قازاقستان سپورتشىلارى نورۆەگياداعى ەلشىلىكتە بولدى

استانا. 12 اقپان. نورۆەگيانىڭ وسلو قالاسىندا جاسوسپىرىمدەردىڭ قىسقى وليمپيا ويىندارىنا قاتىساتىن سپورتشىلارىمىز بەن ۇلتتىق وليمپيادا كوميتەتىنىڭ وكىلدەرى قازاقستاننىڭ وسى ەلدەگى ەلشىلىگىندە بولدى. بۇل تۋرالى egemen.kz ءتىلشىسى حابارلادى. ەلشىلىكتە ەلىمىزدىڭ وليمپياداعا بارعان دەلەگاتسياسى قازاقستاننىڭ نورۆەگيا كورولدىگىندەگى توتەنشە جانە وكىلەتتى ەلشىسى قايرات ابۋسەيىتوۆپەن كەزدەستى. كەزدەسۋدە ەلشى وليمپيادادا 20 سپورتشىمىزدىڭ ەل نامىسىن قورعايتىنىن, ولاردىڭ اراسىندا قازىردىڭ وزىندە جاس بولسا دا باس بولا بىلەتىن جاسوسپىرىمدەرىمىزدىڭ بار ەكەنىن ايتىپ, جارىس كەزىندە ەلشىلىك وتانداستارىمىزدىڭ جاقسى جارىسۋى ءۇشىن قولدا بار مۇمكىندىكتىڭ بارلىعىن جاسايتىنىن ايتتى. ءوز كەزەگىندە ۇلتتىق وليمپياداقكوميتەتىنىڭ ۆيتسە-پرەزيدەنتى اندرەي كريۋكوۆ جارىستا جاستارىمىزدىڭ سپورتتىڭ 9 تۇرىنەن قاتىساتىنىن, قازىر ولارعا بارلىق جانكۇيەرلەردىڭ ەلىمىزگە جۇلدەلەردى ارقالاپ اكەلەتىنىنە ۇمىتپەن قاراپ وتىرعانىن اتاپ ءوتتى. نورۆەگياداعى ەلشىمىز 1994 جىل ءدال وسى قالادا, ليللەحامەردە قازاقستان سپورتشىسى ۆلاديمير سميرنوۆتىڭ التىن مەدالدى جەڭىپ العانىن, ودان كەيىن ەشكىمنىڭ وليمپيا ويىندارىندا قۇرمەت تۇعىرىنىڭ ەڭ بيىك ساتىسىنا كوتەرلىمەگەنىن ەسكە سالىپ, سونىڭ ناتيجەسىن بيىلعى دودادا جاستارىمىزدىڭ قايتالايتىنىنا سەنىم ءبىلدىردى. داستان كەنجالين. دەرەك: قازاقستاننىڭ ۇلتتىق وليمپيالىق كوميتەتى. سۋرەت: egemen.kz