى, پودپولكوۆنيك ورىنقىز مەڭدىباەۆانىڭ ايتۋىنا قاراعاندا, سۋدىڭ تاسۋى قاردىڭ تۇسۋىنە ەمەس, ونىڭ قالاي ەرۋىنە بايلانىستى.
«قالىڭ قار جابىنى وزەندەگى سۋ دەڭگەيىنىڭ جوعارعى كورسەتكىشى ەمەس. ەگەر كۇن بىردەن جىلىپ كەتسە, قاردىڭ ەرۋىنەن سۋ مولشىلىعى بولادى, ال تۇندە قاتقاق بولىپ, قار كۇندىز عانا ەرىسە وندا سۋدىڭ كوپ بولماۋى مۇمكىن», – دەدى توتەنشە جاعدايلار باسقارماسى توتەنشە جاعدايلاردىڭ الدىن الۋ باسقارماسىنىڭ باسشىسى, پودپولكوۆنيك ورىنقىز مەڭدىباەۆا.
وبلىستا كوكتەمگى سۋ تاسقىنىنىڭ جايىلما سۋ جولىندا 1840 تۇرعىن ءۇي مەن 7918 ادام, 35 اۆتوجول ۋچاسكىسى, 17 ەلەكتر توگىن بەرۋ سىزىعىنىڭ ۋچاسكەسى, اۋليەكول, التىنسارين, امانگەلدى, دەنيسوۆ, جىتىقارا, جانگەلدين, قامىستى, قارابالىق, قوستاناي, ناۋىرزىم, سارىكول, تاران جانە ۇزىنكول اۋداندارىنداعى 49 ەلدى مەكەندەر, سونداي اق, ليساكوۆ پەن ارقالىق قالالارى قالىپ تۇر.
سۋ تاسقىنىنىڭ الدىن الۋ ءۇشىن ايماقتىڭ ەلدى مەكەندەرىندە قار شىعارۋ جۇمىستارى ۇيىمداستىرىلدى. سەنبىلىكتەر وتكىزىلىپ, دەپارتامەنت قىزمەتكەرلەرى تۇرعىن ۇيلەردى ارالاپ, تۇرعىندارعا وزدەرىنە قاراستى اۋماقتاردى قاردان تازارتۋ قاجەتتىلىگى جايىندا تۇسىنىك جۇمىستارىن جۇرگىزەدى. اقپان, ناۋرىز ايلارىندا ايماقتى اۋەدەن بارلاپ ۇشۋدى, وزەندەردە مۇز جارۋ جۇمىستارىن جۇرگىزۋ اۋا رايىنا قاراي ءساۋىر ايىنىڭ ءبىرىنشى نەمەسە ەكىنشى ونكۇندىگىنە جوسپارلانىپ وتىر.
ءنازيرا جارىمبەتوۆا.
دەرەك, سۋرەت: egemen.kz.
