اڭىزعا اينالعان ادام

اۋعان سوعىسىنىڭ ارداگەرى بوريس كەرىمباەۆ تۋرالى «قازاقتىڭ قارا مايورى», «كورول پاندجشەرا» اتتى قوس كىتاپتىڭ تۇساۋكەسەرى ءوتتى. الماتىداعى ۇلتتىق كىتاپ­حانادا – تانىمال ازامات تۋرالى سىر تەربەگەن قوس كىتاپتىڭ تۇساۋىن كەسۋ سالتاناتىنا ەلىمىزدىڭ تانىمال ازاماتتارى – قازاقستان­نىڭ ەڭبەك ەرى اياگۇل ميرازوۆا, اۋعان سوعىسىنىڭ ارداگەرى, كەڭەس وداعىنىڭ باتىرى نيكولاي كرەمەنيش, قوعام قايراتكەرى-بەلگىلى ءتىل جاناشىرى, ۇلت پاتريوتى اسىلى وسمان, الەمنىڭ بىرنەشە دۇركىن چەمپيونى, پالۋان داۋلەت تۇرلىحانوۆ, قالالىق تىلدەردى دامىتۋ, مۇراعاتتار مەن قۇجاتتاما باسقارماسىنىڭ باسشىسى ماماي احەتوۆ, اسكەري عىلىمداردىڭ دوكتورى, پروفەسسور كيم سەرىكباەۆ قاتىستى. – اسكەري-جاۋىنگەرلىك ىلىمدە «قا­را مايور» اتانعان سايىپقىران ساردار بوريس كەرىمباەۆ تا, وسى قوس كىتاپتى جازىپ شىققان ونىڭ اۋعان سوعىسىنداعى ارىپتەسى باقىتبەك سماعۇل دا – ەلىمىزدىڭ ەرەكشە مىنەزدى ازاماتتارى سانالادى,– دەدى ءوز سوزىندە پولكوۆنيك كيم سەرىكباەۆ. – دارىندى اسكەري قولباسشى تۋرالى دارىندى ازامات جان دۇنيەسىمەن سەزىمگە بەرىلىپ جازعان بۇل شىعارماسى اسكەري سالانىڭ ارداگەرى بولعاندىقتان دا ماعان سونداي جاقىن. ەكى كىتاپتىڭ دا العىسوزىن ءوزىم جازدىم. قان مايداندا قاتارداعى جاۋىنگەردىڭ ءومىرىنىڭ قاۋىپسىزدىگى ونىڭ بىلىكتى كومانديرىنە بايلانىستى. كىتاپتا ءاربىر سولداتى ءۇشىن شىرىلداپ كەۋدەسىن وققا توسەگەن باتىل قولباسشىنىڭ بەينەسى ادەمى اشىلعان. تاريحي ادەبيەتتىڭ بۇگىنگى ۇرپاقتى «ماڭىلىك ەل» ۇلتتىق يدەياسى اياسىندا اسكەري-پاتريوتتىق تاربيە بەرۋگە قوسار ۇلەسى وتە زور بولماق. تۇساۋكەسەر مىنبەرىنەن ءسوز العاندار ءبىر كەزدەگى تىپ-تىنىش جاتقان ەلدىڭ تالاي-تالاي بەيبىت تۇرعىندارىنىڭ جۇرەگىن جارالاعان «اۋعان سوعىسىنىڭ» زاردابىن ەسكە ءتۇسىردى. قاپشاعايدا جاساقتالعان كسرو مبب باس شتابىنىڭ №177 ايرىقشا ماقساتتاعى وتريادىنىڭ سول كەزدەگى كومانديرى بوريس كەرىمباەۆتىڭ اۋعان-پاندجشەر اۋماعىنداعى كوزسىز ەرلىگى تۋرالى قيلى-قيلى قىزىقتى دا قاسىرەتتى ەستەلىكتەر ايتىلدى. قاشاندا مايدان ادام شىعىنىنسىز بولعان با؟ قۇربان بولعانداردىڭ ارۋاعىنا قۇران وقىلدى. جيىندى جۇرگىزگەن بەلگىلى كينواكتەر, قوعام قايراتكەرى ورىن­باسار تازابەكوۆتىڭ 18 جاسىندا ايگىلى كومانديردىڭ قولاستىنا ءتۇسىپ «اۋعان تاجالىنان» امان ورالعانى – ساردارىنىڭ, «قارا مايوردىڭ», ارقاسى ەكەنى تۋرالى ايتقان ءسوزى كوپشىلىكتىڭ جانىن تەبىرەنتتى. سالتاناتتى قاۋىشۋعا باۋىر­جان مومىش ۇلى اتىنداعى ءاس­كەري مەكتەپتىڭ شاكىرتتەرى, اۋعان سوعىسىنا قاتىسۋشىلار, قوعامدىق ۇيىمداردىڭ وكىلدەرى قاتىستى. ءبىر توپ اۋعاندىق جاۋىنگەرلەرگە ب.مومىش ۇلى اتىنداعى ارنايى توسبەلگىلەر تاپسىرىلدى. ماراپاتتالعاندار ىشىندە رەسپۋبليكالىق «بالدىرعان» جۋرنالىنىڭ باس رەداكتورى, بەلگىلى جۋرناليست-جازۋشى, اۋعان سوعىسىنىڭ ارداگەرى دۇيسەن ماعلۇموۆ, الەمگە ايگىلى پالۋان, ۇلت ماقتانىشى داۋلەت تۇرلىحانوۆ, تانىمال كينورەجيسسەر رۇستەم ابدىراشەۆ جانە باسقالارى بار. «ەش ۋاقىتتا شەن مەن شەكپەنگە تالاسپاعان, پاراسات بيىگىنەن اسپاعان» «قازاقتىڭ قارا مايورى» بوريس توكەن ۇلى كونفەرەنتسيا ۇيىمداستىرۋشىلارى مەن كىتاپ اۆتورى, مايدانداس باۋىرى, مەملەكەت جانە قوعام قايراتكەرى باقىتبەك سماعۇلعا العىسىن ءبىل­دىردى. تالعات ءسۇيىنباي, «ەگەمەن قازاقستان». الماتى. ––––––––––– سۋرەتتى تۇسىرگەن نيكولاي سۋداكوۆ.