قىتايداعى قازاق قىزى

اسپاناستى ەلىندە ءتارتىپ ساق­شىسى بولىپ قىزمەت ەتەتىن قازاق قىزى ۇزدىك پوليتسەيلەر قاتارىنان كورىنىپ, ماراپاتقا يە بولدى. قانداسىمىزدىڭ قۇمىرىسقانىڭ يلەۋىندەي قۇجىناعان حالقى بار قىتايدا قوعامنىڭ قاۋىپسىزدىگىن قامتاماسىز ەتىپ, ارىپتەستەرىنەن وق بويى وزا شىعۋى – كۇللى قازاق­ستاندىقتار ءۇشىن ۇلكەن ماقتانىش جانە ابىروي. تاسليما داۋلەتقىزى 2010 جىلى ارنايى ەمتيحاننان ءوتىپ, شىڭجاڭ قوعامدىق قاۋىپسىزدىك مەكەمەسىنىڭ «ەرەكشە ساقشى» دەپ اتالاتىن باس بولىمشەسىنە جۇ­­مىسقا قابىلدانعان. وندا ول 3 جىل بويى ابىرويلى ەڭبەك ەتىپ, قوعامداعى قاۋىپسىزدىكتى ساق­تاۋداعى قىزمەتىن جاقسى ورىندايدى. وسىلايشا قازاق قىزىنىڭ جۇمىسىنا ادال ءھام قىراعىلىعىن بايقاعان باسشىلىق 2013 جىلى ءۇرىمجى قالالىق قوعامدىق قاۋىپسىزدىك دەپارتامەنتى سايباق اۋدانىنا قاراستى حوتان كوشە­سىندە الەۋمەتتىك حالىق ساقشىسى قىزمەتىنە اۋىستىرادى. تاياۋدا قىتاي ەلى قىسقى سپورت­تىڭ 13 تۇرىنەن جارىس وتكىزدى. ءتورت جىلدا ءبىر بولاتىن سپورت دوداسى تۇڭعىش رەت ءۇرىمجى قالاسىندا ۇيىمداستىرىلدى. وسى 15 كۇنگە سوزىلعان مەملەكەتتىك دەڭ­گەيدەگى اۋقىمدى شارادا قاۋىپ­سىزدىكتى قامتاماسىز ەتۋ ءۇشىن تىكەسىنەن تىك تۇرىپ قىزمەت ەتكەن پوليتسيا وكىلدەرىنىڭ ەڭبەگى بيلىك تاراپىنان باعالانىپ, ءتارتىپ ساقشىلارىنىڭ ۇزدىكتەرى ماراپاتتالدى. مۇنىڭ ىشىندە, ارينە, قانداسىمىز تاسليما داۋلەت­قىزى دا بولدى. ايتا كەتەيىك, ءۇرىمجى قالا­لىق قوعامدىق قاۋىپسىزدىك دەپار­تامەن­تى ونى «قوعام اماندىعىن قورعاۋداعى ۇزدىك پوليتسيا قىز­مەتكەرى» اتا­عىمەن ماراپاتتادى. بۇل تاسلي­مانىڭ العاشقى تابىسى ەمەس. ول قۇقىق قورعاۋ سالاسىندا قىزمەت ەتىپ كەلە جاتقان التى جىلدا حالىق­تىڭ ىستىق ىقى­لاسىنا ءبو­لەنىپ, العىسىن ارقالاعان جان. تورەبەك تۇرمانوۆ.