داقىلدار كەشەندى تۇردە وڭدەلۋدە

اقكول اۋدانىندا مايلى جانە ءداندى داقىلداردى كەپتىرىپ, تازارتاتىن جانە ساقتايتىن جاڭا زاماناۋي كەشەن سالتاناتتى جاعدايدا اشىلدى. «پەگاس» جشس كەشەنىنىڭ قۇرىلىسى ەكى كەزەك بويىنشا جۇزەگە اسىرىلۋدا. جاڭا كاسىپورىننىڭ قۋاتى – 30 مىڭ توننا. جالپى, نىسان ارقايسىسى 3000 توننانى قۇرايتىن 10 شۇڭقىر قۇتى­دان تۇراتىن بولادى. وتكەن جىل­دىڭ قازان ايىندا جوبانىڭ ءبىرىن­شى كەزەگى جۇزەگە اسىرىلىپ, 5 شۇڭ­قىر قۇتى ورناتىلعان, بۇگىندە بۇلار تولىق جۇمىسقا قوسىلدى. ال جوبانىڭ ەكىنشى كەزەگىن 2016 جىلدىڭ قازان ايىندا ىسكە قوسۋ جوس­پار­لانعان. اۆتو­مات­تاندىرىلعان جاڭا كەشەن جەلىلەرى رەسەي جانە تۇركيا ەل­دەرىنەن جەتكىزىلدى. كاسىپورىندا 12 ادام جۇمىس ىستەيدى, ولاردىڭ ورتا­شا ايلىق جالاقىسى 100 مىڭ تەڭگەدەن اسادى. قۇنى 500 ميلليون تەڭ­گەنى قۇرايتىن بۇل ­زاماناۋي نىسان كوم­پا­نيانىڭ جەكە قاراجاتىنا سالىنعان. مەملەكەت باسشىسى ايماق­تار­دىڭ الەۋەتىن ارتتىرۋ ءۇشىن اۋىل شارۋا­شى­لىعى ءوندىرىسىن ءارتاراپتاندىرۋ قا­جەتتىگىن العا تارتقانى بەلگىلى. اقمولا وبلىسىندا وسى تاپسىرمانى ورىنداۋ ماقساتىندا بىلتىر 245,2 مىڭ گەكتار مايلى داقىلدار, 193,9 مىڭ گەكتارعا جەمشوپتىك, 18,37 مىڭ گەكتارعا كارتوپ جانە 4,4 مىڭ گەكتارعا كوكونىس داقىلدارى ەگىلگەن. سالتاناتقا قاتىسقان ءوڭىر باسشىسى سەرگەي كۋلاگين كاسىپورىن ۇجىمىنا ساتتىلىك تىلەدى. ەسكە سالا كەتەيىك, اۋىل شارۋا­شى­لىعى داقىلدارىن ساقتاۋ جانە كەپتىرۋدى قامتاماسىز ەتۋ ءۇشىن 2015 جىلى وڭىردە 14 جاڭا كەشەن پايدالانۋعا بەرىلسە, 2016 جىلى تاعى دا وسىنداي 8 جاڭا نىسان ىسكە قوسىلادى دەپ كۇتىلۋدە. باقبەرگەن امالبەك, «ەگەمەن قازاقستان». اقمولا وبلىسى.