ازيادا
ازيادا ساڭلاقتاردىڭ باعىن اشادى
استانا, الماتىدا وتەتىن قىسقى ازيادا ەلىمىزگە ۇلكەن ابىروي اكەلەدى. سپورتشى ءۇلكەن جەتىستىكتەرگە جەتۋ ءۇشىن وعان حالىقارالىق تالاپتارعا ساي جابدىقتالعان سپورت كەشەندەرى قاجەت. قازاقستان وسى ابىرويلى مىندەتتى ازيا ويىندارىن وتكىزۋ ارقىلى شەشىپ جاتىر. ءبىز جازعى, بولماسا قىسقى وليمپيادا ويىندارىندا مەدالدارعا سۋساعان ەلمىز. ۆانكۋۆەردەگى ەلەنا حرۋستالەۆانىڭ كۇمىس مەدالى بولماسا, ءوزىمىزدىڭ ەلدەن كەشەگى ۆلاديمير سميرنوۆتان باسقا ولجا سالعان مىقتىلارىمىز كورىنبەي ءجۇر. ازيادا وسى ماقساتتى جۇزەگە اسىرۋعا قىزمەت ەتەدى دەپ ويلايمىز.
ءبىزدىڭ سپورتشىلارىمىز دا وسىنى تۇسىنەتىن سىڭايلى. شۆەيتسارياداعى اتاقتى داۆوستا ءوتىپ جاتقان الەم كۋبوگىنىڭ كەزەكتى ەتابىندا شاڭعىشىمىز, ۇلتتىق قۇرامامىزدىڭ سەركەسى الەكسەي پولتارانين 15 شاقىرىمعا كلاسسيكالىق مانەرمەن جەكەلەي جارىسۋدا التىن مەدالدى جەڭىپ الدى. بۇل – الەم كۋبوگى جولىندا قازاقستاندىقتاردىڭ 1998 جىلدان بەرگى ەڭ ءىرى تابىسى.
1998 جىلى فينليانديانىڭ لاحتي قالاسىندا وتكەن جارىستا جەرلەسىمىز ۆلاديمير سميرنوۆ 30 شاقىرىمعا كلاسسيكالىق مانەرمەن جارىسۋدا التىن مەدال العان بولاتىن.
سوندىقتان, بۇل جەڭىستىڭ ورنى بولەك. ەلەنا حرۋستالەۆانى سىرتقا تەپكەنىمىز ەمەس, بىراق شىندىق ايتىلۋى كەرەك. رەسەي قۇراماسىنا وتپەگەننەن كەيىن ءبىراز مەملەكەتتەردە باعىن سىنادى. قازاقستان اتىنان ۆانكۋۆەردە سىنعا تۇسكەندە جولى بولدى. بۇل قىزىمىزعا ءۇلكەن راحمەت. بىراق, وزگە مەملەكەتتەردىڭ وزىنە جاراماي قالعان سپورتشىلارىن جالداۋمەن كوسەگەمىز كوگەرمەيدى. ءوز سپورتشىلارىمىزدىڭ شىققانى جاقسى. بۇل رەتتە الەكساندر ءپولتارانيندى ۇلگى ەتۋگە بولادى. ۆانكۋۆەردە وتكەن قىسقى وليمپيا ويىندارىندا بەسىنشى ورىن العان الەكساندر ۋاقىت وتكەن سايىن كورسەتكىشتەرىن جاقسارتىپ كەلە جاتقاندىعى قۋانتادى.
جاقىندا ول فينليانديانىڭ كۋسامو قالاسىندا وتكەن كلاسسيكالىق سپرينتتە الدىنا نورۆەگيالىق شاڭعىشى يون كريستياندى عانا سالىپ, مارەگە ەكىنشى كەلگەن. ەندى التىن الىپ وتىر.
ەلىمىزدە وتەتىن ازيا ويىندارىندا الەكساندردان بولەك, ەلەنا حرۋستالەۆا, نيكولاي چەباتكو, ەلەنا كولومينا, سۆەتلانا مالاحوۆا-شيشكينا سەكىلدى سپورتشىلارىمىز شاڭعى سپورتىندا جوعارى ساپالى مەدالدار ءۇشىن سايىسقا تۇسەرى انىق.
باسقا سپورت تۇرلەرىنەن دە ۇلكەن ولجا كۇتىپ وتىرمىز.
شايبالى حوككەيدەن قىزدارىمىز 2003 جىلى جاپونيادا, 2007 جىلى قىتايدا وتكەن قىسقى ازيا ويىندارىندا جەڭىمپاز بولعان. ياعني, قازاقستاندىق قىزدار بۇل جولى دا التىن ءۇشىن كۇرەسەدى دەگەن ويدامىز.
2010 جىل قازاقستان ءۇشىن تولاعاي تابىستارمەن كەلسە, 2011 جىلدىڭ شىمىلدىعىن قىسقى ازيا ويىندارىمەن اشقالى وتىرمىز...
وتانىمىز قۋاتتى مەملەكەت ەكەندىگىن دۇنيە جۇزىنە وسىلايشا تانىتىپ جاتىر. بۇل بارشا قازاقستاندىقتار ءۇشىن جۇرەكجاردى قۋانىش بولسا كەرەك.
باقتيار ارتاەۆ, افينادا وليمپياداسىنىڭ چەمپيونى, جامبىل وبلىستىق سپورت جانە تۋريزم باسقارماسىنىڭ باستىعى.
جامبىل وبلىسى.
بۇل – ءبىزدىڭ ازيادا!
استانا مەن الماتىدا وتەتىن قىسقى ازيا ويىندارى حالقىمىز ءۇشىن ۇلكەن مەرەكە, حالىقارالىق سپورت تويى بولعالى تۇر. قىتاي, جاپون جانە كورەي مەملەكەتتەرى قىسقى ويىنداردا وليمپيادانىڭ تالاي التىنىنا قول جەتكىزگەن مەملەكەتتەر. ولارمەن الەمدەگى ۇزدىك سپورتشىلار ساناسادى. ءبىزدىڭ سپورتشىلاردى دا وسال دەپ ايتۋعا بولمايدى. سوڭعى وليمپيا ويىندارىندا جاقسى تابىستارعا جەتە الماعانىمىزبەن جىل ساناپ شەبەرلىگى ءوسىپ كەلە جاتقان ساڭلاقتارىمىز بار. ءوز ەلىندە, ءوز جەرىندە ءوتىپ جاتقان ويىنداردا ولار نامىستى قولدان بەرە قويماس. ءتىپتى, كوماندالىق ءبىرىنشى ورىن ءۇشىن كۇرەسۋگە ءمۇمكىندىكتەرى بار.
قازاقستاننىڭ تابيعاتى قىسقى ويىنداردى وتكىزۋگە ابدەن لايىق. كانادانىڭ ۆانكۋۆەر قالاسىندا وتكەن وليمپيادا ويىندارىندا كۇن كۇرت جىلىپ كەتىپ, تاۋلى ايماقتاردان قار تاسىعانىن ەستىگەن ەدىك. الماتىدا ونداي جاعداي قايتالانا قويماس دەپ دەپ سەنەمىز. تاۋ شاڭعىسى دەگەن – كەرەمەت سپورت. بيىكتەن قۇلديلاپ كەلىپ, شاڭعىمەن اۋەدە قالىقتاۋ ارەكەتى كورەرمەندەرگە ەرەكشە ءلاززات سىيلايدى.
اتاقتى “مەدەۋ” مۇز ايدىنىنىڭ اتاعى كەزىندە شۆەيتساريانىڭ داۆوس مۇز ايدىنىنان بىردە كەم ەمەس ەدى. ءبىرىنشى رەت تولىق ءجوندەۋدەن ءوتىپ, حالىقارالىق ستاندارتتارعا سايكەستەندىرىلگەن “مەدەۋ” ءالى رەكوردتار ايدىنىنا اينالادى. استانادا جانە الماتىدا جاڭا سپورت كەشەندەرى سالىندى. بالۋان شولاق اتىنداعى سپورت سارايى حالىقارالىق تالاپتارعا سايكەستەندىرىلدى.
بۇنىڭ ءبارى وراسان قارجى. مۇنى ەكونوميكاسى مىقتى, كەلەشەگى كەمەل مەملەكەتتەر عانا جاساي الادى. ەلباسىمىزدىڭ سىنداردى ساياساتىنىڭ ارقاسىندا وسىنداي بيىكتەرگە جەتتىك. “قوي ۇستىنە بوزتورعاي جۇمىرتقالايتىن كۇندەر ءالى الدىمىزدا”, دەيدى پرەزيدەنتىمىز. ءوز باسىم تاۋەلسىزدىك العانىنا نەبارى 19 جىل بولعان جاس قازاقستانىمىزدىڭ الەمگە ءماشھۇر بولعانىنا قاتتى قۋانامىن.
جازيرا جاپپارقۇل, اۋىر اتلەتشى, سينگاپۋردا جاسوسپىرىمدەر اراسىندا وتكەن وليمپيا ويىندارىنىڭ جەڭىمپازى.
جانام دەگەن جۇرەكتەرگە وت بەرەدى
سپورت – ەل نامىسى. ال نامىستان بيىك ەشتەڭە جوق. بۇل تۋراسىندا قازاقتا “قوياندى قامىس, ەردى نامىس ولتىرەدى” دەگەن اتالى ءسوز بار. ۇلكەن سپورت, ءبىر جاعىنان, وسى جارىستى وتكىزگەن مەملەكەتتەردى دۇنيە جۇزىنە ايگىلى ەتەدى.
ءالى ىستىق-سۋىعى باسىلا قويماعان فۋتبولدان وتكەن الەم چەمپيوناتىن ەسكە الايىق. الەم چەمپيوناتى وڭتۇستىك افريكانىڭ داڭقىن كوتەرگەنىمەن, ەلدىڭ بيۋدجەتىنە وتە اۋىر سالماق ءتۇسىرگەن. بۇل جايىندا قازىر باتىس ءباسپاسوزى جارىسا جازىپ جاتىر. ستاديوندار سالۋ مەن ينفراقۇرىلىمداردى جۇرگىزۋگە مەملەكەت بولگەن 4,5 ملرد. دوللاردىڭ 500 ملن. دوللارى عانا قايتىپتى.
وڭتۇستىك افريكانىڭ تۋريزم ءمينيسترى مارتينۋس ۆان شالكۆيكتىڭ ايتۋىنشا, مۋنديال كەزىندە ەلگە 450 ملن. شاماسىندا جانكۇيەر كەلەدى دەپ ەسەپتەلگەن. الايدا, ءۇمىت اقتالمادى. جەكەلەگەن تۋريستىك فيرمالار بولماسا پالەندەي تابىس بولماعان. بىراق, ەل ۇكىمەتى, جارلى حالىق اسا مۇڭايىپ وتىرماعانعا ۇقسايدى. سەبەبى, وڭتۇستىك افريكادا وتكەن فۋتبول تويى تاريح پاراعىنا التىن ءارىپتەرمەن جازىلدى.
2018 جىلى فۋتبول تويى رەسەيدە وتەدى. ۇكىمەت باسشىسىنىڭ الدىن-الا مالىمدەۋىنە قاراعاندا, الەم كۋبوگىن ساراپقا سالۋعا 10 ملرد. دوللارداي قارجى جۇمسالادى دەپ بولجام جاساپ وتىرسا كەرەك. العاشقى قارجىلار ءۇش جىلدىق بيۋدجەتكە سالىنعان. بۇعان اۋەجاي, جولدار, كەمەلەر كەلىپ توقتايتىن پورتتار جوندەلەدى. ستاديوندار سالىنادى.
اينالىپ كەلگەندە, سپورتقا بولىنگەن قارجى تەككە شاشىلمايدى. ەل كەرەگىنە جۇمسالادى.
قازاقستان دا قىسقى ازيا ويىندارىن وتكىزۋگە دايىندىق كەزەڭىن اياقتادى. جاڭا سپورت نىساندارى پايدالانۋعا بەرىلدى. سىرت كوزگە شىعىن سياقتى كورىنگەنىمەن, سپورت قوندىرعىلارىنا سالىنعان قارجى ءوزىن ءوزى ابدەن اقتايدى. ويتكەنى, ازيادا وتكەننەن كەيىن بۇل سپورت كەشەندەرى بوساپ قالمايدى. ەڭ ءبىرىنشى كەزەكتە ءوز سپورتشىلارىمىزعا كەرەك. ەكىنشىدەن, مۇندا حالىقارالىق جارىستار وتكىزۋگە ابدەن بولادى. كەزىندە “مەدەۋ” مۇز ايدىنى دۇنيە جۇزىنە ايگىلى بولاتىن. “رەكوردتار فابريكاسى” دەگەن قوسىمشا اتاۋى بار ەدى. قۇداي قوس كورسە, ەندى مەدەۋ مۇز ايدىنى تالاي وليمپيادا جەڭىمپازدارىنىڭ تۇساۋىن كەسەتىن كەشەن بولادى.
وركەنيەتتى ەلدەرمەن سپورت بايگەسىنە ءتۇسۋ ءۇشىن حالىقارالىق تالاپتارعا ساي سپورت كەشەندەرى بولۋ كەرەك. گۋانچجوۋدا وتكەن جازعى ازيا ويىندارى وسىنى انىق بايقاتتى. ازيا قىتاي, كورەي جانە جاپون مەملەكەتتەرىنەن كەيىن ءتورتىنشى ورىن الۋعا قازاقستاننىڭ مۇمكىنشىلىگى ءابدەن جەتەدى. ول ءۇشىن سپورتشىلارىمىزعا قىسقى ازيا ويىندارىنا سالىنىپ جاتقانداي كەشەندەر جازعى تۇرىنەن دە كەرەك.
قازاقستان – قۋاتتى ەل, مىقتى مەملەكەت. بولاشاعى زور. وركەنيەتتى ەلدەردىڭ باسشىلارى سامميت كەزىندە ەلباسىمىزعا جوعارى دەڭگەيدە ۇيىمداستىرعانى ءۇشىن راحمەت ايتىپ جاتسا, ول دا ۇلت مەرەيى.
دۇنيەجۇزىلىك داعدارىس كەزىندە وسىنداي ايتۋلى ءىس-شارانى موينىنا الىپ, ابىرويمەن وتكىزۋ كوپتەگەن مەملەكەتتەردىڭ قولىنان كەلە بەرمەيدى. ەلباسى جانە قازاقستان ءبارىمىز ءۇشىن ەگىز ۇعىم بولىپ قالدى. قىسقى ازيا ويىندارىنىڭ تاعدىرى قازاقستانعا سەنىپ تاپسىرىلۋىنىڭ ءوزى حالقىمىز ءۇشىن ۇلكەن ولجا.
ابىرويمەن ءوتسىن دەپ تىلەيىك. جىلدىڭ ءتورت مەزگىلىنىڭ تابيعاتى بار قازاقستان ازىرگە قىسقى وليمپيادالىق ويىنداردان ولجا سالا الماي كەلەدى. استانا, الماتىدا وتەتىن ازيادا وراز قاڭلىباەۆ, ۆاديم شاقشاقباەۆ, ۆلاديمير سميرنوۆ سەكىلدى ساڭلاقتارىمىزدىڭ ءىزباسارلارى كوپتەپ شىعۋىنا سەپتەسسىن.
قازاقستاندا جانعان ازيادا الاۋى تالاي ساڭلاقتارىمىزدىڭ الەمدىك مارەلەردە ءبىرىنشى بولۋىنا قىزمەت ەتسىن دەپ تىلەيىكشى...
جاحان وڭالبەكوۆ, حقتۋ شىمكەنت فيليالىنىڭ ديرەكتورى, قازاقستانعا ەڭبەك سىڭىرگەن جاتتىقتىرۋشى, سپورت شەبەرى.
وڭتۇستىك قازاقستان وبلىسى.
