170 017
بۇل – بارىس جىلى باعىندىرعان بيىگىمىز
ەۋروپاعا تابىستى توراعالىق تۇسىنىگىمىزدى تۇلەتىپ, ءساتتى سامميت سانامىزدى سىلكىنتىپ سالعانى راس. مەملەكەت اتقاراتىن ەڭ مەرەيلى مىندەتتىڭ ۇدەسىنەن شىققان سوڭ ەندىگى جەردە ەل رەتىندە كەمەلدەنۋ كەزەڭىنە كوشكەنىمىزگە كوزىمىز جەتىپ, كوڭىلىمىز سەنىپ, ويىمىز ورنىعىپ وتىرعان جايىمىز بار بۇگىندە. وردامىز قونىپ, ورتامىز تولىپ, ويداعى بولىپ جاتقان وسى ءبىر شىرقاۋ شاعىمىزدا ەۋروپاداعى قاۋىپسىزدىك جانە ىنتىماقتاستىق ۇيىمىنىڭ تىزگىنىن ۇرىمتال ۇستاعانىن قاناعات ەتىپ قالماي, ۇيىمنىڭ ون ءبىر جىلدان بەرى شاقىرىلماي كەلە جاتقان ۇلى جيىنىن وتكىزۋدىڭ ورايىن كەلتىرگەن حالىقتىڭ مۇنداي تۇستاردا ەلدىك ءمۇددەلەرگە ەرەكشە سەرگەك قارايتىنىنا, بۇل كوڭىل-كۇيدىڭ باسپاسوزگە جازىلىمعا دا تارايتىنىنا سەنگەنبىز. كەيىنگى كەزدە گازەت بەتىندە رەسمي ماتەريالداردىڭ بۇرىنعىدان دا كوبەيىڭكىرەپ كەتكەنىنە, ءتىپتى كەي كۇندەرى ءنومىردى تۇتاستاي دەرلىك تۇرلىشە باعدارلامالار ماتىندەرىمەن تولتىرۋعا تۋرا كەلگەنىنە دە قاراماستان سەنگەنبىز. كەيىنگى كەزدە كەي ازاماتتاردىڭ «قاعازعا باسىلاتىن گازەتتەر تاياۋداعى ءتورت-بەس جىلدا قالادى, جۇرتتىڭ ءبارى باسىلىمنىڭ ءبارىن سايتتاردان سۋدىراتاتىن بولادى» دەپ جۇرگەنىنە دە قاراماستان سەنگەنبىز. سەنىمىمىز الداماپتى. 170 017 بۇل – ءبىزدىڭ بارىس جىلىندا باعىندىرعان بيىگىمىز. «ەگەمەن قازاقستاننىڭ» بۇگىنگى ءنومىرى, 2011 جىلعى, تاۋەلسىزدىگىمىزدىڭ جيىرما جىلدىعىنداعى العاشقى ءنومىرى وسىنداي تارالىممەن باسىلىپ وتىر. مۇنىڭ ءوزى وتكەن جىلعى تارالىمنان (160 412 دانا) تۇپ-تۋرا 10 مىڭ دانا ارتىق. بۇگىنگىدەي قۋانىشتى كۇندە ءبىز ەل گازەتىنىڭ تارالىمىن ارتتىرۋعا اتسالىسقان ازاماتتاردىڭ بارشاسىنا اق العىسىمىزدى ايتامىز. جازىلىم قاي وبلىستا بولسىن جاقسى ءجۇردى دەي الامىز. ايرىقشا رازىلىق ءسوزىمىزدى «ەگەمەن» وقىرماندارىنىڭ سانى... 34 788 داناعا جەتكەن وڭتۇستىكقازاقستاندىقتارعا ارنايمىز. قالتاي مۇحامەدجانوۆ ول ءوڭىردى « ۇلىسىمنىڭ ۇيىتقىسى» دەپ اتاعاندا سونداعى قازاقىلىق قايماعىنىڭ قالىڭدىلىعىن دا, ازاماتتارىنىڭ ايرىقشا شالىمدىلىعىن دا قاتار اڭعارتقان ەدى. باس باسىلىمنىڭ 90 جىلدىعىنا وراي تۇرعىزىلعان رەداكتسيا عيماراتىن اشىپ, گازەت ۇجىمىن تورقالى تويمەن قۇتتىقتاعاندا ەلباسىمىز: «ەگەمەن قازاقستاننىڭ» تارالىمى كوبەيىپ كەلەدى. 150 مىڭ داناعا جەتتى», دەپ اتاپ ايتقان دا, بىزگە بۇرىلا قاراپ, «ال انا جىلدارداعى شاماسى قانداي ەدى؟» دەپ سۇراعان. «2000 جىلى 38 مىڭ ەدى» دەگەنبىز (پرەزيدەنتكە: «مەن گازەتكە كەلگەن جىلى...» دەپ اشىق ايتا المايتىنىڭ بەلگىلى عوي). سوندا نۇرسۇلتان ءابىش ۇلى: «دەمەك, 38 مىڭنان 150 مىڭعا دەيىن ءوسۋ گازەتتىڭ قازىرگى دەڭگەيىن بىلدىرەتىن كورسەتكىشتەردىڭ ءبىرى عوي. مىنە, مۇنىڭ ءوزى-اق ۇلكەن باعا. ياعني, گازەت قاجەت, وقىلادى, قىزعىلىقتى دەگەن ءسوز. سىزدەردىڭ جۇمىستارىڭىزعا بەرىلگەن ەڭ ءادىل, ەڭ ءدال باعا وسى», دەگەن بولاتىن. وسى ارقىلى ەلباسىمىز گازەتكە ەڭ ءادىل, ەڭ ءدال باعانى وقىرمان, حالىق بەرەتىنىن اڭعارتقان. سوندىقتان, جوعارىداعى ءبىر سويلەمىمىزدى «بۇل – ءسىزدىڭ بارىس جىلىندا باعىندىرعان بيىگىڭىز, قادىرمەندى وقىرمان» دەپ قۇرساق تا ارتىقتىعى جوق. ولاي دەيتىنىمىز – بۇل تارالىمعا ءسىزدىڭ ەڭبەگىڭىز تىكەلەي ءسىڭىپ وتىر. ءسىز گازەتتى 2011 جىلعا جازىلىپ الدىرماساڭىز مىنا شاعىن جازبانىڭ تاقىرىبى 170 016 بولىپ تۇرار ەدى. ءسىزدىڭ كورشىڭىز دە جازىلىپ الدىرماسا تاقىرىپ 170 015 بولىپ تۇرار ەدى. ەلدىك اتتى قاسيەتتى عيماراتتىڭ كىرپىشتەرى وسىلاي ءبىر-بىردەن قالانادى. ءسىز ەل گازەتى «ەگەمەن قازاقستانعا» جازىلۋ ارقىلى ءوزىڭىزدىڭ ەلمەن بىرگە تىنىستايتىنىڭىزدى تانىتىپ, ەلدىڭ جاي-كۇيىنە الاڭدايتىنىڭىزدى اڭعارتىپ, ازاماتتىق بيىككە كوتەرىلگەنىڭىزدى كورسەتىپ وتىرسىز. ءسىز وسى ارقىلى مەملەكەتتىك تىلىمىزگە قۇرمەتىڭىزدى دە ايشىقتاپ وتىرسىز. «بۇل گازەتتى سىيلاپ, قۇرمەتتەۋ – نامىستىڭ ءىسى. «مەن قازاقپىن!» دەگەن ءاربىر ازامات «ەگەمەنگە» جازىلسا كەرەك. ايتپەسە باسقالار تابالايدى. ءبۇيتىپ ۇلت بولعانىڭا, قازاق بولعانىڭا بولايىن دەپ كۇلەدى. ءتاڭىرىم تابادان ساقتاسىن», دەپ ەدى شەراعاڭ – گازەتىمىزدىڭ بۇرىنعى باس رەداكتورى شەرحان مۇرتازا. ءسىز وسى ارقىلى انا ءتىلىن ارداق تۇتاتىن ناعىز قازاق ەكەنىڭىزدى, نامىستى پەرزەنت ەكەنىڭىزدى دە دالەلدەپ وتىرسىز. راحمەت سىزگە, قادىرمەندى وقىرمان! جاڭا جىلدا جۇرتقا جەتكىزەر جاقسىلىعىمىز كوپ بولسىن!ساۋىتبەك ابدراحمانوۆ.
