جۇمىس جۇيەسى جاقسارادى

«نۇر وتان» پارتياسىنىڭ ورتالىق اپپاراتىندا پارتيا جانىنداعى مادەنيەت پەن ونەردى دامىتۋ ماسەلەلەرى جونىندەگى «ميراس» قوعامدىق كەڭەسىنىڭ وتىرىسى بولدى. بەينەماجىلىس بايلانىس جۇيەسىندە وتكەن جيىنعا «مي­راس» قوعامدىق كەڭەسىنىڭ توراعاسى, پارلامەنت ءماجىلىسى V شاقى­رىلىمىنىڭ دەپۋتاتى ماۋلەن اشىمباەۆ توراعالىق ەتتى. بەلگىلى ساياساتكەرلەر, مەملەكەت جانە قوعام قايراتكەرلەرى, پارلامەنت سەناتى مەن پارلامەنت ءماجىلىسىنىڭ V شاقىرىلىمىنىڭ دەپۋتاتتارى, عىلىم مەن ونەر سالاسىنىڭ وكىلدەرى قاتىسقان جيىندى اشقان م.اشىمباەۆ «نۇر وتان» پارتياسىنىڭ كەزەكتەن تىس XVII سەزىندە ەلباسى, پارتيا توراعاسى نۇرسۇلتان نازارباەۆ 5 ينستيتۋتتىق رەفورما شەڭبەرىندەگى «100 ناقتى قادام» ۇلت جوسپارىن جۇزەگە اسىرۋعا بايلانىستى بىرقاتار مىندەتتەر جۇكتەگەنىن ەسكە سالدى. وسى ورايدا, پارتيا ۇلت جوسپارىن جۇزەگە اسىرۋعا حالىقتى جۇمىلدىرۋ, مەملەكەتتىك باعدارلامالاردىڭ ورىندالۋىنا ءتيىمدى باقىلاۋدى قامتاماسىز ەتۋ, ەل اراسىندا ءتۇسىندىرۋ جۇمىستارىن جۇرگىزۋ سىندى مىندەتتەرگە باسىمدىق بەرىپ وتىرعانىن جەتكىزدى. سونداي-اق, م.اشىمباەۆ «ميراس» قوعامدىق كەڭەسى ءوزىنىڭ الداعى وتىرىستارىندا وسى رەفورمانىڭ «بىرتەكتىلىك پەن بىرلىك» اتتى ءتورتىنشى باعىتى كەڭىرەك تالقىلاناتىنىن اتاپ ءوتتى. «ءبىز بۇل وتىرىستا قازاقستان تاۋەلسىزدىگىنىڭ 25 جىلدىعىنا وراي, مەملەكەت باسشىسى ن.نازارباەۆتىڭ «ۇلت جوسپارى – قازاقستاندىق ارمانعا باستايتىن جول» باعدارلامالىق ماقالاسىندا ايتىلعان ماسەلەلەرگە سايكەس, جۇزەگە اسىراتىن ءىس-شارالاردى قاراۋدى كوزدەپ وتىرمىز. جالپى, ەلباسىمىزدىڭ جاريالاعان 5 ينستيتۋتتىق رەفورماسى, «100 ناقتى قادامى» ەلىمىزدىڭ, بۇكىل حالىقتىڭ الدىنا جاڭا دەڭگەيدەگى ستراتەگيالىق ماقساتتار قوياتىنى ءسوزسىز. بۇل ۇلكەن باعدارلامانىڭ نەگىزگى ماقساتى – قازاقستاندى الەمدەگى اسا 30 دامىعان مەملەكەتتىڭ قاتارىنا قوسۋ. ول ەلىمىزدىڭ ەكونوميكاسىنىڭ, ساياسي جۇيەسىنىڭ بارلىق سالاسى مەن بارلىق قىرىن قامتيدى دەسەك, ارتىق ايتقاندىق بولماس. بۇل رەفورمانىڭ نەگىزگى ماقساتى – ەلىمىزدىڭ تاۋەلسىزدىگىن كۇشەيتۋ جانە ونى ماڭگىلىك ەتۋ», – دەدى م.اشىمباەۆ. ول مۇنداي باستامالاردى جۇزەگە اسىرۋ تەك مەملەكەتتىك ورگانداردىڭ عانا جۇمىسى ەمەس, بۇكىل قوعامنىڭ, حالىقتىڭ الدىندا تۇرعان مىندەت ەكەنىن, بۇل رەتتە, رەفورمانى جۇزەگە اسىرۋ شارالارىنا زيالى قاۋىم وكىلدەرىنىڭ قاتىسۋىن دا ءجون دەپ ەسەپتەيتىنىن جەتكىزدى. «جالپى, 1 قاڭتاردان باستاپ, ۇلكەن رەفورمانى جۇزەگە اسىرۋ ۇدەرىسى باستالدى. V شاقىرىلىمداعى پارلامەنت ءماجىلىسى 60-قا جۋىق زاڭ قابىل­داپ, وسىنداي رەفورمالارعا قۇقىق­تىق نەگىز قالىپتاستىردى. ەندىگى ۇلكەن ماقسات – ۇكىمەت, پارلا­مەنت سەناتى مەن جاڭادان سايلاناتىن پارلامەنت ءماجىلىسى, قوعام­دىق ۇيىمدار, زيالى قاۋىم بىرىگىپ, مەملەكەت الدىندا تۇرعان مىندەتتەردى جۇزەگە اسىرۋ», – دەدى م. اشىمباەۆ. بۇدان كەيىنگى كەزەكتە ءسوز العان بەلگىلى مەملەكەت جانە قوعام قايراتكەرى, پارلامەنت ءماجىلىسىنىڭ V شاقىرىلىمىنىڭ دەپۋتاتى قۋانىش سۇلتانوۆ ەلباسىنىڭ باعدارلامالىق ماقالاسىندا ايتىلعان ءتۇيىندى ماسەلەلەرگە بارىنشا نازار اۋدارىلۋ كەرەكتىگىن جەتكىزدى. «ادامدا ارمان كوپ. ارمان – ادام ومىرىنە, ساناسىنا ءتان ەرەكشە قۇبىلىس. ال كەز كەلگەن ەلدىڭ, ۇلتتىڭ, قوعامنىڭ باستى ارمانى – ەركىن ەل, تاۋەلسىز ۇلت, مەملەكەت دارەجەسىنە جەتۋ ەكەندىگى دە زاڭدىلىق. «ۇلت جوسپارى – قازاقستاندىق ارمانعا باستايتىن جول» باعدارلامالىق ماقالاسىندا كوتەرىلگەن ماسەلەلەر «100 ناقتى قادامعا» بايلانىستى قابىلدانعان زاڭدىق نەگىزدەرگە سۇيەنە وتىرىپ ايتىلدى. ەلباسى ءوزىنىڭ ماقالاسىندا, سونداي-اق, قابىلدانعان زاڭداردى جۇزەگە اسىرۋ ارقىلى مەملەكەتتىڭ جاڭا ساپالىق دەڭگەيگە كوتەرىلەتىندىگىن جەتكىزدى. ال مەملەكەتتىڭ جاڭا ساپاسىن كىم جاسايدى؟ ونى حالىق جاسايدى. حالىق وكىلەتتىلىگىن بەرگەن ۇكىمەت جاسايدى. بيلىك تارماقتارى جاسايدى. ال ەلىمىزدىڭ 30 دامىعان مەملەكەتتىڭ قاتارىنا كىرەمىز دەگەندەگى ارمانىنىڭ بىردەن-ءبىر مازمۇنى – ۇلتتىق سانانى قالىپتاستىرۋ», – دەدى ق.سۇلتانوۆ. پارلامەنت سەناتى الەۋمەتتىك-مادەني دامۋ جانە عىلىم كومي­تەتىنىڭ توراعاسى اقان بيجانوۆ ەلباسى ماقالاسىنىڭ وزەگى قازىرگى جاعدايدا ەلىمىزدە تۇراقتىلىقتى ورنىقتىرۋ جانە ونى قامتاماسىز ەتۋ ەكەنىن جەتكىزسە, حالىقارالىق تۇركى اكادەمياسىنىڭ پرەزي­دەنتى دارحان قىدىرالى: «الەۋ­مەت­تانۋشىلاردىڭ پىكىرىنشە, ۇلتتار دا, وركەنيەتتەر دە, مادەنيەتتەر دە ادام سياقتى. ولاردىڭ ءوسۋ كەزەڭى, كەمەلدەنۋ شاعى بولادى. بىراق, وركەنيەتتەر مەن مادەنيەتتەر, مەملەكەتتەر ادام عۇمىرىنا قاراعاندا, ۇزاق عۇمىرلى بولادى. الايدا, ولاردىڭ قىسقا نەمەسە ۇزاق عۇمىرلى بولۋى مەملەكەتتىڭ ارمانىنا, ونىڭ ىشكى نيەتى مەن قۋاتىنا بايلانىستى. ەگەر ءبىر ەلدىڭ ارمانى بولماسا, ول ەلدىڭ عۇمىرى دا قىسقا بولۋى مۇمكىن. قازىر قازاقستان جاڭا ارمانمەن, جاڭا اڭسارمەن, جاڭا ماقساتپەن ءوزىنىڭ كۇن ءتارتىبىن بەلگىلەپ وتىر. دەمەك, مۇنى مەملەكەتىمىزدىڭ بولاشاعىن ايقىندايتىن باعدارى دەپ ەسەپتەۋگە بولادى», – دەدى. كەزدەسۋ بەينەكونفەرەنتس باي­لانىس جۇيەسى رەتىندە دە وتكەن­دىكتەن, وعان «ميراس» قوعامدىق كەڭەسىنىڭ ايماقتارداعى مۇشەلەرى دە تىكەلەي قوسىلىپ, وزدەرىن تولعاندىرعان ماسەلەلەر جونىندە اڭگىمە قوزعادى. ال جيىن سوڭىندا قوعامدىق كەڭەس مۇشەلەرى قازاقستان تاۋەل­سىز­دىگىنىڭ 25 جىلدىعىنا وراي, ەلبا­سىنىڭ «ۇلت جوسپارى – قازاق­ستاندىق ارمانعا باستايتىن جول» باعدارلامالىق ماقالاسىن ناسيحاتتاۋ شارالارىن جانە «ميراس» قوعامدىق كەڭەسىنىڭ 2016 جىلعا ارنالعان جۇمىس جوسپارىن بەكىتتى. ءلايلا ەدىلقىزى, «ەگەمەن قازاقستان».