قازاقتىڭ ءبىر توپ تاستاندى ۇل-قىزىن باۋىرىنا باسقان
ەرلى-زايىپتى يلدۋس پەن ليديا حاقىندا ۇزىك سىر
احمەتوۆتەردىڭ ءۇيى امانقاراعاي كەنتىن جارىپ وتەتىن ۇلى جولدىڭ بويىنان شەتكەرىرەك كوشەدە. كەنتتى وراپ جاتقان كوك تىرەگەن امانقاراعاي ورمانى قىسقى كەشتە قاراۋىتىپ كورىنەدى. يلدۋس اعا مالدى كۇندەگىدەن ەرتە جايلادى. ءويتكەنى, كانيكۋلعا شىققالى كومەكشىلەرى بار. پاپاسى قوراعا بەتتەسە-اق تاۋەكەل دە ىلەسىپ قالمايدى, التىنشى سىنىپتا وقيتىن بالانىڭ شارۋاعا كوزى ۇيرەنگەن. ىلەكەڭ سيىرعا ءشوپ سالىپ جاتسا, ول اقىردىڭ اينالاسىن جيىستىرادى, جەمىن قويىسادى. مال قورانىڭ قيىن, اۋلانىڭ قارىن كۇرەۋگە باۋىرجان, راديك پەن تيمۋر دا بىرگە شىعادى. ەر بالا كۇرەك ۇستاۋعا دا, شەگە قاعۋعا دا يكەم تۇرادى. كىشكەنتاي كەزىنەن قاسىنان تاستاماي الىپ جۇرگەندىكتەن بە, بالالار شارۋاعا يكەم, قازىر ولار قورانىڭ قيىن الۋ مەن اۋلانىڭ قارىن كۇرەۋدەن يلدۋس اعانىڭ قولىن بوساتىپ قويعان. ال وتىن جارۋ تاۋەكەلدىڭ سۇيىكتى ءىسى. اعاشتى بۇتاپ, ونى مىقشىڭداپ سارايعا تاسىپ, قىزدىڭ جۇگىندەي ەتىپ جينايدى. جۇيكە جۇيەسىندە ەپتەپ كىناراتى بولعانمەن, بالا سونداي ەڭبەكقور. «اكە – بالاعا سىنشى» دەگەن, يلدۋس اعا ءتامپىش مۇرنىن تارتىپ قويىپ, وتىن جيناپ جاتقان تاۋەكەلگە قاراپ وتىرىپ, «وسكەندە اۋىلدا تۇرسا دا تاماعىن تاۋىپ جەيتىن بولار, مال ۇستاسا ەشكىم دە اش بولمايدى» دەپ ويلادى. ءتورتىنشى سىنىپقا بارىپ جۇرگەن باۋىرجاننان ءۇمىتى جوق ەمەس. كوپ سويلەمەيتىن بالا ساباعىنا دا, جۇمىسقا دا تىندىرىمدى. ال راديك پەن تيمۋردىڭ ءجونى بولەكتەۋ, سىرت پىشىنىنە قاراعاندا التىن اسىقتاي دەرلىك ەكى ۇلدىڭ دا اقىل-ەسىنىڭ دامۋى تەجەلگەن. يلدۋس حازي ۇلى دا, جۇبايى ليديا ياكوۆلەۆنا دا ولاردى ەڭبەككە باۋلۋدى ءبىر كۇن دە توقتاتقان ەمەس. اسىرەسە, 11 جاسار تيمۋردىڭ جاعدايى ويلانارلىق. بايعۇس بالانىڭ اقىل-ەسىنىڭ كەمىستىگى كوزگە ۇرىپ تۇرادى, ءوزى سەكىلدى اقىل-ەسى كەش دامىعان بالالاردىڭ ارنايى مەكتەبىنە بارادى.
مال قورادا كوبىرەك ءجۇرىپ قالعان يلدۋس اعانىڭ دا, ءتورت ۇلدىڭ دا بەتى-قولىن اياز سورىپ تاستادى. پاپاسى ۇيگە جۇرىڭدەر دەمەسە, بالا جارىقتىق توڭعانىن دا بىلمەيدى. قورادان شىعىسىمەن تورتەۋى اۋلا كۇزەتەتىن ەكى يتپەن قۋالاسىپ ويناپ كەتتى. ەسىكتىڭ الدىندا ولارعا قارايلاپ, ءار نارسەنى ءبىر ءتۇرتىنەكتەپ ءبىراز ءجۇردى دە, يلدۋس اعا توڭىپ قالار دەپ بالالارىن ۇيگە شاقىردى. بەسەۋى ايازدى كەشتە ەسىكتەن توبىمەن كىرگەندە ءۇيدىڭ جىلى اۋاسى ولاردىڭ ءجۇزىن وپكەندەي بولدى.
– تەز, پەشكە جىلىنىڭدار! – بۇل وسى ۇيدەگى بالالاردىڭ ۇلكەنى گۇلدەننىڭ وكىمى. ول بولمەدە پەشكە جاپسىرىلا قويىلعان ۇزىن ورىندىقتىڭ ۇستىنە جەتى بالانىڭ, پاپاسى مەن ماماسىنىڭ ەتىگىن, پيماسىن جاعالاي قويادى. تاڭەرتەڭ اياق كيىمنىڭ بارلىعى دا جىلى, ءارى كەۋىپ تۇرادى. گۇلدەنمەن بىرگە 7-ءشى سىنىپتا بىرگە وقيتىن رادا داستارقان مازىرىنە كىرىسكەن. ەڭ كىشكەنتاي ايسۇلۋ – ءۇيدىڭ ەركەسى. ول پاپاسىنىڭ ءتور ۇيگە ورناتقان شىرشاسىنا ءماز. ونىڭ «تۇندە ەكەۋمىز شىرشا بەزەندىرەمىز» دەگەن ۋادەسىن كۇتىپ ءجۇر. وسىدان ءۇش اي بۇرىن اياعىنىڭ تامىرىنا وپەراتسيا جاساعان ليديا ياكوۆلەۆناعا كوپ جۇرۋگە بولمايدى, بالداقپەن سۇيەنىپ جۇرەدى. گۇلدەن مەن رادا ماماسىنا «قيمىلداما, اۋىر كوتەرمە» دەپ شىر-پىر بولادى. داستارقان باسىندا قىزداردىڭ تۇيگەن ءتۇشپاراسىن پاپاسى وتە ءدامدى دەپ ماقتادى. ماماسى رادانىڭ سالاتتى وتە ۇقىپتى كەسكەنىنە ريزا بولدى. گۇلدەن بۇگىن اياز قاتتى بولسا دا, سيىردىڭ ءسۇتى ازايماعاندىعىن ايتتى. قىسقى كەشتە تەرەزەسى ەرەكشە جارىق بولىپ تۇراتىن احمەتوۆتەر ءۇيىنىڭ ءىشىن ولاردىڭ وسىنداي شۇيىركەلەسكەن اڭگىمەسى ۇياداي جىلىتىپ تۇراتىن سەكىلدى. كەشكى استان سوڭ بالالار اتا-اناسىنىڭ رۇقساتىمەن وزدەرى قالاعان ىسكە وتىرادى. ءبىرى كينو كورەدى, ءبىرى سۋرەت سالادى, قىزدار كەستە تىگەدى.
جەتى جىلدىڭ ىشىندە بالالاردىڭ قولقانات بولىپ قالعانىنا قۋانادى ليديا ياكوۆلەۆنا. ءۇيدىڭ تازالىعىنان شىبىن تايىپ جىعىلعانداي. ونى ەكى قىز الدەقاشان موينىنا العان. وتكەن جىلدان باستاپ ەكى سيىردى ەكى قىز ساۋادى. «كوز – قورقاق, قول – باتىر» دەگەن راس ەكەن. جەتىم بالالار ۇيىنەن تاستاندى جانە اكە-شەشەسى اتا-انالىق قۇقىنان ايىرىلعان شيەتتەي جەتى بالانى العاندا دوس-جاراندارىنىڭ بارلىعى دا «احمەتوۆتەر ەسىنەن اداسقان شىعار» دەگەن بولاتىن.
– ءبىزدىڭ ءوزىمىزدىڭ ءۇش ۇلىمىز بار. 46 جاستاعى ۇلكەن ۇلىمىز ۆيتالي ۆولگوگرادتا, كىشى ۇلىمىز ياكوۆ گەرمانيادا, ال ورتانشىمىز رۇستەم امانقاراعايدا تۇرادى. ءبارىنىڭ دە وتباسى, نەمەرەلەرىمىز بار. 2000 جىلداردىڭ باسىندا ەلۋدىڭ ىشىندەگى جۇلقىنىپ تۇرعان كەزىمىز ەدى. كۇش-قۋاتىمىز, وزىمىزگە جەتەرلىك ءال-اۋقاتىمىز دا بولدى. اۋليەكول اۋدانىنىڭ قازانباسى اۋىلىنان وسى امانقاراعاي كەنتىنە كەلىپ, ۇلكەن ءۇي الدىق. بارلىعى جەتكىلىكتى. جولداسىم يلدۋس ەكەۋمىز ويلاسا كەلە, ءارى ساۋابىنا قالايىق, ءارى ءوزىمىزگە دە ەرمەك بولسىن دەگەن ويمەن, بالالار ۇيىنەن ەكى بالا الۋعا كەلىستىك. سودان جەتىم بالالار ۇيىنە كەلگەنىمىزدە, مىنالار جاۋتەڭدەپ, اياعىمىزعا ورالسىن. مەنىڭ جان-دۇنيەم استان-كەستەڭ بولدى. بالالاردىڭ ءجاۋدىرەگەن كوزى كوز الدىڭنان كەتپەي قويدى. ءسويتىپ, كوزىمە قاراعان ءسابيلەردىڭ ەشقايسىسىن دا تاڭدامادىم, ءبارىن الدىق, – دەيدى ليديا ياكوۆلەۆنا.
– بىزگە ءبىرىنشى مامىر كۇنى بالالاردى الىپ كەتىڭدەر دەگەن حابار كەلدى. جىلى ماشيناعا تاماق, كيىم-كەشەك سالىپ الىپ, رۋدنىيداعى جەتىم بالالار ۇيىنە قايتا كەلدىك. ءتاربيەشىلەر بالالاردىڭ بارلىعىن شەشىندىرىپ, ءىش كيىمدەرىنە دەيىن الىپ قالدى. الدى 6-7 جاسار, سوڭى 1 جاسار بالالاردا نە قۇجات جوق, نە كيىم كەشەك جوق, وزدەرى شەتىنەن اۋرۋ. جايباراقات ءومىرىمىز باسقا ارناعا ءتۇسىپ كەتتى, – دەپ جالعاستىرادى جۇبايىنىڭ اڭگىمەسىن يلدۋس اعا.
ليديا ياكوۆلەۆنا تاربيەشىلەر تۋبەركۋلەز دەرتىمەن اۋىرادى دەگەن التى جاسار گۇلدەندى ءوزى ەمدەپ جازدى. تەك گۇلدەن عانا ەمەس, بارلىعىن دا ءوزى ەمدەدى. ونىڭ ەڭ ءبىرىنشى ەمى – انالىق ىقىلاسى ەدى. ايسۇلۋ ءبىر جاستا عانا. بارلىعىنىڭ دە ءار ءتۇرلى دەڭگەيدە جۇيكە جۇيەسى, اقىل-ەسى دامۋىنىڭ كەشەۋىلدەۋىنەن بالالاردا ەنۋرەز بولدى, ءتىپتى ولاردىڭ كەيبىرى قازىرگە دەيىن وسى سىرقاتتان زارداپ شەگەدى.
– العاشقى جىلى وتە قينالدىق. كوز ىلمەي تاڭدى اتىرعان تۇندەر قانشاما. تۇنگى ساعات ۇشكە دەيىن مەن, ودان كەيىن يلدۋس قارايتىن. كەزەكپەن ۇيىقتاپ, كەزەكپەن تاماقتاندىردىق, – دەيدى ليديا ياكوۆلەۆنا.
اراققا سالىنعان انالارى ۋىزىنا جارىتپاعاندىقتان, ولاردىڭ بارلىعى دا ءالجۋاز ەدى. اسىرەسە, رادانىڭ جاعدايى جانعا باتتى. ءسابيگە ماسكۇنەم اناسى قاراماعاندىقتان, ونىڭ جامباسى سىنعان. وكىنىشكە قاراي بالالار ۇيىندە دە ونى ەمدەمەگەن, تىم ايانىشتى ەدى. يلدۋس اعا دا, ليديا اپا دا اياعىن سۇيرەتىپ جۇرە المايتىن قىز بالانىڭ مۇگەدەك بولىپ قالماۋىن ويلاستىردى. وزدەرى بالالار اۋرۋحاناسىنا جاتقىزىپ, ءۇش رەت وپەراتسيا جاساتتى. سونىڭ ارقاسىندا قازىر ءسۇپ-سۇيكىمدى رادا اياعىن اقساماي باساتىن دارەجەگە جەتتى.
قازىر گۇلدەن مەن رادا دا, ەكىنشى سىنىپتا وقيتىن ايسۇلۋ دا جانە ۇلداردان باۋىرجان جاقسى وقيدى. ءوتكەن جىلى گۇلدەن مەكتەپتەگى 800 بالانىڭ اراسىندا ءبىر كۇن دە ساباقتان قالماعانى ءۇشىن ارنايى ماقتاۋ قاعازىن الدى. ءتارتىپ جونىنەن مۇعالىمدەردەن ەسكەرتۋ الىپ كورگەن ەمەس. ليديا ياكوۆلەۆنا بارلىق انا سياقتى بالالاردىڭ جەتىستىگىن ايتا ءتۇسكىسى كەلەدى. احمەتوۆتەردىڭ ۇيىندە ءار بالاعا جەكە-جەكە فوتوالبوم ارنالعان. ءار بالاعا پاپاسى ۆەلوسيپەد, قالتا تەلەفونىن الىپ بەرگەن. ويىنشىق دەگەنىڭ قاپ-قابىمەن, سورە مايىسقان كىتاپ. ولار مۇقتاجدىق دەگەننىڭ نە ەكەنىن بىلمەي ءوسىپ كەلەدى. ال كيىم-كەشەك, وقۋ قۇرالدارىنىڭ بارلىعىن ليديا ياكوۆلەۆنانىڭ گەرمانيادا تۇراتىن كىشى ۇلى ياكوۆ پەن ۇلكەن اپاسى ەكاتەرينا ياكوۆلەۆنا جىبەرەدى.
– باسقاسىن ايتپاعاندا, ءبىر بالانىڭ مەكتەپكە كيەتىن بەس كويلەگى بار. ءار ماۋسىمنىڭ كيىمى ءوز الدىنا, – دەيدى ليديا ياكوۆلەۆنا تۇتاس قابىرعانى الىپ تۇرعان سورەلەردە تاقتايداي ەتىپ جينالعان كيىم-كەشەكتى كورسەتىپ. – گەرمانياداعى بالام مەن اپام كومەكتەسپەگەندە ءبىز قينالاتىن ەدىك. مەنىڭ بالالارىمنىڭ كيىمى باسقالاردان ارتىق بولماسا كەم ەمەس. ولار جارقىراپ ءجۇرۋى كەرەك, ءوزدەرىن قومسىنباۋى, وزگە قۇربىلارىمەن وزدەرىن تەڭ دارەجەدە سەزىنۋى ءتيىس. ال مەملەكەتتىڭ بەرگەن از-مۇز كومەگى مەن ءوزىمىزدىڭ تاپقانىمىز نەگىزىنەن تاماققا كەتەدى. بالا ءتاربيەسىندە داستارقان بەرەكەسى ماڭىزدى ورىن الادى. پاپاسى مەن ۇلدار جەمدەپ, سەمىرتكەن بەس جاسار تۋ بيەنى جاڭا جىلدىڭ الدىندا سوعىمعا سويدىق. بالالارىم قىس بويى قازى مەن قارتا جەيدى.
ليديا ياكوۆلەۆنانىڭ ءوزى كوپ بالالى وتباسىندا, امانگەلدى اۋدانىنداعى قازاق اۋىلىندا ءوسىپتى. دالانىڭ كەڭدىگى, قاراشا ءۇي تىككەن قازاق اۋىلىنىڭ سۋرەتى كوڭىلىندە دە, كوز الدىندا دا جاتتالىپ قالعان. بالالاردىڭ بولمەسىنە دە قازاق اۋىلىنىڭ پەيزاجىن ءىلىپ تاستاعان.
– مەن قازاقتار جاقىپ دەپ اتاعان اكەم ياكوۆتىڭ ون بەس بالاسىنىڭ ەڭ كىشىسىمىن. 1947 جىلى قوستانايدا اشىققان سوڭ اكەم ءبىر تۇندە شيەتتەي بالا-شاعاسىن وگىز ارباعا تيەپ, امانگەلدى اۋدانىنا كوشىپ كەتىپتى. تازا قازاق اۋىلىندا وستىك, مەنەن باسقا اعا-اپالارىمنىڭ بارلىعى دا قازاق مەكتەبىن ءبىتىردى. قازاق اۋىلىنىڭ ءسۇتى مەن قۇرتىنىڭ, تارىسىنىڭ ارقاسىندا امان قالدىق, قازاقى دانالىقتىڭ ارقاسىندا ءبارىمىز دە سانالى, تاربيەلى بولىپ وستىك. 104-كە كەلىپ قايتقان اكەمنىڭ بارلىق دوس-جارانى قازاقتار بولدى. ماعان دا امانگەلدى اۋدانىنداعى ءوزىم وسكەن اۋىلداعى قازاقتارداي مەيىرىمدى, ءادىل, داناگوي حالىق جوق سياقتى بولىپ كورىنەدى. اۋىلدى اقساقالدار باسقاراتىنى ەسىمدە. جاستار, ايەلدەر ۇلكەن ادامنىڭ الدىن كەسىپ وتپەيتىن, – دەپ ەسكە الادى ليديا ياكوۆلەۆنا.
ونىڭ قازاق اۋىلىنان كورگەن ءتاربيەسى بويىنا قۇت بولدى. قازاق ءتىلىندە ءاپ-ادەمى سويلەيتىن ول قازانداعى قايىنجۇرتىمەن تاتار تىلىندە تەز ءتۇسىنىستى. ءدىندار ەنەسىنە دە جاقسى كەلىن اتاندى. ءالى كۇنگە دەيىن داستارقانىنان قۇرت, ەجىگەي, بالقايماق, قۇرت كوجە كەتپەيدى. قولىنداعى قىزداردىڭ تاربيەسىنە قاتاڭ تالاپپەن قارايتىنى دا قازاق اۋىلىنان قاناتىنا بايلاپ ۇشقان ءناسىبىنىڭ ءبىرى. ال مىنا بالالاردىڭ بارلىعىنىڭ دا اناسى قازاق ايەلى, شەتىنەن ماسكۇنەم. كەيبىرىنىڭ اناسى امانقاراعايدان بەس شاقىرىم جەردە تۇرادى...
– ءبىز ديسكوتەكاعا بارمايمىز. ءويتكەنى, مامام بىزگە ەڭ الدىمەن وقۋ كەرەكتىگىن ۇيرەتەدى. وقيمىز, ماماندىق الامىز, سوسىن جىگىتتەرمەن دوستاسۋعا بولادى, – دەيدى گۇلدەن. ومىرگە شىنايىلىقپەن قارايتىن رادا دا, گۇلدەن دە يلدۋس پەن ليديا ياكوۆلەۆنانىڭ وزدەرىن بالالار ءۇيىنەن الىپ, تاربيەلەپ وتىرعانىنا راحمەت ايتادى. ال ءۇش جاسارىندا كەلگەن ۇلدار ءوز تاعدىرى تۋرالى بىلە قويمايدى, ولارعا ماماسى مەن پاپاسى دا جۇرەگىن اۋىرتىپ ەشنارسە ايتقان ەمەس.
– مامامنىڭ مىنەزى قاتال, پاپامنىڭ مىنەزى جۇمساق. بىراق مامام بىزگە قازىر ايقايلاپ قالسا دا, ىلە اياپ تۇرادى. مامام سياقتى كۋلينار, مامام سياقتى ۇقىپتى, ادەمى بولعىمىز كەلەدى, – دەيدى رادا. وزدەرى ايتقانداي, احمەتوۆتەر ەگدە جاستاعى ءومىرىن جەتىم بالالارعا ارناۋدى ۇيعاردى. بۇل ۇيعارىمعا دا وزدەرىنە سەنگەن سوڭ تاۋەكەل ەتكەن ءتارىزدى. ولاي دەيتىنىمىز, يلدۋس اعانىڭ قولى التىن ادام. چەليابىدەگى اۋىلشارۋاشىلىعىن ەلەكترلەندىرۋ جانە مەحانيكالاندىرۋ ينستيتۋتىن ءبىتىرىپ, ينجەنەر ماماندىعىن العان ونىڭ قولىنان كەلمەيتىن نارسە جوق. ماشينا جوندەۋ, ءۇي سالۋ, سلەسار, دانەكەرلەۋشى, توكار سياقتى ءىستىڭ بارلىعى دا ىلەكەڭنەن قالعان. ەسىك الدىنداعى قۇدىقتان ۇيىنە, مونشاعا سۋ قۇبىرىن ءجۇرگىزىپ قويعان. جازدىق مونشا, جازدىق اسحانا, ساراي, گاراجدىڭ ءىشى دە, سىرتى دا جايناپ تۇرادى. ءوزى اتا قازداي بالالارىن ەرتىپ الىپ, جازىمەن باقشا مەن كارتوپ القابىن كۇتەدى. ءبىرنەشە جىلدان كەيىن كەلىپ كورگەندە, باياعى يەسى ءوزىنىڭ احمەتوۆتەرگە ساتقان ءۇيىن تانىماي قالىپتى. ال ماسكەۋدىڭ حالىقتىق ونەر ۋنيۆەرسيتەتىن بىتىرگەن ليديا ياكوۆلەۆنا مادەنيەت قىزمەتكەرى بولا ءجۇرىپ, كونديتەرلىك ءىستى شەبەر مەڭگەرىپ الدى. 5-ءشى رازريادى بار ونىڭ پىسىرمەگەن تاعام ءتۇرى از شىعار. ءار مەرەكە مەن ءار بالانىڭ تۋعان كۇنىندە ول دايىنداعان تورت پەن تاتتىلەردى ايتسايشى! سونىمەن قاتار وزدەرى كوپ جىل تۇرعان قازانباسى اۋلىنا ليديا احمەتوۆانىڭ اسابالىعى دا كەڭ تانىمال ەدى, ول 75 توي وتكىزگەن ەكەن. ال ونىڭ شەبەرلىگى اكەسى ياكوۆ اقساقالدان كەلسە كەرەك. ءبىرىنشى ءدۇنيەجۇزىلىك سوعىستا ءبىر اياعىنان ايىرىلىپ كەلگەن ياكوۆ وزدەرى تۇرعان ون ەكىنشى اۋىلداعى اتاقتى ۇستا بولدى. ودان اتتىڭ ەر-تۇرمانىن, ابزەلىن, ارباسىن ىستەۋ, بايپاق باسۋ, تاراق كەسۋ, شاشپاۋ, بىلەزىك-جۇزىك, قارماق سوعۋ قالعان جوق. سونى كورىپ وسكەن ليديا ياكوۆلەۆنا قازاق اۋىلىنىڭ پەيزاجىن مونشاقتاپ, كەستەلەپ تىككەن قورجىن مەن دوربا تالاي تويدا قۇدالاردى تاڭعالدىردى. قازىر اۋىلدا تۇرۋ كىمگە دە وڭاي ەمەس. يلدۋس اعاعا قوراسىنداعى ءتورت بەس ءىرى قاراسى مەن ەكى جىلقىسى ءۇشىن جەم-ءشوپ تابۋ دا وڭاي ەمەس. كەبەكتىڭ ءبىر قابىن 650 تەڭگەگە, ال تاۋىق ءۇشىن جارما جەمنىڭ ءبىر قابىن ەكى مىڭ تەڭگەگە الادى. ءبىراق تارىنىپ كورگەن جاندار ەمەس, ەرىنبەسە شارۋانىڭ دا دوڭگەلەنە بەرەرىنە سەنىمدى.
– ءوزىمىز بىلگەن ونەردىڭ بارلىعىن دا قىزدار مەن ۇلدارعا ۇيرەتەمىز. مىنە, جاسىمىز الپىستى ورتالادى. ماڭگىلىك كىم بار, ەرتەڭ ءبىز ومىردەن وتكەندە بۇلارعا سونىڭ بارلىعى كەرەك قوي. بالالاردىڭ الدىندا ءالى قانداي ءومىر كۇتىپ تۇرعانىن قايدان بىلەيىن. ءتورت ۇلدى دا سۇندەتكە وتىرعىزدىق. بۇل دا اتا-انانىڭ ۇلكەن پارىزى. ال ءبىزدىڭ و دۇنيەدە, قۇدايدىڭ الدىندا ءجۇزىمىز جارقىن. بۇل ءدۇنيەدە بالا تاربيەسىنەن ارتىق قاسيەتتى ءىس جوق, – دەيدى ليديا ياكوۆلەۆنا.
احمەتوۆتەردىڭ ايتۋىنشا, قولىنداعى تاستاندى بالالاردىڭ بارلىعىنىڭ دا اتا-اناسى, تۋعان-تۋىسى, وزىمەن بىرگە تۋعان باۋىرلارى, ءتىپتى اتا-اجەلەرى وسى دۇنيەدە ءتىرى ءجۇر. جاقىندا احمەتوۆتەر تۋرالى باسپاسوزدەن ەستىپ-بىلگەن ايەل رادانىڭ ءوزى پاتراناتتا ءتاربيەلەپ وتىرعان ءسانيا دەگەن ءسىڭىلىسىن تانىستىرۋعا الىپ كەلىپتى. ماسكۇنەم بەيباق ءسانيانى دا تۋا سالا تاستاپ كەتكەن ەكەن. ءوزى ءاپكەسىنەن اۋمايدى. كەتەرىندە كىشكەنتاي ءسانيا رادانىڭ وزدەرىمەن بىرگە ءجۇرۋىن قالادى. ال رادا بارلىعىنىڭ كوزىنشە: «مەن ءوز ۇيىمنەن ەشقايدا دا كەتپەيمىن. ونىڭ ءۇستىنە مامام وپەراتسيادان ەندى شىقتى, مەن ونى تاستاپ ەشقايدا بارا المايمىن. ءوزىڭ ماماڭمەن كەلىپ تۇر, ءبىز قوناقتى قاشان دا قارسى الامىز» دەدى. قىزىنىڭ اقىلدى ايتقان سوزىنە يلدۋس اعا مەن ليديا ياكوۆلەۆنانىڭ توبەسى كوككە جەتكەندەي بولدى. ادال ەڭبەك, اق نيەت, مەيىرىم-شاپاعات ەشقاشان ءىزسىز كەتپەيتىنىن احمەتوۆتەر تاعى دا ۇعىندى.
ءنازيرا جارىمبەتوۆا,
قوستاناي وبلىسى,
اۋليەكول اۋدانى,
امانقاراعاي كەنتى.
