اقتوبەدە تۇلەكتەردى جۇمىسقا ءبولۋ شاراسى وتكىزىلدى

اقتوبە. 12 اقپان. اقتوبە قالاسىنداعى مارات وسپانوۆ اتىنداعى باتىس قازاقستان مەملەكەتتىك مەديتسينا ۋنيۆەرسيتەتىندە وبلىس ايماعىندا جۇمىس ىستەۋگە نيەتتى تۇلەكتەردى الدىن الا جۇمىسقا ءبولۋ شاراسى ۇيىمداستىرىلدى. بۇل تۋرالى egemen.kz ءتىلشىسى حابارلادى. شاراعا اۋدان اكىمدەرىنىڭ ورىنباسارلارى مەن قالالىق جانە اۋداندىق اۋرۋحانالاردىڭ باس دارىگەرلەرى قاتىسىپ,تۇلەكتەردى وزدەرىنە جۇمىسقا شاقىردى. وبلىستىق دەنساۋلىق ساقتاۋ باسقارماسىنىڭ دەرەكتەرىنە سۇيەنسەك, ايماقتا رەانيماتولوگ, فتيزياتر جانە جالپى تاجىريبە دارىگەرى سىندى 94 مامان جەتىسپەيدى ەكەن. جيىنعا قاتىسقان وبلىس اكىمىنىڭ ورىنباسارى اسقار شەريازدانوۆ وبلىستىڭ دەنساۋلىق ساقتاۋ سالاسى جىل وتكەن سايىن دامىپ كەلە جاتقانىن, سوندىقتان جاس ماماندارعا سۇرانىستىڭ جوعارى ەكەنىن ايتتى. بيىلعى جىلى وسى ۋنيۆەرسيتەتتى التى ماماندىق بويىنشا 546 تۇلەك بىتىرەدى. ونىڭ ىشىندە 100 اكۋشەر-گينەكولوگ پەن پەدياترلار مىندەتتى تۇردە رەزيدەنتۋرادا ءبىلىمىن جالعاستىرادى. سونداي-اق, وبلىستان تىسقارى باتىس قازاقستان, ماڭعىستاۋ, اتىراۋ, قىزىلوردا وبلىستارى ءۇشىن جالپى تاجىريبەدەگى تەراپەۆت, حيرۋرگ, ستوماتولوگ سەكىلدى ءتورت جۇزگە جۋىق مامان دايارلانعان. ءبىزدىڭ وڭىردە 76 تۇلەك قالۋدى جوسپارلاسا, 80 تۇلەك وزگە وبلىستارعا اتتانباق. ال 56 تۇلەك رەزيدەنتۋرادا وقيدى. دەرەك كوزىنەن بەلگىلى بولعانىنداي, جىل سايىن ۋنيۆەرسيتەت تۇلەكتەرىنىڭ 85 پايىزى جۇمىسقا ورنالاسادى. بولاشاق دارىگەرلەردى جۇمىسقا ورنالاستىرۋدىڭ بۇل جولعى شاراسى اقتوبە ءوڭىرىنىڭ مەديتسينالىق ۇيىمدارىنا ارنالىپ ۇيىمداستىرىلسا, كەلەسى جيىن ەلىمىزدىڭ باتىسىنداعى وزگە ايماقتارىن قامتيتىن بولادى. ساتىبالدى ءساۋىرباي. دەرەك: egemen.kz. سۋرەت: zkgmu.kz.