بايقاۋ قاشاندا بايىپتى

پارلامەنت ءماجىلىسى مەن بارلىق دەڭگەيدەگى ءماسليحاتتار دەپۋتاتتارىن سايلاۋ جاقىنداعان سايىن ساياسي ناۋقاننىڭ وتۋىنە قاتىساتىن قوعامدىق ۇيىمدار دا جۇمىستارىن جانداندىرا تۇسۋدە. «اقتوبە اقپارات» اقپاراتتىق ورتا­لى­عىندا سايلاۋدى بايقاۋ جونىندەگى رەسپۋب­ليكالىق قوعامدىق كوميسسيا وبلىس­تىق فيليالىنىڭ توراعاسى حالەل قۇسايى­نوۆ باق وكىلدەرىمەن بريفينگ وتكىزدى. ول كوميسسيا قۇرامىنا وڭىرگە تانىمال عا­لىمدار, قوعام قايراتكەرلەرى, باق ءجا­نە جاستار وكىلدەرى كىرگەنىن, ولاردىڭ ەلەك­توراتتى ناۋقاننىڭ اشىق جانە ءادىل ءوتۋىن قاداعالاۋعا اتسالىساتىنىن جەتكىز­دى. ونىڭ ايتۋىنشا, فيليال جانىنان قۇرا­مىندا جەتى ادام بار وبلىستىق شتاب قۇرى­لىپ, ءوز جۇمىسىن باستاۋدا. ول بۇدان بۇرىن­عى سايلاۋدا كوميسسيانىڭ 450 مۇشەسى بولعانىن, بۇل جولى بۇدان ارتىق بولماسا, كەم بولمايتىنىن اتاپ ءوتتى. كوميسسيانىڭ قۇرىلۋ ماقساتى – دەپۋتاتتىقتان ۇمىتكەرلەردىڭ سايلاۋالدى شتابتارىنىڭ, سايلاۋ كوميسسيالارىنىڭ جانە باق-تىڭ سايلاۋ تۋرالى زاڭناما­لاردى ساقتاۋىنا باقىلاۋ جاساۋ بولىپ تابىلادى. كوميسسيا مۇشەلەرى ەلەكتوراتتى ۇدەرىسكە قاتىسۋشى بارلىق ءۇمىت­كەرلەرگە تەڭ جاعدايلاردىڭ جاسالۋىن, سايلاۋ زاڭدىلىعىنىڭ بۇزىلۋىنا جول بەرمەۋدى جانە بولا قالعان كەزدە ولاردى ۋاقتىلى جويۋدى, اكىمشىلىك رەسۋرستىق ءىس-ارەكەتتەردىڭ الدىن الۋدى قامتاماسىز ەتەدى. كوميسسيا وكىلدەرى وبلىستىڭ بارلىق 12 اۋدانى مەن اقتوبە قالاسىندا جۇمىس ىستەيتىن بولادى. سايلاۋشىلار داۋىس بەرەتىن كۇنى كوميسسيا وبلىستىڭ بارلىق سايلاۋ ۋچاسكەلەرىندە بايقاۋ جۇرگىزەدى. سايلاۋدىڭ اشىق جانە ءادىل وتۋىنە قولداۋ كورسەتۋ ماقساتىندا كوميسسيا مۇشەلەرى وبلىستىق سايلاۋ كوميسسياسىمەن, پروكۋراتۋرامەن, حالىقارالىق بايقاۋشىلارمەن, ۇمىتكەرلەردىڭ سايلاۋالدى شتابتارىمەن, باق جانە ازاماتتىق سەكتور وكىلدەرىمەن بىرلەسىپ, جۇمىس ىستەيتىن بولادى. فيليال توراعاسى حالەل قۇسايىنوۆ قوعامدىق كەڭەس مۇشەلەرىنىڭ 2011, 2015 جىلدارى وتكەن پرەزيدەنتتىك سايلاۋدا جانە 2012 جىلعى پارلامەنت سايلاۋىن­دا بايقاۋشىلار رەتىندە اتسالىسقان تاجىريبەلى ازاماتتار ەكەنىن تىلگە تيەك ەتە كەلىپ, ۇيىمداستىرۋشىلىق-تاجىريبەلىك ءىس-شارالار وتكىزۋدىڭ كەستەسىنە سايكەس سەمينار-ترەنينگتەر مەن دوڭگەلەك ۇستەلدەر وتكىزىلەتىنىن جەتكىزدى. ءبىر سوزبەن ايتقاندا, بايقاۋشىلار جۇمىسىندا بايىپتىلىق قاتاڭ ساقتالاتىن بولادى. ساتىبالدى ءساۋىرباي, «ەگەمەن قازاقستان». اقتوبە وبلىسى.