بالىق تا باپقا وسەدى

قازىر جەردىڭ دە, سۋدىڭ دا قوجاسى بار. بۇل نارىقتىڭ تالابى. مۇنىڭ تيىمدىلىگى سول, ادامدار وزدەرىنە تيەسىلى جەردىڭ دە, سۋدىڭ دا پايداسىن كورۋگە داعدىلانۋدا. ءتىپتى بۇرىن-سوڭدى ايتۋدىڭ وزىنە جۇرەگىڭ شايلىعاتىنداي بوي ۇيرەنبەگەن كاسىپتىڭ تىزگىنىن ۇستاۋ دا تۇك بولماي قالدى. «كوز قورقاق, قول باتىر» دەگەندەي, تاۋەكەلىڭ تۇرسا تۇرمىسىڭدى تۇزەۋگە ابدەن بولادى. ارينە, قۇر نارتاۋەكەلمەن ءىس بىتپەيتىنى دە بەلگىلى. بۇل ارادا شىن كاسىپپەن اينالىسامىن دەۋشىلەرگە ۇكىمەتتىڭ ءوزى قولداۋ كورسەتۋى قايتارىمدى بولا تۇسكەنىن اڭعارامىز. حرومتاۋ اۋدانىنىڭ «تۇل­پار» اكتسيونەرلىك قوعامىنا قارايتىن تابانتال بالىق شا­رۋاشىلىعىنىڭ باسشىسى مىقتىبەك ەسماعامبەتوۆ توعان­دا بالىق ءوسىرۋدى وسىدان 13 جىل بۇرىن باستاپتى. ماعادجان سۋ قويماسىن سەنىمدى باسقارۋعا العان كاسىپكەر باستاپقى جىلدارى توعانداعى تابيعي ءوسىپ-ونگەن بالىقتاردىڭ كوبەيۋىنە باعىتتالعان جۇمىستاردى اتقاردى. ايتەۋىر كوڭىلگە دەمەۋ دەمەسەڭ, بۇل قارقىنمەن توعاننىڭ پايدا اكەلىپ جارىتپاسىن اڭعارعان ول مەملەكەتتىك باعدارلاما بويىنشا نەسيە الىپ, جاڭا تىڭ ءىستىڭ تىگىسىن تارقاتۋعا كىرىستى. ونى توعانداعى بالىق قورىن مولايتۋ, ونداعى بالىقتىڭ ساپاسىن جاقسارتۋ تۋرالى وي مازالاي بەردى. 2007 جىلى توعانعا قوستاناي وبلىسى اۋماعىنان, توبىل وزەنىنىڭ جوعارعى باسىنان 50 مىڭ تۇقىنىڭ شاباعىن جىبەرەدى. ساتىبالدى ءساۋىرباي, «ەگەمەن قازاقستان».