ينۆەستيتسيا يگەرۋدەگى ىلكىمدىلىك

كەشە ورتالىق كوممۋنيكاتسيالار قىزمەتىندە ين­ۆەس­تيتسيالار جانە دامۋ مينيسترلىگىنىڭ ينۆەستيتسيالار كوميتەتىنىڭ توراعاسى ەرلان قايىروۆ ءباسپاسوز ءماس­لي­حاتىن وتكىزدى. ول ەلىمىزدىڭ ينۆەستيتسيالىق تارتىم­دىلىعى جونىندە جانە ولارعا كورسەتىلەتىن قىزمەتتەردىڭ قولايلىلىعى تۋرالى اڭگىمەلەدى. قازىرگى تاڭدا ەلىمىزگە شە­تەلدىك ينۆەستورلاردى تارتۋ ءىسى باستى ماقساتتىڭ ءبىرى ەكەنى ءمالىم. بۇل جونىندە مەملەكەت باسشىسى ۇكىمەتكە ءتيىستى تاپسىرمالار جۇكتەپ, اسىرەسە, ترانسۇلتتىق كورپوراتسيالاردى تارتۋ اسا ماڭىزدى ەكەنىن ايتقان ەدى. وسى جونىندە اڭگىمەلەگەن كوميتەت توراعاسى, بۇگىنگى كۇندە ينۆەستيتسيا تارتۋدىڭ كوپتەگەن يگى شارالارى جۇرگىزىلىپ جاتقانىنا توقتالدى. «بيىلعى جىل باسىنان باستاپ, استانا قالاسىنداعى حالىققا قىزمەت كورسەتۋ ورتالىعىندا «ءبىر تەرەزە» قاناتقاقتى جوباسى ىسكە قوسىلدى. ينۆەستورلار «ءبىر تەرەزە» بويىنشا 360-تان استام رۇقسات پەن ليتسەنزيا الادى. بۇل ينۆەستورلار مەن مەملەكەتتىك ورگاندار اراسىنداعى تىكە­لەي بايلانىستى بولدىرماۋ ءۇشىن كەرەك. وعان قوسا بيۋرو­كرا­تيالىق جانە اكىمشىلىك كەدەر­گىلەردى ازايتۋ ءۇشىن جاسالىپ وتىر. نەگىزى, ەلىمىزدە بۇگىن­گى كۇندە ينۆەستورلارعا قىز­مەت كورسەتەتىن 19 ءبولىم جۇمىس ىستەپ تۇر. ونىڭ ەكەۋى استا­نادا, ۇشەۋى الماتىدا, قالعا­نى وبلىس ورتالىقتارىندا ورنا­لاسقان. ەندى ينۆەستورلار ءوز ۋا­قىتتارىن ۇنەمدەي الادى. ەشقانداي مەملەكەتتىك ورگانعا بارماي-اق حقو-عا كەلىپ, ءبىر جەردەن بارلىق قۇجاتتارىن رەتتەي الادى. سونداي-اق, قاجەت جاعدايدا كونسۋلتاتسيا دا بەرىلەدى», دەدى كوميتەت توراعاسى. شارا بارىسىندا قازاقستان مەن قىتايدىڭ كاپيتالداندىرۋ كولەمى 2 ملرد. دوللار بولاتىن «جىبەك جولى» ينۆەستيتسيالىق قورىنىڭ قۇرىلعانى دا ءمالىم بولدى. بۇل تۋرالى KAZNEX INVEST كومپانياسىنىڭ باسقارما توراعاسى بوريسبي جانعورازوۆ ايتتى. «قازىرگى ۋاقىتتا ينۆەستيتسيالاردى تارتۋ بويىنشا جۇمىستار قارقىندى جۇرگىزىلىپ جاتىر. سونىڭ ىشىندە نەگىزگى باعىتتىڭ ءبىرى رەتىندە ءىرى قىتايلىق كومپانيالارعا ۇلكەن ءمان بەرىلۋدە. وسى ماق­ساتتا ينۆەستيتسيالار كوميتەتى, KAZNEX INVEST كومپا­نيا­سى جانە قحر-داعى قازاق­ستان ەلشىلىگى ۇلكەن جۇمىس اتقا­رىپ جاتىر. بيىل 20-28 قاڭتار ارالىعىندا مينيستر اسەت يسە­كەشەۆ باستاعان قازاقستاندىق دەلەگاتسيا بەيجىڭدە بولدى. وندا ءىرى كومپانيالارمەن 20-عا جۋىق كەزدەسۋ ءوتتى. ءسويتىپ, ءىرى ينۆەستورلاردى ەلگە تارتۋ ءىسى تالقىلاندى. قازىرگى ۋاقىتتا قازاقستان مەن قىتاي اراسىندا يندۋستريالىق-ينۆەستيتسيالىق ارىپتەستىك باعدارلاماسى ىسكە اسىرىلىپ وتىر. بۇگىندە 24 ملرد. دوللارعا 52 جوبانىڭ ءتىزىمى بار. ول باعدارلاماعا ءتۇرلى سالاداعى جوبالار ەنگەن. اتاپ ايتقاندا, اگروونەركاسىپتىك كەشەن, تاۋ-كەن, حيميا ونەر­كاسىبى, مەتاللۋرگيا, ماشينا جاساۋ جانە تاعى باسقالار. باعدارلاماداعى الەۋەتى جوعارى جوبالار پورتفەلىنە كەلسەك, شامامەن 19 مىڭ جۇمىس ورنى اشىلادى. باعدارلاما اياسىندا ترانسۇلتتىق كورپوراتسيالاردى تارتۋ جۇمىستارى دا جۇرگىزىلىپ جاتىر», دەگەن باسقارما توراعاسى, وسىعان بايلانىستى اتالعان جوبالاردى قارجىلاندىرۋدى جولعا قويۋ ءۇشىن بىرلەسكەن «جىبەك جولى» قورى قۇرىلعانىن ايتتى. ول قىتاي ورتالىق بانكىنىڭ ءبو­لىمشەسى مەن KAZNEX INVEST كومپانياسىنىڭ كەلىسى­مى نەگىزىندە قۇرىلىپتى. جوبا­لاردى ىزدەستىرۋ جانە قۇرى­لىمداۋ بويىنشا جۇمىستاردى قازاقستاندىق KAZNEX INVEST كومپانياسى جۇرگىزەدى ەكەن. ال قارجىلاندىرۋ بويىنشا ناقتى شەشىمدى قىتايلىق تاراپ شەشەتىن كورىنەدى. قوردىڭ جالپى كاپيتالداندىرىلۋى 2 ملرد. دوللاردى قۇراماق. نۇرباي ەلمۇراتوۆ, «ەگەمەن قازاقستان».