اۋىلداستارىمنىڭ قينالۋىنا جول بەرمەيمىن

الەمدەگى قارجى داع­دا­رىسىنا بايلانىس­تى وقي­عالاردى قاراپ وتى­رىپ, ءبىزدىڭ ەلىمىز­دەگى تىنىشتىققا, حالىق­تىڭ تۇرمىسىنىڭ تۇراق­تىلىعىنا شۇكىرشىلىك ەتەمىز. بۇعان ارينە, ەلباسىنىڭ داعدارىسقا قارسى ءىس-شا­را­لاردى ەرتە باستان قولعا الىپ, ۇكىمەتكە ناقتى باع­دارلامامەن جۇمىس جاساۋدى تاپسىرۋى­نىڭ وزىندىك سەپتىگى ءتيىپ وتىرعانى داۋسىز. بۇل سارسەنبى كۇنگى ەلباسى قاتىسقان جينالىستا كەزەكتى كورىنىسىن تاپتى. ءوزىم نەگىزىن قالاعان «داستان» شارۋا قوجالىعى 2002 جىلى قۇرىلدى. سودان بەرى ماحامبەت اۋدانىندا ءتورت ت ۇلىكتى ءوز تولىنەن كوبەيتىپ قانا قويماي, تۇقىمىن دا اسىلداندىرۋ ءىسىن قولعا الدىق. اۋەلى باتىس قازاقستان وبلىسىندا اسىل تۇقىمدى مال وسىرەتىن شارۋاشىلىقتان وزىمىزگە قاجەتتى مالدى ساتىپ العانبىز. كەيىن ونىڭ تۇقىمىن اسىلداندىرۋدى دا قات-قابات جۇرگىزە باستادىق. قازىر ءبىزدىڭ شارۋاشىلىعىمىزدا قوي مەن سيىردىڭ اسىل تۇقىمدى توبى قالىپتاستى. سونىمەن بىرگە, ءوڭىر تۇرعىندارىنا ساپالى اۋىل شارۋاشىلىعى ونىمدەرىن ۇسىنۋ ءۇشىن باقشا جانە كوكونىس داقىلدارىن ءوسىرۋدىڭ قىر-سىرىن مەڭگەردىك. جاز بويى تامشىلاتىپ سۋارۋ ارقىلى وسىرىلگەن قىرىققابات, قاۋىن مەن قاربىز, قىزاناق سەكىلدى ونىمدەردى تۇتىنۋشىعا ۇسىنىپ كەلەمىز. راس, بۇرىن ماحامبەت اۋدا­نىنىڭ اقجايىق اۋىلدىق وكرۋگى اۋماعىندا وسىرىلگەن اۋىل شارۋاشىلىعى ونىمدەرىن اتىراۋ قالاسىنا دەيىن جەت­كىزۋدىڭ قيىندىعىن كورەتىن ەدىك. ويتكەنى, جايىق وزەنىنىڭ ءبىزدىڭ وكرۋگ ورنالاسقان جا­عىنان اتىراۋ قالاسىنا دەيىن قاتىنايتىن كۇرە جول بىرنەشە جىل بويى جوندەۋ كورمەي, ابدەن ويدىم-ويدىم شۇڭقىرعا اينالعان-دى. سول سەبەپتەن وسىرگەن ءونىمىمىزدى جايىقتىڭ كەلەسى بەتىنە قالتىلداعان قايىق­پەن وتكىزىپ, ورال – اتىراۋ جولىمەن جەتكىزىپ جۇردىك. بۇل بىزگە ۇلكەن قيىندىق تۋدىردى. بىرىنشىدەن, جايىق وزەنى ۇستىنەن قايىقپەن ءوتۋ قاۋىپتى بولسا, ەكىنشىدەن, ءبىراز ۋاقىتىمىزدى تەككە جوعالتۋشى ەدىك. سوڭعى جىلدارى ەلباسىنىڭ تاپسىرماسىمەن يندەر – اتىراۋ باعىتىنداعى سول جولعا كۇردەلى ءجون­دەۋ جۇرگىزىلىپ, سول ءبىر قيىندىقتان قۇتىلدىق. قازىر شارۋاشىلىعىمىزدىڭ ءتىر­لىگى تۇزەلدى. مەملەكەتتىڭ تاراپىنان الاتىن سۋبسيديامىز دا بار. ەندى قولعا العان ءىسىمىزدى كەڭەيتۋدىڭ دە جوباسىن ىسكە اسىرۋعا كىرىستىك. ءسويتىپ, مال بورداقىلاۋ كەشەنىن تۇرعىزۋدىڭ قامىندامىز. مۇندا مال سويىلادى, مال ەتى وڭدەلەدى. كوكونىس جانە باقشا ونىمدەرىن ساقتايتىن قويمانى دا ىسكە قوسامىز. بۇل كۇندەرى ءبىزدىڭ شارۋاشىلىعىمىزدا ءوزىم ءوسىپ-ونگەن وكرۋگىمنەن 25 ادام تۇراقتى جۇمىسپەن قامتىلدى. ولاردىڭ تۇرمىسىن تۇزەۋىنە دە قولداۋىمىزدى كورسەتتىك. شارۋاشىلىعىمىزدىڭ قۇرىلعانىنا 10 جىل تولۋىنا وراي ۇزدىكسىز 10 جىل جۇمىس جاساعان اۋىلداستارىما كولىك سىيلادىق. كەيبىرىنە تۇرعىن ۇيلەر سالىپ بەردىك. ەندى بيىلعى جىلدىڭ اياعىنا تامان مال بورداقىلاۋ كەشەنى ىسكە قوسىلعاندا تاعى دا 50-گە جۋىق ادامدى تۇراقتى جۇمىسپەن قامتۋدى كوزدەپ وتىرمىز. بۇدان بولەك بىزدە ءار جىل سايىن كوكتەم جانە جاز ايلارىندا كوكونىس پەن باقشا داقىلدارىن وسىرۋگە بايلانىستى قوسىمشا 30-عا جۋىق ادامدى ناۋقاندىق جۇمىستارمەن قامتيمىز. ءبىزدىڭ اقجايىق وكرۋگىندە دە تۇرمىسى تومەن وتباسىلارى, زەينەتكەرلەر تۇرادى. ولارعا تۇرمىسىنا قاجەتتى ازىق-ت ۇلىكپەن, كەيبىرىنە جەم-شوپپەن كومەكتەسىپ تۇرامىز. ويتكەنى, ءبىزدىڭ دە كىندىك قانىمىز سول اۋىلدا تامدى, سول توپىراقتا وستىك. سول وكرۋگتە شارۋاشىلىعىمىزدى وركەندەتىپ, تابىس تاۋىپ وتىرمىز. ءبىز ءوزىمىزدى سول اۋىلدىڭ تۇرعىندارىنان ەشقاشان بولەكتەگەن جوقپىز. وزىمىزدە جۇمىس ىستەيتىن ادامداردىڭ, جالپى, الداعى ۋاقىتتا اۋىلداستارىمىزدىڭ تۇرمىسى تومەندەمەۋى ءۇشىن بارلىق مۇمكىندىكتى قاراستىرا بەرەمىز. بۇل تۇپتەپ كەلگەندە, ەلدىڭ الەۋمەتتىك احۋالىن جاقسارتۋعا قوساتىن ۇلەسىمىز بولا بەرەدى. قونىس ەرمانوۆ, «داستان» شارۋا قوجالىعىنىڭ قۇرىلتايشىسى, «قۇرمەت» وردەنىنىڭ يەگەرى. اتىراۋ وبلىسى.