ەرلىك ەشقاشان ەسكىرمەيدى

كەشە ەكاتەرينبۋرگ قالاسىندا كەڭەس وداعىنىڭ مارشالى گريگوري كونستانتينوۆيچ جۋكوۆتىڭ ەسكەرتكىشى جانىندا «ءبىز ميلليونداعان پانفيلوۆشىلارمىز» دەپ اتالاتىن ەسكە الۋ ۆاحتاسىن تاپسىرۋ ءراسىمى بولىپ ءوتتى. شارا 1941 جىلدىڭ قاراشا ايىندا ماسكەۋ تۇبىندە ەرلىكپەن قازا تاپقان باتىر-پانفيلوۆشىلاردىڭ ەرلىگىنە ارنالعان ميتينگ شەڭبەرىندە ۇيىمداستىرىلدى. حالىقارالىق ەسكە الۋ ۆاحتاسى 2015 جىل­دىڭ قازان ايىندا ورىنبور قالاسىندا باس­تاۋ العان ەدى. سودان كەيىن تۋ چەليابى مەن نو­ۆو­سىبىرگە جانە الماتىعا اتباسىن بۇردى. الماتىدا تۋ ەكاتەرينبۋرگكە 316-شى اتقىش­تار ديۆيزياسىنىڭ اتى اڭىزعا اينالعان كومانديرى يۆان ۆاسيلەۆيچ پانفيلوۆتىڭ نەمەرە قىز­دارىنىڭ قولىمەن تاپسىرىلدى. ەكاتەرينبۋرگ ۆاحتاعا قاتىسقان بەسىنشى قالاعا اينالدى. ال ۆاحتا ۇستىمىزدەگى جىلدىڭ كۇزىندە قىزىل ارميانىڭ ماسكەۋ تۇبىندە قارسى شابۋىلعا شىعۋىنىڭ 75 جىلدىعىنا وراي ماسكەۋدە مارەسىنە جەتەدى. راسىمگە ۋرال فەدەرالدى وكرۋگى مەن سۆەرد­­­لوۆ وبلىسىنىڭ باسشىلارى, ورتالىق اسكەري وكرۋگىنىڭ باسشىلىعى, ديپلوماتيالىق كورپۋستىڭ وكىلدەرى, قازاقستان مەن ورتالىق ازيا حالىقتارىنىڭ دياسپورالارى, ارداگەرلەر مەن قوعامدىق ۇيىمدار وكىلدەرى, ۋرال مەملەكەتتىك پەداگوگيكالىق ۋنيۆەرسيتەتىنىڭ «ستيكس» ىزدەۋ جاساعىنىڭ مۇشەلەرى قاتىستى. شارا شەڭبەرىندە «رەسەيدىڭ ىزدەۋ قوز­عا­لىسى» جالپىرەسەيلىك قوزعالىسى» سۆەردلوۆ وڭىرلىك بولىمشەسىنىڭ جەتەكشىسى تاتيانا حاردينا 1919 جىلى تۋعان, سۆەردلوۆ وب­لىسىنىڭ نيجنە-سەرگينسك اۋدانىنىڭ تۋماسى, حابارسىز كەتتى دەپ ەسەپتەلىپ كەلگەن قاتارداعى جاۋىنگەر پەتر يابەكوۆتىڭ ارحيۆتىك قۇجاتتارى مەن سولدات مەدالونىن ونىڭ تۋىستارىنا تاپسىردى. جاۋىنگەردىڭ مۇردەسىن «پوبەدا» ىزدەۋ جاساعى تۆەر وبلىسىنىڭ رجەۆ اۋدانىنداعى سولومينو دەرەۆنياسىنان تاپقان بولاتىن. «ەگەمەن-اقپارات».