شەبەر

جالاعاش اۋدانىنىڭ 41 تۇرعىنى «بايقوڭىر» اكك» ۇق» اق-تىڭ الەۋمەتتىك باستاماسى ارقىلى «دەمەۋ» گرانتتارىنا يە بولعان ەدى. قايتارىمسىز نەسيەلەر حالىقتىڭ الەۋمەتتىك تۇرعىداعى ءالسىز توپتارىنا, كوپ بالالى انالارعا, جۇمىسسىزدار مەن مۇمكىندىگى شەكتەۋلى جاندارعا بەرىلدى. نەسيەگە يە بولعان جاننىڭ ءبىرى – جالاعاشتىق ورىنبەك شايماعانبەتوۆ. تاعدىردىڭ جازۋىمەن قوس اياعىنان ايىرىلىپ, ارباعا تاڭىلعان ءى توپ مۇگەدەگى ورىنبەك ءومىردىڭ قانشا قيىنشىلىعىن كورسە دە, جالعاننان ءتۇڭىلىپ, جازمىشىنا نالىپ وتىرعان ادام ەمەس. ەتى ءتىرى, مىنا دۇنيەنىڭ قانداي دا سىناعىنان جول تابۋعا ۇمتىلىسىنىڭ ارقاسىندا تىرشىلىك ەتىپ, كاسىپپەن اينالىسۋدا. مۇگەدەكتىككە ۇشىراپ, ۇيدە وتىرعالى بەرى ول اناسىنان قالعان ەسكى تىگىن ماشيناسىمەن ەسكى كويلەكتەردى تىگىپ, قۇراق قۇراۋدى ۇيرەنگەن. بۇگىنگى كۇنى قۇراق كورپەلەر, كورپەشەلەر, ۇزاتىلاتىن قىزدىڭ جاساۋلارىن تىگىپ, تاپسىرىستاردى ورىنداپ كەلەدى. ورىنبەكتىڭ سەنىمدى سەرىگى دە, كۇنكورىس كوزى دە وسى تىگىن ماشيناسى. ءار بۇيىمعا ول بار ونەرى مەن كۇش-جىگەرىن سارپ ەتەدى. سوندىقتان بولار شەبەردىڭ قولىنان شىققان تۋىندىنى اتتاي قالاپ اكەتەتىندەر كوپ. تىگىنشى قىز جاساۋىن 9 كورپە سياتىن قورجىنىمەن, كورپە, كورپەشە, قورجىن, جاستىق, شىمىلدىق, بەسىكجاپقىش, پەردە جانە سىرماق كيىزدەرگە تاپسىرىس قابىلدايمىن دەپ تالاپتانىپ جاتىر. جۇبايى جەڭىسگۇل بايمۇراتوۆا دا قول قۋسىرىپ وتىرعان جوق. ءوزى وسىرەتىن بولمە گۇلدەرى شاڭىراقتاعى ۇيلەسىمنىڭ ۇيىتقىسى عانا ەمەس, تابىس كوزى دە. ەندى كاسىپكەر, قايتارىمسىز گرانتقا تىگىن تسەحىن اشىپ, جاڭادان قۇرالدار الىپ, بيزنەسىن كەڭەيتۋدى ويلاستىرىپ وتىر. ءبىر جاعىنان قۇراق كورپە تىگۋمەن عانا شەكتەلمەي, بولاشاقتا شاعىن جىلىجاي سالىپ, گۇل ءوسىرۋدى دە جوسپارلاپ قويعان. ياعني, زايىبىنىڭ سۇيىكتى ءىسىن دە ومىرشەڭ جوباعا اينالدىرماق. سوىنمەن قاتار, جالاعاش اۋدانىنىڭ تاعى ءبىر تۇرعىنى ءاليماش نۇرجان كاسىبىن ناۋبايحانا اشۋدان باستاعالى وتىر. «دەمەۋ» قورىنىڭ گرانتى ارقىلى اۋدان ورتالىعىندا نان ءپىسىرىپ, كونديتەرلىك ونىمدەردى ساتۋدى ويلاستىرۋدا. بۇگىندە كاسىپكەرلىكتىڭ العاشقى جۇمىستارىنا كىرىسىپ كەتتى. ناۋبايحانا ارقىلى 2-3 ادامدى تۇراقتى جۇمىسپەن قامتىماق. العان قايتارىمسىز نەسيەنى ءوز كاسىبىنە جۇمساپ, وتباسىلىق بيزنەستى جولعا قويسام دەگەن نيەتى بار. جالپى العاندا, سوڭعى جىلدارى كاسىپپەن اينالىسامىن, الدەبىر شارۋادان پايدا تابامىن دەگەن ادامعا مەملەكەت جان-جاقتى كومەك كورسەتىپ كەلەدى. سونىڭ ارقاسىندا قيانداعى اۋىلدان باستاپ تىرشىلىگى قايناعان قالاعا دەيىن ءتۇرلى دەڭگەيدەگى كاسىپكەرلەر كوبەيىپ, شاعىن جانە ورتا بيزنەستىڭ دامىعانىن كورىپ وتىرمىز. ەل ەكونوميكاسىنىڭ نەگىزگى تىرەگى – شاعىن جانە ورتا كاسىپكەرلىك دەسەك, وندا تاۋەلسىز قازاقستاننىڭ وركەندەۋ جولىن قالىپتاستىراتىن وسىنداي بيزنەس وكىلدەرى مەملەكەتتىڭ تىكەلەي قولداۋىمەن اياعىنان تىك تۇرىپ كەلەدى. ال مۇنداي قامقورلىقتى ءوزىنىڭ كەلەشەگىن كەمەل ەتكىسى كەلەتىن مەملەكەت قانا جاسايدى. نۇربەك داۋرەنبەكوۆ, جۋرناليست. قىزىلوردا وبلىسى.