اۋىلدا كۇرمەۋلى ماسەلە جوق ەمەس

«اۋىل» حالىقتىق-دەموكراتيالىق پاتريوتتىق پارتياسى وڭتۇستىك قازاقستان وبلىستىق فيليالىنىڭ توراعاسى قاناتبەك دوساليەۆ وبلىستىق ءماسليحات دەپۋتاتتىعىنا ۇمىتكەر رەتىندە №46 سايلاۋ ۋچاسكەسىنە تىركەلدى. قاراتوبە ەلدى مەكەنى, م.اۋەزوۆ اتىنداعى №96 ورتا مەكتەپتە ورنالاسقان №46 سايلاۋ كوميسسياسىنىڭ توراعاسى ءورازالى ماحانوۆ ۇمىتكەردىڭ قۇجاتتارىن تىركەۋگە كوميسسيا مۇشەلەرىنىڭ قاتىسۋىمەن قابىلداپ الدى. «ءسىز – وسى سايلاۋ كوميسسيا­سىنا العاش بولىپ تىركەلگەن ۇمىتكەرسىز. سايلاۋدا جەڭىسكە جەتىپ, ەلدىڭ ءۇمىتىن اقتاي بەرۋىڭىزگە تىلەكتەسپىن», – دەگەن اق تىلەك ايتتى ءورازالى ءانۋار ۇلى. وبلىستاعى جاڭا تەحنولوگيالار كوللەدجىنىڭ ديرەكتورى, زاڭ عىلىمدارىنىڭ دوكتورى قاناتبەك دوساليەۆ – وبلىس تۇرعىندارى اراسىندا بەدەلدى, تانىمال ازامات. «وبلىستا وتكەن «اۋىل» پارتياسى كونفەرەنتسياسىندا مەنىڭ كانديداتۋرام وبلىستىق ماسليحاتقا ۇسىنىلدى, – دەدى قاناتبەك بالتاباي ۇلى. – ءبارىمىزدىڭ دە قاناتتانىپ ۇشقان ۇيامىز, قازاقتىڭ التىن بەسىگى – اۋىل. سوندىقتان, جاۋاپكەرشىلىك جۇگى اۋىر. ارينە, حالىق سەنىمىنە يە بولىپ, سايلاۋدا جەڭىسكە جەتىپ جاتساق, ءبىز اتقاراتىن شارۋا كوپ. ەلباسىمىز اۋىل جاعدايىن وڭالتۋ, شاعىن جانە ورتا بيزنەسكە قولداۋ كورسەتۋ جانە ەلدى جۇمىسپەن قامتۋ ماسەلەسىن ۇكىمەت مۇشەلەرىنە ۇدايى تاپسىرادى. بۇگىنگىدەي الەمدىك داعدارىس جاعدايىندا قالادا جۇمىسسىز جۇرگەن جاستار كوپ. ولاردى اۋىلعا ورالتىپ, جەڭىل نەسيەمەن ءوز كاسىبىن اشۋعا جاردەمدەسسەك, جاعدايلارىن تۇزەپ الار ەدى. اۋىلداعى تەحنيكا از, بارىنىڭ دەنى ەسكىرگەن. ليزينگكە الۋ قىمبات. كەپىلگە قويىپ الار ءۇي, قورا-قوپسىسىن بانكتەر جاراتپايدى. وبلىس اكىمى بەيبىت اتامقۇلوۆ اۋىلداردا متس اشۋعا تالپىنىس جاساپ جاتىر. وسى ءىستىڭ جۇزەگە اسۋىنا كومەكتەسەمىز. جالپى, «اۋىل» پارتياسىنىڭ قازاقتىڭ ۇلتتىق قاينارى, كۇرەتامىرى اۋىلدىڭ ءال-اۋقاتىن كوتەرەتىندەي ءوز باعدارلاماسى بار». كەلەسى كەزەكتە ۇمىتكەر وبلىستاعى بەلگىلى اۋىل شارۋاشىلىعى عالىمدارى, كەزىندە اۋىلدا تابىستى جۇمىس جاساعان بىلىكتى باسشى, ەڭبەك وزاتتارىنىڭ باسىن قوسىپ, دوڭگەلەك ۇستەل وتكىزگەندەرىن ايتتى. «ۇسىنىس, پىكىرلەرىن جيناقتادىق. اۋىلعا جاڭا تەحنولوگيا جەتىستىكتەرىن تارتۋ ماسەلەسىن تالقىلادىق. ارينە, سايلاۋدا جەڭىسكە جەتىپ جاتساق, وسى پروبلەمالاردى وبلىس اكىمدىگىمەن قويان-قولتىق جۇمىس جاساي وتىرىپ, كەزەڭ-كەزەڭىمەن شەشۋگە مۇمكىندىك تۋادى», – دەدى ق.دوساليەۆ. باقتيار تايجان, «ەگەمەن قازاقستان». شىمكەنت. سۋرەت: el.kz