قۋانىش سىيلاعان 100 پاتەر

بۇگىنگى كۇننىڭ ءبىر تالابى حالىقتى قولجەتىمدى باسپانامەن قامتاماسىز ەتۋ بولىپ تابىلادى. ايتالىق, جەتىسۋ جەرىندە اتقارىلىپ جاتقان ناتيجەلى جۇمىس ەش دابىراسىز مەملەكەتتىك ساياساتقا ساي ۋاقىت ۇدەسىنەن شىعىپ, تۇرعىندارعا قۋانىش سىيلاۋى سونىڭ جارقىن كورىنىسى ەكەنى انىق. قاشاندا ناقتى ىسىمەن كورىنە بىلەتىن ءوڭىر باسشىسى سارسەنبىنىڭ ءساتتى كۇنىندە «100 ناقتى قادام» ۇلت جوسپارى اياسىندا 100 پاتەر كىلتىن تالدىقورعاندىقتارعا تاپسىردى. ناقتىلاي تۇسسەك, تالدىقورعاننىڭ شىعىس شاعىن اۋدانىندا مەديتسينا قىزمەتكەرلەرىنە 60 كوممۋنالدىق پاتەردىڭ, ال وڭتۇستىك-باتىس شاعىن اۋدانىندا جالپى تۇرعىن ءۇي الۋ كەزەگىندە تۇرعاندارعا 40 نەسيەلىك پاتەر بەرىلدى. مەملەكەت باسشىسى «100 ناقتى قا­دام» ۇلت جوسپارى باعدارلاماسىندا ايقىنداپ بەرگەن نەگىزگى باسىمدىلىقتىڭ ءبىرى حالىقتىڭ دەنساۋلىعىن جاقسارتۋ بولىپ تابىلادى. بۇل ءوز كەزەگىندە قىزمەتتىڭ ساپاسىن كوتەرىپ, ماماندارعا جاعداي جاساۋعا وڭ اسەرىن تيگىزۋدە. كۇنى-ءتۇنى تىنباي ەڭبەك ەتەتىن دارىگەرلەردىڭ الاڭسىز جۇمىس جاساۋى – ولاردىڭ جاعدايىنىڭ جاقسى بولۋىنا دا بايلانىستى. ءبىز قاي كەزدە دە ەلى ءۇشىن, حالىقتىڭ دەنساۋلىعى ءۇشىن ايانباي تەر توگىپ جۇرگەن مەديتسينا سالاسىنىڭ قىزمەتكەرلەرىن قۇرمەتتەيمىز. ەلباسى تاپسىرماسىن جۇزەگە اسىرۋدا – ەلىمىزدەگى جاڭا ەكونوميكالىق ساياسات باعىتى ينفراقۇرىلىمدىق نىسانداردى ودان ءارى دامىتۋعا باعىتتالعان. وسىعان وراي, جەتىسۋ وڭىرىندە قۇرىلىس جۇمىستارى قارقىن الۋدا. وبلىسىمىزدا «قولجەتىمدى باسپانا-2020» باعدارلاماسىنىڭ بارلىق باعىتتارى قامتىلىپ, بيىل دا جالعاسىپ كەلەدى», دەدى الماتى وبلىسىنىڭ اكىمى اماندىق باتالوۆ. قورىتا ايتقاندا, بۇل قادام مەملەكەتتىڭ حالىققا جاساپ جاتقان جاقسىلىعىنىڭ جارقىن كورىنىسى. بۇگىندە تۇراقتى جۇمىس ورنى بولعانىمەن پاتەر جالداپ تۇراتىن ماماندار تالدىقورعاندا دا بارشىلىق. مىنە, سونداي بىلىكتى دارىگەردىڭ ءبىرى وبلىستىق كارديولوگيا ورتالىعىنىڭ حيرۋرگى قۇربانالى سابدەنوۆ «2010 جىلى اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىن ءبىتىرىپ, تالدىقورعانعا كەلىپ ماماندىعىم بويىنشا قىزمەتكە ورنالاس­تىم. سودان بەرى پاتەر جالداپ تۇردىم. ءبىر بالام بار. ەكىنشى بالامىزدى توسىپ وتىرمىز. ەندى, مىنە, مەملەكەتىمىزدىڭ حالىققا جاساپ وتىرعان جاقسىلىعىنا جەتىپ, قوس بولمەلى پاتەر كىلتىن الدىق», دەدى ول قۋا­نىش قۇشاعىندا تۇرىپ. نۇربول الدىباەۆ, «ەگەمەن قازاقستان». تالدىقورعان.