بايقاپ سويلەمەسەڭ, بالەگە ۇشىرايسىڭ

وسىدان ءبىراز بۇرىن سەربيا پارلامەنتى ەلدىڭ قورعانىس ءمينيسترى براتيسلاۆ گاشيچتى ورنىنان الدى. ەلدىڭ قورعانىس قابىلەتىن السىرەتكەنى ءۇشىن ەمەس, ءبىر جۋرناليست ايەلدىڭ ورىنسىزداۋ ءوتىنىش-سۇراعىنا ورىنسىزداۋ ءازىل جاۋاپ قاتقانى ءۇشىن. مۇندايدا قازاقتار «باسقا پالە – تىلدەن» دەيدى. ءسويتىپ, سەربتەردىڭ قورعانىس ءمينيسترى گاشيچ نە ايتىپ, اۋزى­نان قالاي قاعىندى؟ ءتىپتى, بۇل جاڭا جىلدان بۇرىن جەلتوقساندا بولعان ەدى. سودان, دۇرمەك, اي­قاي-شۋ بۇگىنگە جەتىپ وتىر. سون­دا ءبىر اقپارات قۇرالدارى قىزمەت­كەرلەرىمەن كەزدەسۋ كەزىندە ب92 دەيتىن باسىلىمنىڭ ءجۋرناليسى قورعانىس ءمينيسترىنىڭ الدىنا كەلىپ, تىزەرلەپ تۇرىپ, وپەراتور كامەراسىن كولەگەيلەمەۋىن ءوتى­نەدى. بالكىم مينيستر گاشيچ ءجۋرناليستىڭ تىزەرلەگەنىن ازىلگە دە بۇرعان شىعار: «جۋرناليست قىز­داردىڭ وپ-وڭاي تىزەرلەي سال­عانىن ۇناتامىن-اق» دەيدى. ارينە, رەسمي ادام ءۇشىن ورىنسىزداۋ جاۋاپ قوي. اسىرەسە, ىلىك ىزدەيتىندەردەن ساقتانعانى ءجون ەدى. سويتسە دە, ءبىزدىڭ ارىپتەسىمىزدىڭ دە, رەسمي ادامنىڭ الدىنا تىزەرلەي قالىپ, ءوتىنىش ايتۋىن تاپقىرلىق دەي المايسىڭ. ءتىپتى, مۇنى اران­داتۋعا جەتەلەيتىن دە ارەكەت دەپ ايتۋعا بولار ەدى. مينيستر گا­شيچتىڭ ارانداپ قالعانى انىق. بۇل جاعدايدى وعان قارسىلار قاپى ءجى­بەرمەيدى. جۋرناليستەر اراسىندا ءبىراز ءسوز بولىپ ەدى, ونى باسقالار دا قولداي كەتتى. ءسىرا, قورعانىس مينيسترىنە ءتىس قايراعاندار از بولماسا كەرەك. بۇل جۋرناليستەرگە دە دەم بەردى: جاڭا جىلدىڭ الدىندا سەربيانىڭ ءبىراز قالالارىندا جۋرناليستەر كوشەگە شىعىپ, ءمينيستردى وتستاۆكاعا جىبەرۋدى تالاپ ەتتى. ءىس ناسىرعا شاۋىپ بارا جات­قا­نىن اڭعارعان پارلامەنت تالقىلاۋعا ءماجبۇر بولدى. نا­سىرعا شابادى دەگەندە, قولىندا پىكىر تۋدىرۋ مۇمكىندىگى بار اق­پارات قۇرالدارى بۇدان كەيىن دە شۋلاي بەرۋى مۇمكىن. مۇنىڭ ارينە قاجەتى جوق. ال پارلامەنتتەگى تالقىلاۋدىڭ وڭاي بولماعانى اڭعارىلادى. تالقىلاۋدىڭ قالاي وتكەنى بىزگە بەلگىسىز. بىزگە جەتكەن حابار بويىنشا ول سەگىز ساعاتقا سوزىلىپتى. ءوز سوزىندە ەلدىڭ پرەمەر-ءمينيسترى الەكساندەر ۆۋچيچ قورعانىس ءمينيسترىن وتستاۆكاعا جىبەرۋ استە دە ونىڭ قىزمەتىنە بايلانىستى ەمەس, «ادەپ, سىيلاستىق, قۇرمەت ماسەلەسىنە» بايلانىستى ەكەنىن اتاپ كورسەتۋدى ءوتىنىپتى. وسىعان قاراعاندا, گاشيچتى بوسا­تۋعا قارسىلار دا از بولماعان سياق­تى. دەگەندە, بۇل تالاي ادامعا ساباق بولاتىن شىعار. ءبىر نارسەنى كورىپ, ەكىنشى نارسە ەسكە تۇسەدى دەگەن بار. وسىعان ءبىر­شاما ۇقساس جاي وسىدان ەكى جىل بۇرىن 18 ساۋىردە رەسەيدىڭ مەمدۋماسىندا دا وتكەن. سونداعى ءبىر ءباسپاسوز وكىلدەرىمەن كەزدەسۋدە «اتاقتى» ۆلاديمير جي­ري­نوۆسكي «روسسيا سەگودنيا» اگەنت­تىگىنىڭ جۋرناليسىنە (ونىڭ اياعى اۋىر ەكەن) وزىنە ۇنامايتىن سۇراق قويعانى ءۇشىن قايتالاپ ايتۋ قيىنداۋ سوزدەرمەن جەر-جەبىرىنە جەتە ايقايلاعان. سول ايەل جۋرناليستكە تاعى ءبىر ايەل جۋرناليست ارا تۇسكەندە لدپر كوسەمى ءتىپتى قۇتىرىنىپ كەتكەن. ادەپ كەرەك, قۇرمەت كەرەك. ول ءوزى كوبىنە سوزدەن باستالادى. سوزبەن بىرەۋدىڭ كوڭىلىن دە كوتە­رەسىڭ, بالاعاتپەن كوڭىلىن دە وشىرەسىڭ. سەربيا سكۋپشيناسى ءبىراز جۇرتقا ساباق بولعانداي شەشىم قابىلدادى. ادامنىڭ ءوز اۋزىنا اباي بولعانى ءجون.