قازاقستان قولا جۇلدەگە تالاسادى

كەشە فۋتزالدان ەۋروپا چەمپيوناتىندا سىنعا ءتۇسىپ جاتقان قازاقستان قۇراماسى جارتىلاي فينال­دا يسپانيامەن كەزدەستى. تارتىستى وتكەن ماتچ قارسى­لاستارىمىزدىڭ پايداسىنا 5:3 ەسەبىمەن اياقتالدى. كەزدەسۋگە كوماندامىزدىڭ كوش­باسشى ويىنشىسى, قاقپاشى يگيتا قاتىسا المادى. وعان الدىڭعى ويىنداردا العان ەسكەرتۋلەرى سەبەپ بولدى. سونداي-اق, تاعى ءبىر نەگىزگى ويىنشىمىز شىڭعىس ەسەنامانوۆ تا جاراقاتى سالدارىنان كەزدەسۋدى الاڭ جيەگىنەن تاماشالاۋعا ءماجبۇر بولدى. سوعان وراي قۇرامانىڭ باس جاتتىقتىرۋشىسى كاكاۋ قاقپا كىلتىن گريگوري شومروعا سەنىپ تاپسىردى. ول دا يگيتا سياقتى قاجەت كەزدە قاقپاسىن تاستاپ شىعىپ, شابۋىلداعى ارىپتەستەرىنە كومەكتەسكەنىمەن, ويىنعا ايتار­لىقتاي قان جۇگىرتە المادى. جالپى, يگيتا مەن ەسەنامانوۆ­تىڭ الاڭدا جوقتىعى ماتچ بارىسىندا ايقىن سەزىلدى. ايتسە دە, كوماندامىزدىڭ ويىنىنا جوعارى باعا بەرگەنىمىز ءجون. سەبەبى, قۇرلىقتىڭ التى دۇركىن چەمپيونى دەگەن اتاعى بار ازۋلى قارسىلاسقا ءبىزدىڭ جىگىتتەر لايىقتى قارسىلىق كورسەتتى. ءتىپتى, العاشقى مينۋتتاردان باستاپ العا ۇمتىلىپ, ءبىرىنشى بولىپ گول سوققان قازاقستان ەۋروپالىقتارعا ەرىكسىز باي شايقاتتى. اتاپ ايتقاندا, كەزدەسۋدىڭ 4-مينۋتىندا ۇرىمتال ءساتتى ءمۇلت جىبەرمەگەن الەكساندر دوۆگان ەسەپ اشتى. الايدا, جەرلەستەرىمىز بۇل با­سىمدىقتى ۇزاق ۇستاپ تۇرا المادى. يسپاندار 8-مينۋتتا بەبەنىڭ كومەگىمەن تارازى باسىن تەڭەستىرىپ كەتتى. وسىدان كەيىن ويىن تەڭ جاعدايدا ءوربىپ, قوس كوماندا الما-كەزەك شابۋىلدار ۇيىمداستىردى. ال ۇزىلىسكە 3 مينۋت ۋاقىت قالعاندا قارسىلاستارىمىز قارقىنىن كۇ­شەيتىپ, باس-اياعى بىرەر مينۋتتىڭ ىشىندە ەكى گول سوعىپ كەتتى. الدىمەن 17-مينۋتتا ميگەلينا مەرگەندىگىمەن كوزگە تۇسسە, اراعا ءبىر مينۋت سالىپ راۋل كامپوس ەسەپتى 3:1-گە جەتكىزدى. ەكىنشى تايم قازاقستاننىڭ شابۋى­لىمەن باستالدى. دەگەنمەن, لەو مەن سەرىك جامانقۇلوۆ ۇيىمداستىرعان بۇل شابۋىل اياقسىز قالدى. ءوز كەزەگىندە يسپاندار بەرىلگەن مۇمكىندىكتى قۇر جىبەرمەي, الەكس 26-مينۋتتا كومانداسىنىڭ ءتورتىنشى دوبىن ەنگىزدى. ءىرى ەسەپكە قاراماستان, ءبىزدىڭ جىگىتتەر شابۋىلدارىن جالعاستىرا بەردى. ساۋاتتى قيمىلداعان ولار ەسەپ ايىرماسىن ءبىر دوپقا دەيىن قىسقارتقان بولاتىن. ناقتى ايتساق, 36-مينۋتتا ميحايل پەرشين ءناتي­جەلى سوققى جاسادى. ال ارادا ەكى مينۋت وتكەندە سەرىك جامانقۇلوۆ چەمپيوناتتاعى بەسىنشى گولىن سوعىپ, وتاندىق جانكۇيەرلەرگە ءۇمىت سىيلادى. بىراق, ءبىزدىڭ كوڭىلىمىزدى سوڭعى مينۋتتاعى كامپوستىڭ گولى سۋ سەپكەندەي باسىپ تاستادى. وسىلايشا, تۋرنيرگە العاش رەت قاتىسىپ, جارتىلاي فينالعا دەيىن جەتكەن قازاقستاندى ازۋلى يسپانيا عانا توقتاتا الدى. ەندى وتانداستارىمىز الاڭ يەسى سەربيامەن قولا جۇلدەگە تالاسادى. ال يسپاندار فينالدا رەسەيمەن چەمپيوندىق اتاقتى ساراپقا سالادى. بۇل ويىندار بۇگىن وينالادى. ەلامان قوڭىر, «ەگەمەن قازاقستان».