دي كاپريو كيىز ءۇي مەن قىمىزدى تاڭدادى

تاياۋدا گولليۆۋد جۇلدىزى لەوناردو دي كاپريو الداعى 10 كۇندىك دەمالىسىن موڭعوليادا وتكىزەتىنىن مالىمدەدى. ول جاقتا اتاقتى اكتەردى ەشقانداي بەس جۇلدىزدى قوناق ءۇي كۇتىپ تۇرما­عانىن اتاپ وتكەن ءجون. سونداي-اق, جەكە جۇرگىزۋشىسى بار كولىك تە «جۇلدىزعا» قىزمەت كورسەتپەيدى. ەسەسىنە, اكتەر سول 10 كۇندە كيىز ۇيدە تۇراتىن بولادى. ول از دەسەڭىز, بارار جەرىنە جىل­قىمەن جەتىپ, كۇندەلىكتى اس مازىرىندەگى نەگىزگى سۋسىنداردىڭ قاتارىنا قىمىز قوسىلادى. ءبىر سوزبەن ايتقاندا, دي كاپريو كوشپەندىلەردىڭ ءومىر-سالتىن كوزبەن كورىپ قانا قويماي, ءوزىن سولاردىڭ ءبىرى رەتىندە سەزىنۋگە مۇمكىندىك الىپ وتىر. The Telegraph باسىلىمىنىڭ حابارلاۋىنشا, اكتەر بۇل ساياحاتى ءۇشىن 95 مىڭ اقش دوللارىن تولەيدى. باق وكىلدەرىنە بەرگەن سۇحباتىندا دي كاپريو ءوزى باس­تى ءرولىن سومداعان The Revenant («ءتىرى قالعان) فيلمىندەگى كەيىپكەر سياقتى تابيعاتپەن بەتپە-بەت كەلىپ, جالعىزدىقتا ءومىر ءسۇرۋدىڭ اسەرىن سەزىنگىسى كەلەتىنىن ايتقان. موڭعوليا ساپارى بارىسىندا اكتەردىڭ قاسىنا جول باستاۋشى رەتىندە شۆەد زەرتتەۋشىسى يوحان ەرنست نيلسون مەن جەكە اسپازى ەرەدى. وسىنداي ەرەكشە ساياحاتتاردى ۇيىمداستىرۋشى مامان ي.نيلسون بۇل ساپار جونىندە: «مەن بارلىق تۇتىنۋشىلارىما قيىندىقتار مەن كەدەرگىلەردەن تۇراتىن جولمەن ءجۇرىپ ءوتۋدى ۇسىنامىن. كەيدە جانعا جايلى, راحات ومىردەن قول ءۇزىپ, سول ورتاعا وزگە ءبىر قىرىنان قا­راۋ­دىڭ ارتىقتىعى جوق. ونىڭ اسەرى دە ەرەكشە بولادى», – دەيدى. ەرنار مۇحامبەت.