استانا. 22 اقپان. گەرمانيانىڭ «ۆولفسبۋرگ» فۋتبول كومانداسىنىڭ باسشىلىعى وسى كلۋب پەن دانيا قۇراماسىنىڭ ويىنشىسى نيكلاس بەندتنەرگە Mercedes كولىگىنىڭ قاسىندا سۋرەتكە تۇسكەنى ءۇشىن ايىپپۇل سالدى. بۇل تۋرالى eurosport.ru پورتالىنا سىلتەمە جاساعان egemen.kz ءتىلشىسى حابارلادى.
دات فۋتبولشىسى ءوزىنىڭ جەكە S كلاستى Mercedes كولىگىنىڭ قاسىندا سۋرەتكە ءتۇسىپ, ونى Instagram الەۋمەتتىك جەلىسىندەگى پاراقشاسىنا سالعان. ءتىپتى, سۋرەتتىڭ استىنا «جاتتىعۋعا بارا جاتىرمىن» دەپ جازىپ تا قويعان ەكەن.
سپورتشىنىڭ بۇل ارەكەتى «ۆولفسبۋرگ» كومانداسىنىڭ تالاپتارىنا قايشى بولىپ سانالادى. سەبەبى, كلۋبتىڭ بارلىق قىزمەتكەرىنە تاعى ءبىر نەمىس اۆتوكونتسەرنى Volkswagen-ءنىڭ كولىكتەرىنەن باسقا كولىكتەرمەن جۇرت كوزىنە تۇسۋگە تىيىم سالىنعان. ال Volkswagen كونتسەرنى وسى كلۋبتىڭ رەسمي دەمەۋشىسى ەكەندىگى بەلگىلى.
«ۆولفسبۋرگتىڭ» سپورت ىستەرى جونىندەگى ديرەكتورى كلاۋس اللوفس فۋتبولشىعا ايىپپۇلدىڭ سالىنعانىن راستادى. الايدا, ول ونىڭ كولەمى تۋرالى ناقتى مالىمەت بەرگەن جوق.
ايتا كەتەيىك, بيىلعى ماۋسىمدا بەندتنەر «ۆولفسبۋرگ» ساپىندا 21 رەت الاڭعا شىعىپ, 4 گول سوقتى.
ەلامان قوڭىر.
دەرەك: eurosport.ru.
سۋرەت: sport-xl.org.
