قازاقستان جارتىلاي فينالدا يسپانياعا ەسە جىبەردى

استانا. 12 اقپان. فۋتزالدان سەربيا استاناسى – بەلگراد قالاسىندا ءوتىپ جاتقان ەۋروپا چەمپيوناتىندا قازاقستان قۇراماسى جارتىلاي فينالدا يسپانيامەن كەزدەستى. تارتىستى وتكەن ماتچ يسپانداردىڭ پايداسىنا 5:3 ەسەبىمەن اياقتالدى. بۇل تۋرالى egemen.kz ءتىلشىسى حابارلادى. اتالعان كەزدەسۋگە كوماندامىزدىڭ كوشباسشىسى, قاقپاشى يگيتانىڭ ەسكەرتۋىنە بايلانىستى قاتىسا الماعانىن اتاپ وتكەن ءجون. سونداي-اق, تاعى ءبىر نەگىزگى ويىنشىمىز شىڭعىس ەسەنامانوۆ تا جاراقاتى سەبەپتى ويىندى الاڭ جيەگىنەن تاماشالاۋعا ءماجبۇر بولدى. سوعان وراي قۇرامانىڭ باس جاتتىقتىرۋشىسى كاكاۋ قاقپا كىلتىن گريگوري شومروعا سەنىپ تاپسىردى. ول دا يگيتا سياقتى قاجەت كەزدە قاقپاسىن تاستاپ شىعىپ, شابۋىلداعى ارىپتەستەرىنە كومەكتەسكەنىمەن, ويىنعا ايتارلىقتاي قان جۇگىرتە المادى. جالپى, يگيتا مەن ەسەنامانوۆتىڭ الاڭدا جوقتىعى ماتچ بارىسىندا ايقىن سەزىلدى. سوعان قاراماستان, كوماندامىزدىڭ ويىنىنا جوعارى باعا بەرگەنىمىز ءجون. سەبەبى, قۇرلىقتىڭ التى دۇركىن چەمپيونى دەگەن اتاعى بار ازۋلى قارسىلاسقا ءبىزدىڭ جىگىتتەر لايىقتى قارسىلىق كورسەتتى. ءتىپتى, العاشقى مينۋتتاردان باستاپ العا ۇمتىلىپ, ءبىرىنشى بولىپ گول سوققان قازاقستان ەۋروپالىقتارعا ەرىكسىز باي شايقاتتى. اتاپ ايتقاندا, كەزدەسۋدىڭ 4-مينۋتىندا ۇرىمتال ءساتتى ءمۇلت جىبەرمەگەن الەكساندر دوۆگان ەسەپ اشتى. الايدا, جەرلەستەرىمىز بۇل باسىمدىقتى ۇزاق ۇستاپ تۇرا المادى. يسپاندار 8-مينۋتتا بەبەنىڭ كومەگىمەن تارازى باسىن تەڭەستىرىپ كەتتى. وسىدان كەيىن ويىن تەڭ جاعدايدا ءوربىپ, قوس كوماندا الما-كەزەك شابۋىلدار ۇيىمداستىردى. ال ۇزىلىسكە 3 مينۋت ۋاقىت قالعاندا قارسىلاستارىمىز قارقىنىن كۇشەيتىپ, باس-اياعى بىرەر مينۋتتىڭ ىشىندە ەكى گول سوعىپ كەتتى. الدىمەن 17-مينۋتتا ميگەلينا مەرگەندىگىمەن كوزگە تۇسسە, اراعا ءبىر مينۋت سالىپ راۋل كامپوس ەسەپتى 3:1-گە جەتكىزدى. ەكىنشى تايم قازاقستاننىڭ شابۋىلىمەن باستالدى. دەگەنمەن, لەو مەن سەرىك جامانقۇلوۆ ۇيىمداستىرعان بۇل شابۋىل اياقسىز قالدى. ءوز كەزەگىندە يسپاندار بەرىلگەن مۇمكىندىكتى قۇر جىبەرمەي, الەكس 26-مينۋتتا كومانداسىنىڭ ءتورتىنشى دوبىن ەنگىزدى. ءىرى ەسەپكە قاراماستان, ءبىزدىڭ جىگىتتەر شابۋىلدارىن جالعاستىرا بەردى. ساۋاتتى قيمىلداعان ولار ەسەپ ايىرماسىن ءبىر دوپقا دەيىن قىسقارتقان بولاتىن. ناقتى ايتساق, 36-مينۋتتا ميحايل پەرشين ناتيجەلى سوققى جاسادى. ال ارادا ەكى مينۋت وتكەندە سەرىك جامانقۇلوۆ چەمپيوناتتاعى بەسىنشى گولىن سوعىپ, وتاندىق جانكۇيەرلەرگە ءۇمىت سىيلادى. بىراق, ءبىزدىڭ كوڭىلىمىزدى سوڭعى مينۋتتاعى كامپوستىڭ گولى سۋ سەپكەندەي باسىپ تاستادى. وسىلايشا, تۋرنيرگە العاش رەت قاتىسىپ, جارتىلاي فينالعا دەيىن جەتكەن قازاقستاندى ازۋلى يسپانيا عانا توقتاتا الدى. ەندى وتانداستارىمىز الاڭ يەسى سەربيامەن قولا جۇلدەگە تالاسادى. ال يسپاندار فينالدا رەسەيمەن چەمپيوندىق اتاقتى ساراپقا سالادى. بۇل ويىندار بۇگىن وينالادى. جالپى, دەبيۋتانت بولا تۇرا جارتىلاي فينالعا جەتۋدىڭ ءوزى قازاق فۋتزالى ءۇشىن ۇلكەن جەتىستىك. دەسەك تە, تەمىردى قىزعان كەزدە سوعىپ, جۇلدەگە قول جەتكىزىپ جاتساق, تەك فۋتزالىمىز ەمەس, تۇتاس قازاق سپورتى ءۇشىن مارتەبە بولارى ءسوزسىز. ەندەشە دوپ تەۋىپ ۇلتىمىزدىڭ اتىن شىعارىپ جۇرگەن ۇلاندارىمىزعا ساتتىلىك تىلەيىك. ەلامان قوڭىر. دەرەك: egemen.kz. سۋرەت: uefa.com.