ءتىپتى, تۇپكىلىكتى ساۋىقپاسا دا, سىرقاتتىڭ ودان ءارى دەندەۋىنىڭ الدىن الۋ ءۇشىن ءتۇرلى جاتتىعۋلاردىڭ ءوزى جەتكىلىكتى ەمەس پە؟ وسىعان دالەل رەتىندە اتىراۋداعى ارناۋلى مەكتەپ-ينتەرناتتا كوزى ناشار كورەتىن بالالار ءۇشىن ارنايى كوررەكتسيالىق سىنىپتار اشىلدى. بۇل سىنىپتاردىڭ اشىلۋىنا وبلىس اكىمدىگى قولداۋ كورسەتىپتى. نەگە؟ ويتكەنى, اتىراۋدا كوزى ناشار كورەتىن 166 بالا بار. ولاردىڭ ءوز قاتارلاستارى سەكىلدى الاڭسىز ءبىلىم الۋىنا كوز جانارى كەدەرگى جاسايدى. سوعان كەيبىرى جالپى ءبىلىم بەرەتىن مەكتەپتەرگە بارعان. «مەنىڭ ۇلىم سەرگەيدىڭ جاسى 8-دە, وسى كەزگە دەيىن جالپى ءبىلىم بەرەتىن مەكتەپكە بارىپ ءجۇردى. بىراق ساباقتان قينالىپ كەلەتىن. ويتكەنى, كوزىنە كوپ كۇش تۇسەتىن ەدى.
ەندى مەملەكەتتىڭ قولداۋىمەن ارنايى كوررەكتسيالىق سىنىپتا ءدارىس الاتىنىنا قۋانىشتىمىن. ۇلىم دا قۋانىپ وتىر», دەيدى ونىڭ اناسى ولگا عيزاتۋللينا. ال كەيبىر بالالار بۇعان دەيىن ءوز ۇيلەرىندە ءدارىس الىپ كەلىپتى. ەندى سونداي بالالاردىڭ بارىنە كوررەكتسيالىق سىنىپتاردا ءبىلىم الۋعا مۇمكىندىك جاسالىپ وتىر. قازىر ارناۋلى مەكتەپ-ينتەرناتتا كوزى ناشار كورەتىن بالالارعا ارنالعان كوررەكتسيالىق سىنىپتىڭ ۇشەۋى بار. مۇندا قازاقشا جانە ورىسشا 18 وقۋشى ءدارىس الادى. ولاردىڭ ىشىندە 8 بالا اۋدانداردان كەلگەن. ولار ءۇشىن ارنايى جاتاقحانا, اسحانا جابدىقتالعان. بالالار ءتورت مەزگىل تاماق ىشەدى. قالادا تۇراتىن بالالار ءۇشىن ارنايى اۆتوبۋس بار. ارينە, كوز جانارىندا كىرەۋكە بار بالالارمەن ارنايى ماماندارعا بولماسا, كەز كەلگەن مۇعالىمگە ءدارىس وتكىزۋدىڭ قيىندىعى بار.
سول سەبەپتەن, دەفەكتولوگ-تيپپوپەداگوگ سايراگۇل زايدوللا جۇمىسقا شاقىرىلىپتى. جاس مامان بىلتىر اباي اتىنداعى قازاق ۇلتتىق پەداگوگيكالىق ۋنيۆەرسيتەتىن ءبىتىرىپتى. «مۇنداي بالالارمەن ءدارىس وتكىزۋدىڭ وزىندىك ەرەكشەلىگى بار. ءار ءدارىس 30-35 مينۋتتەن اسپاۋى ءتيىس. ءار ساباقتىڭ اراسىندا كوزگە ارنالعان جاتتىعۋلار جاساتامىن. ءار بالامەن جەكە جۇمىس جاسايمىن. كوزدى تۇزەتۋ ساباعىن وتكىزەمىن. بۇل كوز بۇلشىق ەتتەرىنىڭ شىنىعۋىنا, كوزدىڭ تىنىعۋىنا وڭ اسەر ەتەدى», دەيدى كورۋى ناشارلاعان بالالارمەن جۇمىس ىستەۋدىڭ ءمانىسىن بىلەتىن جاس مامان. تەگىندە بالانىڭ قۋانعانىنا ەشتەڭە جەتپەيدى. كوزى ناشار كورەتىن بالالارعا ارنالىپ اشىلعان كوررەكتستسيالىق سىنىپتا ءبارى بار: ارنايى پارتا, قوسىمشا جارىق, كىتاپ استىنا جابدىق. كوررەكتسيالىق سىنىپتاعى ءار بالانىڭ احۋالىمەن تانىسىپ, اتا-انالارىمەن سويلەسكەن وبلىس اكىمىنىڭ ورىنباسارى شىڭعىس مۇقان «مەملەكەتتىك ساياساتتىڭ باسىم باعىتى – حالىقتىڭ الەۋمەتتىك تۇرمىسىن جاقسارتۋ.
سونىڭ ءبىر دالەلى رەتىندە كوزى ناشار كورەتىن بالالاردىڭ الاڭسىز ءبىلىم الۋىنا جاعداي جاساۋدى كوزدەدىك. ارينە, ۇيدە ءبىلىم الۋىن ۇيىمداستىرۋعا بولادى. بىراق مەكتەپكە كەلىپ, ساپالى ءبىلىم العاننىڭ ءجونى بولەك قوي. ونىڭ ۇستىنە ءار بالا ورتاعا بەيىمدەلەدى, جاڭا تانىستار, دوستار تابادى. وي-ءورىسى داميدى, قورشاعان ورتاعا كوزقاراسى قالىپتاسادى. بۇل بالالار دا قاتار-قۇربىلارىمەن بىرگە ءبىلىم الۋعا قۇقىلى عوي. وسىنداي بالالارىمىزدىڭ شىراعى سونبەسە ەكەن», دەگەن پىكىرىمەن ءبولىستى. ءار بالاعا اكىمنىڭ اتىنان سىيلىق ۇسىندى. ال بالالار وزدەرىنە ارنالعان كونتسەرتتىك باعدارلاماعا ريزاشىلىقپەن قول سوعىپ وتىردى.
جولداسبەك شوپەعۇل, «ەگەمەن قازاقستان». اتىراۋ.
سۋرەتتى تۇسىرگەن راحىم قويلىباەۆ.
