«قازاقستان» تەلەارناسىندا «جامبىل» ءفيلمى كورسەتىلەدى

استانا. 12 اقپان. اقىننىڭ 170 جىلدىق مەرەيتويى قارساڭىندا «قازاقستان» تەلەارناسى جامبىل جاباەۆ تۋرالى 4 سەريالى تاريحي دراما ازىرلەدى. بۇل تۋرالى «قازاقستان» رترك اقپارى بويىنشا egemen.kz ءتىلشىسى حابارلادى. فيلم «قازاقستان» ارناسىندا 28 اقپاندا, ياعني اقىننىڭ تۋعان كۇنىندە كورەرمەندەر نازارىنا ۇسىنىلادى. اقىن وزىنەن كەيىن باي مۇرا قالدىرىپ, قازاق ادەبيەتى مەن مادەنيەتىنە ۇلكەن ۇلەسىن قوستى. فيلمدە جامبىل جاباەۆتىڭ شىعارماشىلىعى مەن ومىرلىك جولى تولىقتاي كورسەتىلگەن. ءفيلمنىڭ شىعارماشىلىق توبى باستى ءرولدى سومداۋعا كوپتەگەن تانىمال ارتىستەردىڭ ىشىنەن كوپ ۋاقىت بويى ىرىكتەۋ جاسادى. ناتيجەسىندە جامبىل ءرولى قازاقستان رەسپۋبليكاسىنىڭ ەڭبەك سىڭىرگەن قايراتكەرى, «دارىن» مەملەكەتتىك جاستار سىيلىعىنىڭ لاۋرەاتى, اكتەر, ءانشى, كومپوزيتور, دراماتۋرگ – بايعالي ەسەناليەۆكە بەرىلدى. بايعالي ەسەناليەۆتىڭ ايتۋىنشا, اقىننىڭ بەينەسىن ەكراندا سومداۋ وڭاي ەمەس. سەبەبى ءتۇسىرىلىم كەزىندە سالماق باس كەيىپكەرگە تۇسەدى. «مەنى اقىنىڭ ءرولىن سومداۋعا شاقىرعاندا, ويلانباي بىردەن كەلىسىمىمدى بەردىم. كاستينگكە كەلسەم, باستى رولگە ۇمىتكەر رەتىندە كوپتەگەن تانىمال اكتەرلەردىڭ فوتولارى ءىلىنىپ تۇر. ولاردان وزىپ جۇلدە الۋ قايدا!؟- دەپ ويلانىپ قالدىم. دەسەم دە بارعان سوڭ باعىمدى سىناپ كورۋگە بەل بۋدىم. سول كۇنى ءساتتى كۇن بولىپ, كونكۋرستان ءوتىپ كەتتىم. رەجيسسەر سىرتقى ۇسقىنىما قاراپ ءبىراز سالماق تاستاۋ كەرەك دەدى» ,  دەپ ەسكە الادى بايعالي ەسەناليەۆ. جامبىل جاباەۆ كوپ قىرلى تۇلعا. ونىڭ اقىندىعىن بىلاي قويعاندا, جىر الىبى ايرىقشا سۋىرىپ سالما شەشەندىگىمەن تانىمال. جامبىلدىڭ پوەزياسى ءاردايىم قاراپايىم حالىقپەن بايلانىستى بولعان. تەلەسەريالدىڭ نەگىزگى كورىنىستەرى تابيعاتى اسەم الماتى وبلىسىنىڭ «ۇشقوڭىر» باۋرايىندا, جامبىل وبلىسى مەن ماسكەۋدە ءتۇسىرىلدى. ەكراندا تەك قانا تاريحي كەيىپكەردىڭ ءومىربايانى ەمەس, سونىمەن قوسا حح عاسىردىڭ ورتاسىنداعى ەلىمىزدىڭ سول داۋىردەگى كورىنىسى كورسەتىلگەن. سونىمەن بىرگە فيلمدە بۇعان دەيىن كوپ ايتىلا قويماعان اقىننىڭ ومىرىنەن الىنعان قىزىقتى دەرەكتەر كورسەتىلەدى. سونىڭ ءبىرى – جامبىل مەن بۇرىمنىڭ ءبىر بىرىنە دەگەن ماحابباتى جايلى بولماق. ءتۇسىرىلىم توبى دەكوراتسيالارعا, اكتەرلەردىڭ كوستيۋمى مەن وبرازدارىنا جەتە كوڭىل ءبولىپ, ازىرلەگەن. سول ارقىلى جامبىل ءومىر سۇرگەن ءداۋىردىڭ  تولىقتاي كورىنىسىن كورسەتە الدى. ءفيلمنىڭ رەجيسسەرى «لاۆە», «جەڭىس سەمسەرى», «قازىنا» جانە تاعى باسقا كينوتۋىندىلاردى تۇسىرگەن ءانۋار رايباەۆ. ء«بىز ءتۇسىرىپ جاتقان «جامبىل» كوركەم ءفيلمى 4 بولىمنەن تۇرادى. قازاق ءسوز ونەرىنىڭ «يمپروۆيزاتسيا» ءۇردىسىن جاڭا ارناعا بۇرىپ, جاڭاشا مازمۇن دارىتقان جامبىل اتامىز, قاراپايىم قارا ءسوزدىڭ مايىن تامىزىپ, تالاي ايتىستا جەڭىسكە جەتكەن, ەل الدىندا بەدەلدى ەدى. جۇدىرىقتاي جۇرەگىنە جەتىسۋ مەن الاتاۋدى بىلاي قويعاندا, بۇكىل الەمدى سىيدىرا بىلگەن, دانا اقىننىڭ ەلگە قالدىرعان اتالىق, دانالىق سوزدەرىن, ەل بۇگىندە اۋزىنان تاستامايدى. جۇرگەن جەرىندە, «مىڭ ءولىپ-مىڭ تىرىلگەن» بارشا قازاققا باتاسىن بەرگەن جامبىلدىڭ سول باتاسى بۇگىنگى كۇنى دە جەردە قالماي, ارمانى مەن وي ءورىسى كوككە ورلەگەنىنە قازىرگى «ۇرپاق» ءبىز كۋا! ءبىزدىڭ ماقسات جامبىل اتامىزدىڭ «ادامي» تۇلعاسى مەن قادىر-قاسيەتىن باسقا قىرىنان كورسەتىپ, ابىرويىن كوككە ورلەتۋ», دەيدى ءفيلمنىڭ رەجيسسەرى انۋار رايباەۆ. كارتينادا ايگۇل ۇلكەنباەۆا (دينا نۇرپەيىسوۆا), ءىلياس تۇرمانوۆ (لاۆرەنتي بەريا), ايگەرىم سامەنوۆا (كۇلاش بايسەيىتوۆا), جولامان ءامىروۆ (جاباي), ەرگەنباي ابۋەۆ ء(سۇيىنباي), نۇربەك مۇقىش (كەنەن ازىرباەۆ), بورانباي مولداحمەتوۆ (مۇحتار اۋەزوۆ), قانات ءجۇنىسوۆ (ساكەن سەيفۋلين), كەنتاي اقۇرپەكوۆ (تەمىربەك جۇرگەنوۆ), باقىت بەدەلحان (باۋىرجان مومىش ۇلى) جانە تاعى دا باسقا بەلگىلى اكتەرلەر وينايدى. داستان كەنجالين. دەرەك: «قازاقستان» رترك. سۋرەت: egemen.kz